ކުރިން ވެސް އޮތް ތާރީހުގައި އިންޑިއަން އޯޝަން އައިލެނެޑް ގޭމްސް ބޭއްވޭނެ ކަމަށް މަޑަގަސްކަރައިން ބުނެފި އެވެ.
އިންޓަނޭޝަނަލް ގޭމްސް ކޮމިޓީގެ ރައީސް އެންޓޯނިއޯ ގޯޕާލް މިހެން ބުނީ މަޑަގަސްކަރާގައި އޮގަސްޓް 23 ވަނަ ދުވަހު ފަށަން އޮތް ގޭމްސް ނުބޭއްވިދާނެ ކަމަށް މަގަޑަސްކަރައިގެ އޮލިމްޕިކް ކޮމިޓީން މި މަހުގެ ކުރީކޮޅު ބުނުމުންނެވެ. އެކޮމިޓީން ބުނީ ގޭމްސް ބޭއްވޭނެ ކަމުގެ އޮތީ ދެ ޕަސެންޓް ޔަގީންކަން ކަމަށެވެ. ނަމަވެސް އެ ގައުމުގެ ކުޅިވަރާ ބެހޭ ވަޒީރު ބުނަނީ ގޭމްސް ބޭއްވޭނެ ކަމުގެ 98 ޕަސެންޓް ޔަގީންކަން ދޭ ކަމަށެވެ.
ގޯޕާމް ބުނީ ކަމާބެހޭ ފަރާތްތަކާއެކު މިހާރު މަޝްވަރާކުރެވިފައިވާ ކަމަށާއި ގޭމްސް ބާއްވަން ކުރަންޖެހޭ އެންމެހާ ކަންކަން ފުރިހަމަ ކުރެވޭނެ ކަމުގެ ޔަގީންކަން ލިބިފައިވާ ކަމަށެވެ.
އިންޑިއަން އޯޝަން އައިލެންޑް ގޭމްސްގެ 11 ވަނަ މުބާރާތް ސެޕްޓެމްބަރު މަހުގެ ތިނަކަށް ބާއްވަން ވަނީ ތާވަލްކޮށްފަ އެވެ. މި ގޭމްސް އަކީ ރާއްޖެއިން ވެސް ބޮޑު ކޮންޓިންޖެންޓެއް ފޮނުވާ ގޭމްސްއެކެވެ. އަދި ރާއްޖެ އަށް އެންމެ ގިނަ މެޑަލް ލިބިފައިވަނީ ވެސް މި ގޭމްސްއިންނެވެ.
