ރާއްޖޭގެ 16 އަހަރުން ދަށުގެ ޤައުމީ ކްރިކެޓް ޓީމުން ޖާގަ ހޯދުމަށް ފުވައްމުލަކު ކުޅުންތެރިންނަށް ޚާއްޞަ ފުރުޞަތެއް ކްރިކެޓް ބޯޑުން ހުޅުވާލައިފިއެވެ.

ކްރިކެޓް ބޯޑުން ހުޅުވާލީ 16 އަހަރުން ދަށުގެ ޓީމަށް ކުޅުންތެރިން ނެގުމަށް ބާއްވާ ޚާއްޞަ ޓްރަޔަލްއެއް ފުވައްމުލަކުގައި ބާއްވަން ނިންމައިގެންނެވެ. ފުވައްމުލަކުގައި ޓްރަޔަލް ބާއްވާނީ އަންނަ އާދުއްތަ ދުވަހު ހަވީރު 5-7 އަށެވެ. ޓްރަޔަލްގައި ބައިވެރިވާން ބޭނުންވާ ކުދިން ގުޅުމަށް ޚާއްޞަ ނަމްބަރެއްވެސް ވަނީ ކަނޑައަޅާފައެވެ. އެއީ 9648183 އެވެ. ފުވައްމުލަކަކީ ކްރިކެޓް ބޯޑުން ޚާއްޞަ ސަމާލުކަމެއް ދީގެން ކްރިކެޓްގެ ހުނަރުތައް ތަރައްޤީކުރަމުން އަންނަ ސިޓީއެކެވެ. އެސިޓީގައި ޑިވެޕޮލްމަންޓް ޕްރޮގްރާމްތައްވެސް އަންނަނީ ހިންގަމުންނެވެ.

ފުވައްމުލަކު ކުޅުންތެރިންނަށް ޚާއްޞަ ފުރުޞަތެއް ދިންނަމަވެސް އެހެން ކުޅުންތެރިންނަށްވެސް 16 އަހަރުން ދަށުގެ ޓީމަށް ހޮވުމުގެ ފުރުޞަތު އެބައޮތެވެ. އާދިއްތަ ދުވަހު ހަވީރު މާލޭގައިވެސް ކްރިކެޓް ބޯޑުން ޓްރަޔަލް ކުރިއަށް ގެންދާނެއެވެ. މާލެއިން ބައިވެރިވާ ކުދިން މައުލޫމާތު ސާފްކުރުމަށް ގުޅުމަށް ކްރިކެޓް ބޯޑުން ކަނޑައަޅާފައިވާ ނަމްބަރަކީ 7774761 އެވެ.

ކްރިކެޓް ބޯޑުން 16 އަހަރުން ދަށުގެ ޓީމަށް ކުދިން ނެގުމަށް ޓްރަޔަލް ބާއްވަނީ މޭމަހު އޮންނަ އޭޝިޔަން ކްރިކެޓް ކައުންސިލް ޗެލެންޖް ކަޕަށެވެ.