މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ ހަވާލުކޮށްގެން ތ. ބުރުނީގައި ކުރިއަށްގެންދާ ދެ މަޝްރޫއުގެ މަސައްކަތް ވެސް ހަވާލުކޮށްފައިވާ މުއްދަތުގެ ކުރިން ނިންމާލެވޭނެ ކަމަށް އެ ކުންފުނީގެ ސީއީއޯ އާދަމް އާޒިމް ވިދާޅުވެއްޖެެއެވެ.

އާޒިމް މިފަދައިން ވިދާޅުވީ ތ. އަތޮޅުގައި ކުރިއަށްގެންދާ މަޝްރޫއުތައް ބައްލަވާލެއްވުމަށް ކުރެއްވި ދަތުރުފުޅުގައި ބުރުނީއަށް ވަޑައިގެންނެވެ. އެގޮތުން، އެ ރަށުގައި މިވަގުތު އެމްޓީސީސީން ބަނދަރު ތަރައްގީ ކުރުމާއި ގޮނޑުދޮށް ހިމާޔަތް ކުރުމުގެ މަސައްކަތް ކުރިއަށްގެންދާއިރު ދެ މަޝްރޫއުގެ މަސައްކަތް ވެސް ހަލުވި ކަމާއެކު ކުރިއަށްދާކަން އޭނާ ފާހަގަކުރެއްވިއެވެ.

އާޒިމް ވިދާޅުވީ އެންމެ ފުރަތަމަ އެ ކުންފުންޏާ ހަވާލު ކުރީ އެ ރަށުގެ ގޮނޑުދޮށް ހިމާޔަތް ކުރުމުގެ މަސައްކަތް ކަމަށާއި އެ މަސައްކަތުގެ ގާތްގަނޑަކަށް 50 އިންސައްތަ މިހާރު ނިމިފައިވާ ކަމަށެވެ. އަދި ބަނދަރު ތަރައްގީ ކުރުމުގެ މަޝްރޫއުގެ ދަށުން މިހާރު ކުރިއަށްދަނީ އާއިއައޭގެ މަސައްކަތް ކަމަށް ވެސް އޭނާ ވިދާޅުވިއެވެ.

މިހާރު މަސައްކަތް ރާވާފައި އޮތް ގޮތް ކިޔައިދެއްވަމުން އާޒިމް ވިދާޅުވީ ގޮނޑުދޮށް ހިމާޔަތް ކުރުމުގެ 1600 ފޫޓުގެ މަސައްކަތް ނިންމާލުމަށްފަހު ބަނދަރުގެ މަސައްކަތް ކުރާ ގޮތަށް ހަމަޖެހިފައިވާ ކަމަށެވެ. ނަމަވެސް އޭގެ ކުރިން އީއައިއޭ ނިމިއްޖެނަމަ ބަނދަރުގެ އަމަލީ މަސައްކަތް ވެސް ފެށިގެން ކުރިއަށްދާނެ ކަމަށް އޭނާ ވިދާޅުވިއެވެ.

އާޒިމް ވިދާޅުވި ގޮތުގައި ބުރުނީގެ ގޮނޑުދޮށް ހިމާޔަތް ކުރުމުގެ މަސައްކަތް އަންނަ މެއި މަހުގެ ނިޔަލަށް ނިންމާލެވޭނެއެވެ. އަދި ބަނދަރު ތަރައްގީ ކުރުމުގެ މަސައްކަތް އަންނަ އޮގަސްޓް މަހުގެ ނިޔަލަށް ނިންމާލެވޭނެއެވެ.

އެމްޓީސީސީން ބުރުނީގައި ހިންގާ ދެ މަޝްރޫއަށް ގާތްގަނޑަކަށް 77 މިލިއަން ރުފިޔާ އަރައެވެ.

ބުރުނީ ބަނދަރު ތަރައްގީ ކުރުމުގެ މަޝްރޫއު ދަށުން 20،100 ކިއުބިކް މީޓަރުގެ ސަރަހައްދެއްގެ އާ ހާބަރު ބޭސިން ފުންކުރުމާއި ކުރިން ފުންކޮށްފައިވާ ފަޅުގެ 9،800 ކިއުބިކް މީޓަރު ސަރަހައްދެއް އަލުން ފުންކުރުމާއި 8،400 ކިއުބިކް މީޓަރުގެ ސަރަހައްދެއްގެ ނެރު ފުންކުރުމާއި 374 މީޓަރުގެ ސަރަހައްދެއްގައި ބޭރުތޮށި ލުން ހިމެނެއެވެ. އަދި 181 މީޓަރުގެ ސަރަހައްދެއްގައި ރިވެޓްމެންޓެއް ޖެހުމާއި 276 މީޓަރުގެ ސަރަހައްދެއްގައި އެއްގަމުތޮށި ލުމާއި ރޭމްޕެއް ހެދުމާއި ކޮންކްރީޓް ބްރިޖެއް ހެދުމާއި 2،578 އަކަ މީޓަރުގެ ސަރަހައްދެއްގައި ޕޭވްމަންޓް ހެދުމާއި ބަނދަރު ބައްތި އަދި ނެރު ބައްތި ހަރުކުރުމުގެ މަސައްކަތް ވެސް ހިމެނެއެވެ.

މީގެ އިތުރުން އެ ރަށުގެ ގޮނޑުދޮށް ހިމާޔަތް ކުރުމުގެ މަސައްކަތުގެ ދަށުން، 21,181.80 ކިއުބިކް މީޓަރުގެ ވެލި، ގިރާ ސަރަޙައްދަށް އަޅައި، 220 މީޓަރު ރިވެޓްމެންޓް ޖަހާނެއެވެ. އަދި 369 މީޓަރު ބޭރުތޮށި ލުމުގެ މަސައްކަތް ވެސް މި މަޝްރޫއުގެ ތެރޭގައި ހިމެނެއެވެ.