އެމެރިކާގެ ކުރީގެ ރައީސް ޑޮނަލްޑް ޓްރަމްޕަށް ދެ އަހަރު ފަހުން ފޭސްބުކް އާއި އިންސްޓަރގްރާމަށް ވަނުމުގެ ފުރުސަތު މެޓާއިން ދީފިއެވެ.
މެޓާގެ ސްޕޯކްސް ޕާސަން އޭންޑީ ސްޓޯން ބުރާސްފަތި ދުވަހު ވަނީ ދެ އަހަރު ދުވަހުގެ ސަސްޕެންޝަން އުވާލާފައިވާކަން ޔަގީންކޮށްދީފައެވެ. ޓްރަމްޕްގެ ފޭސްބުކް އާއި އިންސްޓަރގްރާމް އެކައުންޓް ސަސްޕެންޑް ކުރީ 2021 ވަނަ އަހަރުގެ ޖެނުއަރީ މަހުގެ 6 ވަނަ ދުވަހު އެގައުމުގެ ގާނޫނު ހަދާ މަޖިލީހުގައި ހިނގާދިޔަ ހަމަނުޖެހުންތަކާއި ގުޅިގެންނެވެ.
މެޓާއިން ޖެނުއަރީ މަހުގެ ތެރޭގައި ވަނީ ޓްރަމްޕްގެ އެކައުންޓްގެ ސަސްޕެންޝަން އުވާލާނެކަން ހާމަކޮށްފައެވެ. ނަމަވެސް ކުންފުނީގެ ސިޔާސަތާއި ޚިލާފަށް އެދެ މީޑިޔަމްގައި ޕޯސްޓްކޮށް ހަދާނަމަ ބޮޑު އަދަދަކުން ޖޫރިމަނާކުރާނެކަމަށް ވަނީ ބުނެފައެވެ.
އިންސްޓަރގްރާމް އާއި ފޭސްބުކް އަށް އަލުން ވަނުމުގެ ފުރުސަތު ޓްރަމްޕަށް ލިބިފައިވާއިރު ވޯޓު ލާ އާބާދީގެ ބޮޑު އާބާދީއަކަށް ވާސިލުވުމުގެ ފުރުސަތު ޓްރަމްޕަށް މިވަނީ ފަހިވެފައެވެ. ޓްރަމްޕް އަންނަނީ އަންނަ އަހަރު އޮންނަ އެގައުމުގެ ރިޔާސީ އިންތިޚާބުގައި ވާދަކުރެއްވުމުގެ ތައްޔާރީތައް ވަމުންނެވެ.
އިންސްޓަރގްރާމްގައި 23 މިލިއަން މީހުން ޓްރަމްޕަށް ފޮލޯކުރެއެވެ. އަދި ފޭސްބުކްގައި 34 މިލިއަން މީހުން ޓްރަމްޕަށް ފޮލޯކުރެއެވެ.
