އަމީނީ މަގުގައި ތާރު އަޅަން ފެށުމާއެކު އެ ސަރަހައްދުގެ ރައްޔިތުންގެ ފަރާތުން ޚާއްސަ ބޮނޑިބަތް ކެއުމެއް ބާއްވައިފިއެވެ.
މި ކެއުން އިންތިޒާމްކުރި ފަރާތުން ބުނީ މިކަމަށް ހިސާބުގަނޑުގެ އެންމެންގެ އެއްބާރުލުން ލިބުނުކަމަށެވެ.
އެމްޓީސީސީ، އާރްޑީސީ އަދި ސަރުކާރުން މިހާ ބޮޑު މަސައްކަތެއްކޮށް ނިންމާތީ، އެކަމަށް ޝުކުރުވެރިވާ ކަމަށާއި މި ކެއުމުންވެސް ދައްކައިދެނީ އެ ހިސާބުގެ ރައްޔިތުން ސަރުކާރާއެކު ތިބިކަން ކަމަށް ބުންޏެވެ.
އަމީނީ މަގުގެ މަޝްރޫއު ނިމުމުން އެކަމުގެ ފައިދާ ވިޔަފާރިވެރިންނަށް ކުރާނެކަމަށާއި ވަރަށް ގިނަ ކަންތައްތަކަށް މަގުފަހިވެގެންދާނެ ކަމަށްވެސް ބުންޏެވެ.
އަމީނީ މަގު ޒަމާނީ ފެންވަރަށް ތަރައްގީކޮށް، ތާރު އެޅުމުގެ އަމަލީ މަސައްކަތް އާރްޑީސީން ފެށީ 12 ސެޕްޓެމްބަރު 2022ގައެވެ. އެ މަސައްކަތް ކުރިއަށްދިޔައިރު، އަމީނީ މަގަކީ ފެނާއި ނަރުދަމާގެ މައި ހޮޅިތަކުގެ އިތުރުން އެހެން ނެޓްވޯރކްތަކުގެވެސް މައި ހޮޅިތައް ވަޅުލާފައިވާ މަގަކަށްވުމުން، އެ މަގު ޒަމާނީ ފެންވަރަށް ތަރައްގީކުރުމުގައި ދަތިތައް ހުރިކަން އާރްޑީސީން ފާހަގަކުރިއެވެ.
މި މަޝްރޫއުގައި، ނުކުޅެދުންތެރިކަން ހުންނަފަރާތްތަކަށް ހިނގާބިނގާވެ އުޅުމަށް ފަސޭހަވާނެ ގޮތަށް، ދުވާރުގައި ބްރެއިލް ބްލޮކް ޖެހުމާއި ވީލްޗެއަރ އެކްސެސް ގާއިމްކުރުން ހިމެނެއެވެ. އަދި ސްޓޭކް ހޯލްޑަރުންގެ ކޭބަލްތައް އެޅުމަށްޓަކައި މަގުގެ ދެފަޅީގައި ކޭބަލްޓްރޭ އެޅުމާއެކު، އެޗްވީ ކޭބަލަށް ޚާއްސަކޮށްގެން ޖަންގުޝަންތަކެއްވެސް ބަހައްޓާނެއެވެ.
