ރާއްޖެ އާއި ޕާކިސްތާނާއި ދެމެދު ވައިގެ މަގުން ސީދާ ދަތުރު ތައް ކުރުމާއި ގުޅޭގޮތުން މަޝްވަރާކޮށްފިއެވެ.
ރާއްޖެ އާއި ޕާކިސްތާނާއި ދެމެދު ވައިގެ ދަތުފަތުރުގެ ގުޅުން ޤާއިމްކުރުމާއި މެދު ކުރިއަށް ދިޔަ މަޝްވަރާތައް ބާއްވާ ފައި ވަނީ އާދިއްތަ ދުވަހުއެވެ. އާދިއްތަ ދުވަހު ޕާކިސްތާން ސަރުކާރުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު ވައިސް އެޑްމިރަލް (ރިޓަޔާޑް) މުހައްމަދު ފައްޔާޒް ގިލާނީ، ނައިބް ރައީސް ފައިސަލް ނަސީމްގެ އަރިހަށް ކުރެއްވި ޒިޔާރަތުގައި އެ ދެބޭފުޅުން ވަނީ މިކަމާއި މެދު މަޝްވަރާކުރައްވާފައެވެ.
ރައީސުލްޖުމްހޫރިއްޔާގެ އޮފީހުގައި އާދިއްތަ ދުވަހުގެ މެންދުރުކުރީގެ ވަގުތެއްގައި ކުރިއަށް ދިޔަ މި ބައްދަލުކުރެއްވުމުގައި އެ ދެ ބޭފުޅުން ވަނީ ދެ ގައުމުގެ ދެމެދުގައި ޤާއިމްކޮށްފައިވާ ޒަމާންވީ ގާތް ރަހްމަތްތެރި ގުޅުން ބިނާވެފައިވަނީ ދެ ގައުމުގެ ދެމެދުގައިވާ އެއްގޮތް ކަންކަމާއި، ދެ ގައުމުން ގެންގުޅެމުންދާ އެއްކަހަލަ ގަބޫލުކުރުންތަކުގެ މައްޗަށް ކަމަށް ދެ ބޭފުޅުން ވެސް ވިދާޅުވިއެވެ. އަދި ދެ ޤައުމުގެ އުސޫލުތަކުގެ މައްޗަށް ވެސް އެ ގުޅުން ބަރޯސާވާ ކަމަށް އެ ދެ ބޭފުޅުން ވަނީ ވިދާޅުވެފައެވެ.
އެ ބައްދަލުވުމުގައި އިތުރަށް ކުރެއްވި މަޝްވަރާގެ ތެރޭގައި ނައިބް ރައީސް ފައިސަލް އާއި ޕާކިސްތާނުގެ ސަފީރު ވަނީ ދެ ގައުމުގެ ގުޅުން އިތުރަށް ބަދަހިކުރެއްވުމާ ބެހޭގޮތުން މަޝްވަރާކުރައްވާފަ އެވެ. އެގޮތުން ރާއްޖެއާއި ޕާކިސްތާނާ ދެ ގައުމުގެ ދެމެދުގައި ސީދާ ވައިގެ ދަތުރުފަތުރުގެ ގުޅުން ގާއިމުކުރުމާއި، ފަތުރުވެރިކަމާއި ސަގާފީ ދާއިރާއިންނާއި، ކުޅިވަރުގެ ދާއިރާއިންނާއި، ތައުލީމާއި ތަމްރީންގެ ދާއިރާއިން ދެ ގައުމުގެ ގުޅުން ބަދަހިކުރުމަށް މަޝްވަރާކުރެއްވާފައިވެއެވެ.
މީގެ އިތުރުން ދެ ގައުމުގެ ދެމެދުގައި މަޝްވާރާތައް ކުރަމުންދާ އެމްއޯޔޫތައް އަވަހަށް ނިންމުމާއި މެދު މަޝްވަރާކުރައްވާފައެވެ. މީގެ އިތުރުން އެ ބައްދަލުކުރެއްވުމުގައި ނައިބް ރައީސް ވަނީ ޕާކިސްތާނަށް ކުރިމަތިވި ފެންބޮޑުވުމުގެ ހާލަތުގެ މައުލޫމާތު ވެސް އޮޅުންފިލުއްވާފަ އެވެ.
ދިވެހިރާއްޖެއިން ޕާކިސްތާނާ ސިޔާސީ ގުޅުން ގާއިމުކޮށްފައިވަނީ ޖުލައި 26، 1966 ގައެވެ.
