ސައުދީ ރަސްގެފާނު ސަލްމާން ބިން އަބްދުލް އަޒީޒް އަލް ސައުދު ކަލާންގެއާއި އެއްފަދަކުރި ނޫސްވެރިއަކު ސަސްޕެންޑުކޮށްފިއެވެ.

ސަސްޕެންޑުކޮށްފައިވަނީ ސައުދީގެ އަލް ޖަޒީރާ ނޫހުގެ ނޫސްވެރިޔާ، ރަމަޟާން އަލް އެނައިޒީއެވެ. އެނައިޒީ ސަސްޕެންޑުކޮށްފައިވަނީ ހުކުރު ދުވަހު އެ ނޫހުގެ ވެބްސައިޓުގައި ޝާއިއުކުރި ލިޔުމަކާއި ގުޅިގެންނެވެ. އެނައިޒީ ސަސްޕެންޑްކޮށްފައިވަނީ ސީދާ ސަލްމާން ރަސްގެފާނުގެ އެދިވަޑައިގަތުމުގެ މަތިންނެވެ.

ރަސްގެފާނު ސަލްމާން، ސައުދީގެ އިންފޮމޭޝަން މިނިސްޓަރު އަވަދް ބިން ޞާލިހް އަލް އަވަދަށް ފޮނުއްވެވި ސިޓީފުޅެއްގައި ވިދާޅުވެފައިވަނީ ލިޔުމުގެ ސުރުޙީ ފެނިވަޑައިގަތުމުން ރަސްގެފާނު ހައިރާންވެވަޑައިގަތް ކަމަށާއި، ލިޔުމުގައި ހުރި ބައެއް ބަސްތަކަކީ ބަލައިގެންނެވޭނެ ބަސްތަކެއް ނޫން ކަމަށެވެ. އަދި ލިޔުމުގައި ރަސްގެފާނު ސަލްމާން، މާތް ރަްކަލާންގެއާއި، ކީރިތި ރަސޫލާ صلى الله عليه وعلى آله وسلم އާއި އެއްފަދަކޮށް ސިފަކޮށްފައިވާ ކަމަށެވެ.

މިކަހަލަ ކަންތައްތަކަކީ އެއްވެސް ހާލެއްގައި ބަލައިގަނެވޭނެ ކަންތައްތައް ނޫން ކަމަށާއި މިކަހަލަ މައްސަލަތައް އަޅާނުލައި ދޫކޮށްލައިފިނަމަ މިކަމުން ނިކުމެގެންދާނެ ނަތީޖާ ވަރަށް ރަގަޅަށް އެގިވަޑައިގަންނަވާކަމަށްވެސް ރަސްގެފާނު ވަނީ ވިދާޅުވެފައެވެ.  

ރަސްގެފާނު ސަލްމާން އިތުރަށް ވިދާޅުވީ މިކަހަލަ ލިޔުމެއް ޝާއިއުކުރުމުގެ ހުއްދަ ސައުދީގެ އަލްޖަޒީރާ ނޫހުން ދީފައިވާތީ، އެ ކުންފުންޏާއި މެދުވެސް ފިޔަވަޅު އަޅުއްވާނެކަމަށެވެ. އަދި މިކަމުގެ ސީރިއަސްކަމާއި، ކަމުގައި ހުރި ނުރައްކާތެރިކަން އެގިވަޑައިގަންނަވާތީ މިކަމާއި އަޅާނުލައްވައި ދޫކޮށްލެއްވެން ނެތް ކަމަށެވެ.

ސައުދީގެ އަލް ޖަޒީރާ ނޫހަކީ ޤަތަރުގެ މަޝްޙޫރު އަލްޖަޒީރާ ނޫސް އޭޖެންސީއާއި ގުޅުމެއް އޮންނަ ނޫހެއް ނޫނެވެ.