އޭނާ އަކީ އަދި ވެސް ޗެލްސީގެ ވަރުގަދަ ސަޕޯޓަރެއް ކަމަށާއި، ނަމަވެސް ދެ ވަނަ ފަހަރަށް އެ ކުލަބަށް ދާން ބޭނުންނުވާ ކަމަށް ރެއާލް މެޑްރިޑުގެ ކޯޗު ކާލޯ އަންޗެލޮޓީ ބުނެފި އެވެ.
އަންޗެލޮޓީ މިހެން ބުނީ މި ސީޒަންގެ ޔުއެފާ ޗެމްޕިއަންސް ލީގުގެ ކުއާޓާ ފައިނަލްގެ ފުރަތަމަ ލެގުގައި ޗެލްސީގެ ދަނޑުގައި އެ ޓީމާ ދެކޮޅަށް ނުކުންނަ މެޗުގެ ކުރިން އޮތް ޕްރެސް ކޮންފަރެންސްގަ އެވެ. އުމުރުން މިހާރު 63 އަހަރުވެފައިވާ އަންޗެލޮޓީ ވަނި މީގެ ކުރިން 2009 އިން 2011 އަށް ޗެލްސީއަށް ކޯޗުކަން ކޮށްދީފަ އެވެ. އެ މުއްދަތުގައި އޭނާ ވަނީ އެކުލަބާއެކު އިނގިރޭސި ޕްރިމިއާ ލީގާއި، އެފްއޭ ކަޕް އަދި ކޮމިއުނީޓީ ޝީލްޑެއް ކާމިޔާބުކޮށްފަ އެވެ.
އަންޗެލޮޓީ ބުނީ، ޗެލްސީ އާއި މިހާރު ވެސް އެ ކުލަބުގައި މަސައްކަތް ކުރާ މީހުންނާއެކު އޭނާގެ އޮންނާނީ ވަރަށް ފުރިހަމަ ހަނދާންތަކެއް ކަމަށެވެ. އަދި އޭނާ އަކީ ޗެލްސީގެ ސަޕޯޓަރެއް ކަމަށާއި، އެ ކުލަބުގައި ހޭދަކުރި ދެ އަހަރު ދިޔައީ ވަރަށް ރަނގަޅަށް، އޮމާންކަމާއެކު ކަމަށެވެ. އެނބުރި ގޮސްދާނެތޯ ކުރެވޭ ސުވާލުތަކަށް އަންޗެލޮޓީ ބުނީ އެކަމެއް ނުވާނެ ކަމަށެވެ. އެއާއެކު އޭނާ ބުނީ ޗެލްސީއާއެކު ފްރޭންކް ލަމްޕާޑަށް ކާމިޔާބު މަސައްކަތްތަކެއް ކުރެވޭނެ ކަމަށް ޤަބޫލު ކުރާ ކަމަށާއި، ކާމިޔާބީތައް ވެސް ހޯދޭނެ ކަމަށެވެ. އަދި މިހާރު އޭނާގެ މަސައްކަތް އޮތީ ރެއާލްގައި ކަމަށެވެ. އަދި ރެއާލަކީ ރަނގަޅަށް މަސައްކަތް ކޮށްފައިވާ ޓީމެއް ކަމަށާއި، މި ސީޒަންގެ ކޮޕަ ޑެލް ރޭ މުބާރާތް ކާމިޔާބު ކުރެވިއްޖެ ނަމަ، ދެ ސީޒަންގެ ތެރޭ ވާދަކުރެވޭ ހުރިހާ ތައްޓެއް ކާމިޔާބު ކުރެވުނީ ކަމަށެވެ. މީގެ އިތުރުން އޭނާ ބުނީ ބައެއް ފަހަރު ކުލަބުތަކުގެ އުމުރު ހުސްވާއިރު ވެސް އެކަން ކާމިޔާބު ނުވެ ވެސްދާ ކަމަށެވެ.
މީގެ އިތުރުން އަންޗެލޮޓީ ބުނީ ޗެލްސީ މެޗަށް ފެޑަރިކޯ ވަލްވާޑޭ ފުރިހަމަ އަށް ތައްޔާރު ކަމަށެވެ. އެގޮތުން ރެއާލުން ކުރިއަށް ގެންދިޔަ ފަރިތަކުރުންތަކުގައި ވެސް ވަލްވާޑޭ ފެނުނީ ވަރަށް ރަނގަޅަށް މަސައްކަތް ކުރާ މަންޒަރު ކަމަށާއި، އޭނާ ހުރީ ވަރަށް ބޮޑު އިތުބާރެެއްގައި ކަމަށެވެ. އޭނާ ބުނީ ކުރިން ކަންތައްވީ ގޮތުގެ ވާހަކަ ދައްކަން ބޭނުންނުވާ ކަމަށާއި، ޗެލްސީ މެޗުގައި ވަލްވާޑޭ ތަފާތު ދައްކާނެ ކަމުގެ ޔަޤީންކަން އޮތް ކަމަށެވެ. އަދި ދެ ވަނަ ލެގު އަމިއްލަ ދަނޑުގައި އޮތުމަކީ ވެސް ލިބޭ ހިތްހަމަޖެހުމެއް ކަމަށެވެ. އޭނާ ފާހަގަ ކުރި ގޮތުގައި ރެއާލްގެ އެންމެހައި ކުޅުންތެރިން ތިބީ މެޗަށް ފުރިހަމަ އަށް ތައްޔާރަށެވެ.
ޗެލްސީ އާއި ރެއާލް ވާދަކުރާ މެޗު ފަށާނީ ބުދަ ދުވަހުގެ ރޭ ދަންވަރު ރާއްޖެ ގަޑިން 12 ޖަހާއިރު އެވެ.
