އިންޓަ ސްކޫލް 15 އަހަރުން ދަށުގެ ފުޓުބޯޅަ މުބާރާތުގައި އިމާދުއްދީން ސްކޫލް ކުޅުނު ދެ ވަނަ މެޗުގައި ފިންލޭންޑް އިންޓަނޭޝަނަލް ސްކޫލްގެ މައްޗަށް ބޮޑު މޮޅެއް ހޯދައިފި އެވެ.

ގްރޫޕް ބީ ގައި ބުދަ ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗު އިމާދުއްދީނުން ކާމިޔާބު ކުރީ 10-0 އިންނެވެ. މެޗުގެ ފުރަތަމަ ހާފުގައި އިމާދުއްދީނުން ހަތަރު ލަނޑު ޖެހިއިރު، ދެ ވަނަ ހާފުގައި ވަނީ ހަ ލަނޑު ޖަހައިފަ އެވެ. މެޗުގައި އިމާދުއްދީންގެ ލަނޑުތައް ޖެހީ، ދާއިން ޢަބްދުލް ފައްތާޙު އާއި މުޙައްމަދު ލުޖައިން އަންވަރާއި، މުޙައްމަދު ރާހިލް ރަމީޒާއި، އިބްރާހިމް ނައުފް ނަސީމާއި، މުހައްމަދު ހިރާހާއި، މިފްޒާލް ޙުސެއިން ރަޝީދު އަދި އަޙުމަދު މަންހަލް އާޒިމް އެވެ. މީގެ ތެރެއިން މެޗުގައި މޮޅު ކުޅުމެއް ދެއްކި ދާއިން ވަނީ ހަތަރު ލަނޑު ޖަހައިފަ އެވެ. ދެން ކޮންމެ ކުޅުންތެރިޔަކު ޖެހީ އެއް ލަނޑެވެ.

މިއީ މުބާރާތުގެ ގްރޫޕް ސްޓޭޖުގައި އިމާދުއްދީނުން ހޯދި ދެ ވަނަ މޮޅެވެ. ދެ މެޗުން މޮޅުވެ އެ ޓީމަށް ވަނީ މިހާތަނަށް ހަ ޕޮއިންޓު ލިބިފަ އެވެ. މި ވަގުތު ގްރޫޕް ބީގެ އެއް ވަނައިގައި އޮތީ ވެސް އެ ޓީމެވެ.