ބެސްޓް ފީފާ އެވޯޑްގައި މޮޅު ކުޅުންތެރިޔާގެ އެވޯޑަށް ރެއާލް މެޑްރިޑްގެ އޮސްޓްރިއާ ޑިފެންޑަރ ޑޭވިޑް އަލަބާ ވޯޓް ދިނީ އާޖެންޓީނާގެ ކެޕްޓަން ލަޔަނަލް މެސީއަށެވެ. އޭނާގެ ޓީމް ކެޕްޓަން ބެންޒިމާއަށް އެއްވަނަ ވޯޓްނުދީ މެސީއަށް ދިނުމަށް އަލަބާއަށް ރެއާލްގެ ސަޕޯޓަރުންގެ ނުރުހުން ވަނީ އަމާޒުވެފައެވެެ.
އަލަބާ އައުޓް ހޭޝްޓްގް ސޯޝަލް މީޑިޔާގައި އަންނަނީ ދައުރުކުރަމުންނެވެ. އެކަމާ ގުޅިގެން އަލަބާ ވަނީ މެސީއަށް ވޯޓް ދިން ސަބަބު ސާފްކޮށްދީފައެވެ. އޭނާ ބުނީ އެއީ އަމިއްލަ ނިންމުމެއް ނޫންކަމަށާއި, ޓީމް ނިންމުމެއްކަމަށެވެ.
މިއެވޯޑަށް ވޯޓްދިނީ އޮސްޓްރިއާ ޓީމުން. މެސީއަށް ވޯޓް ދިނުމަކީ ޓީމް ނިންމުމެއް. އެއީ އަހަރެންގެ އެކަނި ނިންމުމެއްނޫން.ޑޭވިޑް އަލަބާ/ އޮސްޓްރިއާ ޤައުމީ ޓީމްގެ ކެޕްޓަން
މޮޅު ކުޅުންތެރިޔާއާއި ކޯޗަށް ވޯޓްދިނުމުގެ ފުރުޞަތު ޤައުމީ ޓީމްގެ ކެޕްޓަނުންގެ އިތުރުން ކުޅިވަރު ނޫސްވެރިންނަށް ދެއެވެ. އޮސްޓްރިއާ ކެޕްޓަންގެ ހައިސިއްޔަތުން އަލަބާގެ ފުރަތަމަ ވޯޓް ދިނީ މެސީއަށެވެ. ދެވަނަ ވޯޓް ދިނީ ބެންޒެމާއަށެވެ. އަދި ތިންވަނަ ވޯޓް އެމްބާޕޭއަށެވެ. އެކަމަކު އަލަބާ ބުނީ އޭނާގެ އަމިއްލަ ނަޒަރުގައި އެންމެ މޮޅު ފޯވާޑަކީ ބެންޒެމާ ކަމަށެވެ. އެއީ ސުވާލެއް އޮތްކަމެއް ނޫންކަމަށާއި, ބެންޒެމާގެ ފަރާތުން ހިތްވަރު ހޯދާކަމަށްވެސް ބުންޏެވެ.
2021 ވަނަ އަހަރު ބަޔާން ދޫކޮށް, ރެއާލްއަށް ބަދަލުވި ފަހުން އަލަބާ ކުޅެމުން އަންނަނީ ބެންޒެމާއާއެކުއެވެ. ފީފާގެ މޮޅު ކުޅުންތެރިޔާގެ އެވޯޑް ލިބުނީ އަލަބާ ވޯޓް ދިން މެސީއަށެވެ.
