އިންޓަ ސްކޫލް 15 އަހަރުން ދަށުގެ ފުޓުބޯޅަ މުބާރާތުގައި ހުރަވީ ސްކޫލާ ދެކޮޅަށް ކުޅުނު މެޗުން މޮޅުވެ، ގުރައިދޫ އިން އުންމީދެއް ހޯދައިފި އެވެ.

ބުދަ ދުވަހުގެ ރޭ ގަލޮޅު ރަސްމީ ދަނޑުގައި ހުރަވީއާ ދެކޮޅަށް ނުކުތްއިރު ގުރައިދޫ ވަނީ ފުރަތަމަ މެޗުގައި ބަލިވެފަ އެވެ. އެހެންކަމުން ގްރޫޕް ސްޓޭޖު ފަހަނައަޅާ ދިޔުމަށް ގުރައިދޫއަށް މުހިންމުވި މެޗު އެ ޓީމުން ކާމިޔާބު ކުރީ 4-0 އިންނެވެ. މެޗުގެ 15 ވަނަ މިނެޓުގައި ގުރައިދޫ އަށް ލީޑު ނަގައިދިނީ މުޙައްމަދު ޖައިޝް ޖައުދު އެވެ. އޭގެ ފަސް މިނެޓު ފަހުން ޒީކް އަޙުމަދު ޝިހާން ވަނީ އެ ޓީމުގެ ދެ ވަނަ ލަނޑު ޖަހައިފަ އެވެ. މެޗުގެ 27 ވަނަ މިނެޓުގައި ގުރައިދޫގެ ލީޑު އިތުރަށް ފުޅާ ކޮށްދިނީ ނައްވާފް ޢަބްދުﷲ ނަޝީދު އެވެ. ގުރައިދޫގެ ފަހު ލަނޑު މެޗުގެ 59 ވަނަ މިނެޓުގައި ޖެހީ މުޙައްމަދު ޝަޔާން ޝިފާން އެވެ.

މި މެޗާއެކު ގުރައިދޫން ވަނީ ގްރޫޕް ބީ ގައި ދެ މެޗު ކުޅެފަ އެވެ. ދެ މެޗުން އެ ޓީމަށް ލިބެނީ ތިން ޕޮއިންޓެވެ. އެއް ވަނައިގައި އޮތީ ހަ ޕޮއިންޓާއެކު އިމާދުއްދީން ސްކޫލް އެވެ.