އުރުގުއޭ ގައުމީ ފުޓުބޯޅަ ޓީމުގެ ކޯޗަކަށް އާޖެންޓީނާގެ މާސެލޯ ބިއެލްސާ ހަމަޖައްސަން ނިންމައިފިއެވެ.

އުމުރުން 67 އަހަރުގެ ތަޖުރިބާކާރު ކޯޗު އެންމެ ފަހުން ހުރީ އިނގިރޭސި ޕްރިމިއާ ލީގުގެ ލީޑްސް ޔުނައިޓެޑުގެ ކޯޗުގެ މަގާމުގައެވެ. އެހެންނަމަވެސް، އޭނާއާއެކު އެ ޓީމުގެ ނަތީޖާތައް ދަށްވުމުގެ ސަބަބުން ލީޑްސްއިން ވަނީ ފެބްރުވަރީ މަހު ބިއެލްސާ މަގާމުން ވަކިކޮށްފައެވެ. އޭގެ ފަހުން މިހާތަނަށް އޭނާ ހުރީ އެއްވެސް ވަޒީފާއެއް ނެތިއެވެ.

އުރުގުއޭގެ ކޯޗުކަމުގައި އެންމެ ފަހުން ހުރީ ޑިއޭގޯ އަލޮންސޯއެވެ. އެހެންނަމަވެސް މިދިޔަ އަހަރު ގަތަރުގައި ނިމުނު ފީފާ ވޯލްޑް ކަޕަށްފަހު އޭނާ ވަނީ މަގާމުން ވަކިކޮށްފައެވެ. އޭގެ ފަހުން އެ މަގާމު ހުސްކޮށް އޮތްއިރު، އުރުގުއޭގެ ފުޓުބޯޅަ ފެޑެރޭޝަނުން އައީ އައު ކޯޗެއް ހޯދުމުގެ މަސައްކަތް ކުރަމުންނެވެ. އެކަމުގެ ތެރެއިން އެ ފެޑެރޭޝަނުން ވަނީ ބިއެލްސާއާއެކު ވެސް މަޝްވަރާ ކޮށްފައެވެ. އުރުގުއޭގެ ފުޓުބޯޅަ ފެޑެރޭޝަންގެ އިސް އޮފިޝަލަކާ ހަވާލާދީ މީޑިއާތަކުގައި ބުނެފައިވަނީ، އުރުގުއޭގެ ކޯޗަކަށް ބިއެލްސާ ހަމަޖައްސަން މިހާރު އެއްބަސްވުމަކަށް އާދެވިފައިވާކަމަށެވެ. އެހެންކަމުން ކުރިއަށް އޮތް ދުވަސްތަކުގައި އެކަން ރަސްމީކޮށް އިއުލާންކުރެވޭނެ ކަމަށްވެސް ވަނީ ބުނެފައެވެ.

ބިއެލްސާ އޭނާގެ ކޯޗިން ކެރިއަރު ފެށީ 1982 ވަނަ އަހަރުއެވެ. އޭގެ ފަހުން އޭނާ ވަނީ މިހާތަނަށް އެކި ޓީމުތަކަށް އިރުޝާދު ދީފައެވެ. އުރުގުއޭ ވާނީ ބިއެލްސާ ހަވާލުވާނެ ދެވަނަ ގައުމީ ޓީމަށެވެ. މީގެ ކުރިން ވަނީ 1998ން 2004 ވަނަ އަހަރަށް އަމިއްލަ ގައުމުކަމަށްވާ އާޖެންޓީނާއަށް އިރުޝާދު ދީފައެވެ. އޭގެ ފަހުން އެ ގައުމުގެ 23 އަހަރުން ދަށުގެ ޓީމާވެސް ހަވާލުވިއެވެ. އެއަށްފަހު 2007 ވަނަ އަހަރުން 2011 ވަނަ އަހަރަށް ވަނީ ޗިލީގެ ގައުމީ ޓީމަށްވެސް އިރުޝާދު ދީފައެވެ. ބިއެލްސާ އިރުޝާދު ދިން ކުލަބުތަކުގެ ތެރޭގައި އެތުލެޓިކް ބިލްބާއޯ، އެސްޕަންޔޯލް، މާސޭ، ލީލް އަދި ލީޑްސް ޔުނައިޓެޑުވެސް ހިމެނެއެވެ.