ތިލަމާލެ ބްރިޖުގެ މަޝްރޫއަށް ބަންކޮށްފައިވާ ސަރަހައްދުން ދަތުރުނުކުރުމަށް ޓްރާންސްޕޯޓް މިނިސްޓްރީން އަންގައިފިއެވެ.
ތިލަމާލެ ބްރިޖުގެ މަސައްކަތަށް މާލެއާއި ވިލިމާލެ އަދި ވިލިމާލެއާ ގުޅީފަޅާ ދެމެދުގައި އޮންނަ ކަނޑުއޮޅި މިދިޔަ އަހަރުގެ އޮގަސްޓު 15 އިން ފެށިގެން ވަނީ ބަންދުކޮށްފައެވެ.
އެހެންނަމަވެސް މިހާރަކަށް އައިސް ގިނަ އުޅަނދުތަކުން މި ކަނޑުއޮޅި ބޭނުންކުރަމުންދާކަމުގެ ޝަކުވާ ލިބެމުންދާތީ މިކަމާ ގުޅިގެން ޓްރާންސްޕޯޓް މިނިސްޓްރީން ނެރުނު ބަޔާނުގައި ބުނީ ބްރިޖުގެ މަސަައްކަތް ކުރިއަށްދާ ވަގުތުގައި މި ކަނޑުއޮޅިން ދަތުރުކުރުމަކީ ރައްކާތެރި ކަމެއް ނޫން ކަމަށެވެ.
އެހެންކަމުން މާލެއާއި ވިލިމާލެއާ ދެމެދުގައި އޮންނަ ކަނޑުއޮޅި ބަންދުކޮށްފައިވާކަން މިނިސްޓްރީން ވަނީ އިއުލާނުކޮށްފައެވެ. އަދި ދެކުނުގެ އަތޮޅުތަކުން ގާދޫކޯ ހުރަސްކޮށް ދަތުރުކުރާ އުޅަނދުފަހަރަށް މާލެއާއި ހުޅުމާލެއާ ދެމެދުގި ގާއިމްކޮށްފައިވާ ބްރިޖް ސަރަހައްދުން ދަތުރުކުރުމަށް އެ ސަރަހައްދު އާންމުކޮށް ހުޅުވާލާފައިވާކަމަށް މިނިސްޓްރީން ވަނީ ބުނެފައެވެ.
މިނިސްޓްރީން އިތުރަށް ބުނީ މިގޮތަށް ވަނުން މަނާކޮށްފައިވާ ސަރަހައްދަކަށް ވަދެފިނަމަ ޖޫރިމަނާކުރެވޭނެ ކަމަށެވެ. އެގޮތުން ދިވެހިރާއްޖޭގެ ކަނޑުގެ ސަރަހައްދުގައި ދުއްވާ ލޯކަލް އުޅަނދުފަހަރު ދުއްވުމުގެ ލައިސަންސާބެހޭ ގަވާއިދުގެ 20 ވަނަ މާއްދާގެ (ށ) ގެ (23) ގެ ދަށުން އެ ފަރާތެއްގެ ލައިސަންސް 1 މަސްދުވަހަކަށް ހިފެހެއްޓޭނެ ކަމަށް މިނިސްޓްރީން ބުނެފައިވެއެވެ.
ގްރޭޓަރ މާލެ ކަނެކްޓިވިޓީ ޕްރޮޖެކްޓަކީ ރާއްޖޭގައި މިހާތަނަށް ކުރިއަށްގެންދާ އުމްރާނީ ތަރައްޤީގެ އެންމެ ބޮޑު ޕްރޮޖެކްޓެވެ. މި މަސައްކަތް ކުރިއަށްގެންދަނީ އިންޑިއާގެ އެފްކޮންސް ކުންފުންޏާ ހަވާލު ކޮށްގެންނެވެ.
