އަށް ޤައުމެއްގެ ސަރުކާރުން ރާއްޖެއަށް ކަނޑައަޅުއްވާފައިވާ އައު ސަފީރުން އެ ބޭފުޅުންގެ ސަފީރުކަމުގެ ފަތްކޮޅު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހަށް އަރުވައިފިއެވެ.
ރައީސް އޮފީހުން ބުނެފައިވާ ގޮތުގައި ފަތްކޮޅު އަރުވައިފައިވަނީ މޮންގޯލިއާ، ފްރާންސް، ރަޝިއާ، ސަރބިއާ، ސްލޮވީނިއާ، ނެމީބިއާ، ކެނެޑާ އަދި ދި ހެލެނިކް ރިޕަބްލިކް ސަރުކާރުން، ރާއްޖެއަށް ކަނޑައެޅުއްވި އައު ސަފީރުންނެވެ. މި ރަސްމިއްޔާތު ބާއްވާފައިވަނީ އާދީއްތަ ދުވަހުގެ ހެނދުނު ރައީސުލްޖުމްހޫރިއްޔާގެ އޮފީހުގައެވެ.
ރައީސަށް ފަތްކޮޅު އެރުވި 8 ޤައުމުގެ ސަފީރުންނަކީ، މޮންގޯލިއާ ސަރުކާރުން ކަނޑައެޅުއްވި އައު ސަފީރު ގަންބޯލްޑް ޑަމްބަވް، އާއި ފްރާންސް ސަރުކާރުން ކަނޑައެޅުއްވި އައު ސަފީރު ޖޯން-ފްރަންސުއާ ޕަކްތެތް އާއި ރަޝިއާ ސަރުކާރުން ކަނޑައެޅުއްވި އައު ސަފީރު ލިވަން އެސް ޖަގަރްޔަން އާއި ސާރބިއާ ސަރުކާރުން ކަނޑައެޅުއްވި އައު ސަފީރު ސިނިސާ ޕަވިޗް އާއި ހެލެނިކް ރިޕަބްލިކް ސަރުކާރުން ކަނޑައެޅުއްވި އައު ސަފީރު ދިމިޓްރިއޮސް އިޔޮއަންނޫ އާއި ސްލޮވޭނިއާ ސަރުކާރުން ކަނޑައެޅުއްވި އައު ސަފީރު މަތާޔާ ވޮޑެބް ގޯޝް، އާއި ނެމީބިއާ ސަރުކާރުން ކަނޑައެޅުއްވި އައު ސަފީރު ގެބްރިއެލް ޕީ. ސިނިމްބޯ، އަދި ކެނެޑާ ސަރުކާރުން ކަނޑައެޅުއްވި އައު ސަފީރު އެރިކް ވޯލްޝްއެވެ.
މި ރަސްމިއްޔާތުގައި ރައީސް ދެއްކެވި ވާހަކަފުޅުގައި، ރާއްޖެއާއި އެހެން ޤައުމުތަކުގެ ގުޅުން އިތުރަށް ބަދަހިކޮށް ދެމެހެއްޓުމުގައި ސަފީރުން އަދާކުރައްވާ މުހިންމު ދައުރު ފާހަގަކުރެއްވިއެވެ. އަދި ވޭތުވެދިޔަ ހަތަރު އަހަރުގެ ތެރޭގައި މި ސަރުކާރުން ރައްޔިތުންގެ ތަރައްޤީގެ އުންމީދުތައް ހަޤީޤަތަކަށް ހަދައިދެވިފައިވާކަމަށާއި، އެކަން ހާސިލްކުރުމުގައި ބައިނަލްއަޤުވާމީ އެހީތެރިކަމާއި އެއްބާރުލުން ހޯދުމުގައި ރާއްޖޭގެ ޚާރިޖީ ސިޔާސަތު ބިނާކޮށްފައި ވަނީ އިންސާނީ ޙައްޤުތައް ކުރިއަރުވައި ޙިމާޔަތްކުރުމާއި ޑިމޮކްރަސީ ހަރުދަނާކުރުމާއި އަދި މޫސުމާގުޅޭ ސިޔާސަތުތައް ކުރިއެރުވުން، މިތިން އަސާސްގެ މައްޗަށް ކަމުގައި އެމަނިކުފާނު ވިދާޅުވިއެވެ.
މީގެ އިތުރުން ކޮވިޑް-19އާ ގުޅިގެން ރާއްޖޭގެ އިގުތިސާދަށް ކުރާ ނޭދެވޭ އަސަރުތައް ކުޑަކުރުމަށްޓަކައި ސަރުކާރުގެ މާލީ ސިޔާސަތުތަކަށް ގެންނަމުންދާ ބަދަލުތަކުގެ މައްޗަށްވެސް އެމަނިކުފާނު އަލިއަޅުއްވާލެއްވިއެވެ. އަދި ރައީސް ދެއްކެވި ވާހަކަފުޅުގައި، ދަތުރުފަތުރުކުރުމުގައި ލުއިފަސޭވުމަކީ ސަގާފީ ގުޅުންތަކާއި އިގްތިސާދީ ގުޅުން ބަދަހިކުރުމަށް ހިތްވަރު ލިބި ސުލްހަމަސަލަސްކަމާއި، ތަނަވަސްކަމާއި، ކުރިއެރުވުމަށް ވާސިލްވެވޭނެ ފާލަމެއްކަމުގައި ވިދާޅުވިއެވެ.
ރާއްޖެއިން އެހެން ޤައުމުތަކަށް އޮން އެރައިވަލް ވިސާ ދެމުން އަންނަ ކަމަށާއި އެޤައުމުތަކުންވެސް ދިވެހިންނަށް ދަތުރުފަތުރުކުރުމުގައި ލުއިގޮތްތައް ހަމަޖައްސައިދެއްވާނެ ކަމަށް އުއްމީދު ކުރައްވާކަމުގައި ވެސް ރައީސް ވިދާޅުވިއެވެ.
މިރަސްމިއްޔާތުގައި ރައީސް ދެއްކެވި ވާހަކަފުޅު ނިންމަވާލެއްވީ، ރާއްޖެއާއި ޤައުމުތަކުގެ މެދުގައި އޮތް ގުޅުން، އައު ސަފީރުންގެ ދައުރުގައި އިތުރަށް ބަދަހިވެގެންދާނެކަމަށް އުއްމީދުކުރައްވާކަމުގައި ވިދާޅުވަމުންނެވެ.
