އިންޓަ ސްކޫލް 15 އަހަރުން ދަށުގެ ފުޓުބޯޅަ މުބާރާތުގެ ގްރޫޕް ސީ ގެ ފަހު މެޗުގައި ޖަމާލުއްދީން ސްކޫލް އިން ޣާޒީ ސްކޫލް ބަލިކޮށްފި އެވެ.

އަންގާރަ ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު ޖަމާލުއްދީނުން ކާމިޔާބު ކުރީ 3-1 އިންނެވެ. މެޗުގައި ފުރަތަމަ ލަނޑު ޖަހައި ލީޑު ނެގީ ވެސް ޖަމާލުއްދީނުންނެވެ. މެޗު ފަށައިގެން ދެ ވަނަ މިނެޓުގައި އެ ޓީމަށް ލީޑު ނަގައިދިނީ އަލީ އަލާން އެވެ. އޭގެ ތިން މިނެޓު ފަހުން އެ ޓީމުގެ ލީޑު ފުޅާކޮށްދިނީ މުޙައްމަދު މިސަލް އެވެ. އޭގެ ފަހުން މެޗުގެ 19 ވަނަ މިނެޓުގައި ޣާޒީގެ ޖުމާން ޢަބްދުﷲ ވަނީ އެ ޓީމަށް ލަނޑެއް ޖަހައިދިނީ އުންމީދެއް ހޯދައިދީފަ އެވެ. މެޗުން ޖަމާލުއްދީނަށް ތިން ޕޮއިންޓު ކަށަވަރުކޮށްދިނީ 51 ވަނަ މިނެޓުގައި ކައިލް އަޙުމަދު ޝިނާޒް އެވެ.

މިއީ މުބާރާތުގައި ޣާޒީގެ ފުރަތަމަ ބައްޔެވެ. އެ ޓީމު ކުޅުނު ފުރަތަމަ މެޗު ވަނީ އެއްވަރުވެފަ އެވެ. ދެ ވަނަ މެޗުން މޮޅުވި ނަމަވެސް ފަހު މެޗުން ބަލިވީ އެވެ. މުބާރާތުގައި ޖަމާލުއްދީން ކުޅުނު ތިން މެޗުގެ ތެރެއިން ވަނީ ދެ މެޗުން މޮޅުވެ، އެއް މެޗުން ބަލިވެފަ އެވެ. އެ ޓީމު ބަލިވީ މި ގްރޫޕްގެ އެއް ވަނަ ހޯދި ތާޖުއްދީން އަތުންނެވެ. ދެ ވަނަ ލިބެނީ ވެސް ޖަމާލުއްދީނަށެވެ.