މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްޓީޑީސީ) ގެ ޒަމާނީ އައު ވެބްސައިޓާއެކު އެ ކޯޕަރޭޝަންގެ އައު ލޯގޯ އިފުތިތާހުކޮށްފިއެވެ.
އެ ކޯޕަރޭޝަނަށް 15 އަހަރު ފުރުން ފާހަގަކުރުމަށް ކުރުނބާ މޯލްޑިވްސްގައި ބުދަ ދުވަހުގެރޭ އޮތް ޚާއްސަ ހަފުލާގައި އައު ލޯގޯއާއި ވެބްސައިޓްގެ އިތުރުން އެ ކުންފުނީގެ ހެޑް އޮފީސް ތަރައްގީ ކުރުމުގެ މަޝްރޫއު އިފުތިތާހުކޮށްދެއްވީ ފޮރިން މިނިސްޓަރު އަބްދުﷲ ޝާހިދެވެ.
މި އޮފީހަކީ 6،000 އަކަފޫޓަށްވުރެ ބޮޑު ބިމެއްގައި އަޅައި ހަތް ބުރީގެ އިމާރާތެކެވެ. މި އޮފީހުގައި މަލްޓި ޕާޕަސް ހޯލަކާއި، ޕާކިން އޭރިއާއަކާއި ޖިމަކާއި ބިޒްނަސް ލޯންޖެއްގެ އިތުރުން އޯޕަން އޭރިއާ ޓެރަހެއް ހުންނާނެއެވެ.
މި އޮފީސް އިމާރާތް ހުންނާނީ ހުޅުމާލެ ސެންޓްރަލް ޕާކު ކުރިމަތީގައެވެ. މި އިމާރާތުގެ އަމަލީ މަސައްކަތް ފެށުމަށް ހަމަޖެހިފައިވަނި މިއަހަރުގެ ދެ ވަނަ ކުއާޓަރގައެވެ. އަދި އިމާރާތް ތަރައްޤީކޮށް ނިންމާ ރަސްމީކޮށް ހުޅުވަން ހަމަޖެހިފައިވަނީ 2024 ވަނަ އަހަރުގެ ފަހުކޮޅުގައިކަމަށް އެމްޓީޑީސީން ބުންޏެވެ.
މީގެއިތުރުން އެ ކުންފުންޏަށް ދިގު މުއްދަތަކަށް ޚިދުމަތް ކުރި މުވައްޒަފުންނަށް އަގުވަޒަން ކުރުމުގެ ގޮތުން ވަނީ ހަނދާނީ ފިލާ ދީފައެވެ.
އެގޮތުން މި މުވައްޒަފުންނަށް ހަނދާނީ ފިލާ ހަވާލުކޮށްދެއްވީ ހަޔަރ އެޑިއުކޭޝަން މިނިސްޓަރ ޑރ. އިބްރާހިމް ހަސަނެވެ.
ދިގު މުއްދަތަށް ޙިދުމަތް ކުރި މުވައްޒަފުން
- އިސްލާހު ޝަރީފް، ޖެނެރަލް މެނޭޖަރ ކޯޕަރޭޓް އެފާއާޒް (16 އަހަރު ޙިދުމަތް ކުރި)
- ފިޒާން އަބްދުﷲ، މެނޭޖަރ ފައިނޭންސް (16 އަހަރު ޚިދުމަތް ކުރި)
- މުއުމިނާ އަލީ (15 އަހަރު ޚިދުމަތް ކުރި)
- ފާތިމަތު ތަހާނީ ޝިހާބު، ޖެނެރަލް މެނޭޖަރ ބިޒްނަސް ޑިވަލޮޕްމަންޓް (16 އަހަރު ޚިދުމަތް ކުރި)
- ފާތިމަތު ނާހިދު (15 އަހަރު ޚިދުމަތް ކުރި)
- އަހްމަދު ނިޔާޒް، ޑެޕިއުޓީ މެނޭޖިންގ ޑިރެކްޓަރ (15 އަހަރު ޚިދުމަތް ކުރި)
- އިބްރާހިމް ލަތީފް، ޗީފް ފައިނޭންޝަލް އޮފިސަރ (11 އަހަރު ޙިދުމަތް ކުރި)
އެމްޓީޑީސީ ތަރައްގީކޮށް، ހިންގަމުން އަންނަނީ މައިނާ އިންޓަނޭޝަނަލް ކުންފުންޏަށް ސަބް ލީޒްކޮށްގެން ހިންގާ ބ. ކިހަވަށް ހުރަވަޅި (އަނަންތާރާ ކިހަވަށް) އަދި ތުރުކީގެ އަހްމެޓް އައިދިޒް ކުންފުންޏަށް ސަބް ލީޒް ކޮށްގެން ހިންގާ ގދ. މަގުދުވާ (އަޔާދާ މޯލްޑިވްސް)އެވެ.
އެމްޓީޑީސީގެ 47 ޕަސެންޓް ހިއްސާ ސަރުކާރަށް އޮތްއިރު، 53 ޕަސެންޓް އޮތީ އާންމުންނަށެވެ.
