މިހާރު ކުރިއަށްދާ އިންޓަ ސްކޫލް 15 އަހަރުން ދަށުގެ ފުޓުބޯޅަ މުބާރާތުގެ ގްރޫޕް ސްޓޭޖުގައި ކުޅުނު ތިން ވަނަ މެޗުން ވެސް އިމާދުއްދީން ސްކޫލް މޮޅުވެއްޖެ އެވެ.
ގްރޫޕް ބީ ގައި ހޯމަ ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗު އިމާދުއްދީނުން ކާމިޔާބު ކުރީ ހުރަވީއާ ވާާދަކޮށް 3-0 އިންނެވެ. މެޗުގައި އިމާދުއްދީނަށް ލަނޑު ޖަހައި ފުރަތަމަ ލީޑު ނަގައިދިނީ 40 ވަނަ މިނެޓުގައި އަޙުމަދު މަންހާލް އާޒިމް އެވެ. އޭގެ ނުވަ މިނެޓު ފަހުން އެ ޓީމުގެ ދެ ވަނަ ލަނޑު ޖަހައިދިނީ އާދަމް ހުމާމް ޞާބިރު އެވެ. އިމާދުއްދީންގެ ފަހު ލަނޑު މެޗުގެ ފުރިހަމަ ވަގުތު ހަމަވެ އިތުރަށް ދެއްކި މިނެޓުގައި ޖެހީ މުޙައްމަދު އިނާން އެވެ. ގްރޫޕް ސްޓޭޖުގައި މީގެ ކުރިން އިމާދުއްދީނުން ފިންލެންޑް އިންޓަނޭޝަނަލްސް ސްކޫލާއި، ގުރައިދޫ ސްކޫލާ ދެކޮޅަށް ކުޅުނު މެޗު ވެސް ވަނީ ކާމިޔާބުކޮށްފަ އެވެ.
މި ގްރޫޕްގެ އެއް ވަނައިގައި އިމާދުއްދީނުން އޮތީ ކުޅުނު ތިން މެޗުން ނުވަ ޕޮއިންޓު ހޯދައިގެންނެވެ.
