ރައްޔިތުންގެ މަޖިލީހުގެ މި އަހަރުގެ ފުރަތަމަ ޖަލްސާ ހޯމަ ދުވަހަށް ތާވަލުކޮށްފައިވާއިރު، އެ ޖަލްސާގައި ރައީސުލްޖުމްހޫރިއްޔާ އިބްރާހީމް މުޙައްމަދު ސާލިޙު ރިޔާސީ ބަޔާން އިއްވަވާނެއެވެ.
ރައީސުލްޖުމްހޫރިއްޔާ އިއްވަވާ ރިޔާސީ ބަޔާން އިއްވުމާއި، މި އަހަރުގެ ފުރަތަމަ ދައުރުގެ ފުރަތަމަ ޖަލްސާ އޮންނާނީ ފެބްރުއަރީ 6 ވާ ހޯމަ ދުވަހުގެ ހެނދުނު 9:00ގައެވެ. އެކަން މަޖިލީހުގެ މެންބަރުންނަށްވެސް ވަނީ އަންގަވާފައެވެ.
މި ޖަލްސާ ފައްޓަވައިދެއްވާނީ ރައްޔިތުންގެ މަޖިލީހުގެ ރައީސް މުހައްމަދު ނަޝީދެވެ. އެއަށްފަހު ރައީސުލްޖުމްހޫރިއްޔާ އިބްރާޙިމް މުހައްމަދު ސާލިހުގެ ރިޔާސީ ބަޔާން އިއްވެވުން އޮންނާނެއެވެ.
ގައުމުގެ ހާލަތު ބަޔާންކޮށްދީ އަދި ގައުމުގެ ހާލަތު އިތުރަށް ރަނގަޅު ކުރުމަށްޓަކައި ކުރަން ޖެހޭ ކަންތައްތައް ހިމެނޭ ރިޔާސީ ބަޔާނެއް ރައްޔިތުންގެ މަޖިލީހަށް އިއްވެވުމަކީ ގާނޫނުއަސާސީގެ 84 ވަނަ މާއްދާގައިވާ ގޮތުގެ މަތިން، ރައީސުލްޖުމްހޫރިއްޔާ އަށް ލާޒިމްކުރާ ކަމެކެވެ. އެގޮތުން ރިޔާސީ ބަޔާނުގައި އާންމު ގޮތެއްގައި ގައުމުގެ ހާލަތު ބަޔާންކޮށްދޭއިރު، ގައުމުގެ ހާލަތު އިތުރަށް ރަނގަޅު ކުރުމަށްޓަކައި ކުރަންޖެހޭކަަމަށް ރައީސުލްޖުމްހޫރިއްޔާއަށް ފެންނަ ކަންތައްތަކުގެ މައްޗަށް އަލިއަޅުއްވާލައްވާނެއެވެ.
މިއީ ރައީސް ޞާލިހުގެ 5 ވަނަ ރިޔާސީ ބަޔާނެވެ. މި ޖަލްސާގައި އޮންނާނީ ރިޔާސީ ބަޔާން އިއްވުން އެކަންޏެވެ. އަދި މަޖިލީހުގެ މަސައްކަތްތައް ފެށިގެންދާނީ އޭގެ ފަހުން ބާއްވާ ޖަލްސާތަކުގައެވެ.
މިދިޔަ އަހަރު މަޖިލިސް ނިންމާލިއިރު އެމްޑީޕީގެ ތެރޭގައި އޮތް ދެބަސްވުންތައް މަޖިލީހުގެ ތެރެއިން ފެނިގެން ގޮސްފައިވެއެވެ. އެގޮތުން ރައީސް ޞާލިހަށް ތާއީދުކުރައްވާ މެންބަރުންނާއި، ރައީސް ނަޝީދަށް ތާއީދުކުރައްވާ މެންބަރުންގެ މެދުގައި ސަރުކާރުން ހުށަހެޅި ބިލްތަކާމެދު ބޮޑު ކޯޅުންތަކެއް އުފެދުނެވެ. ވަކިން ހާއްސަކޮށް ޓެކްސް ބޮޑުކުރުން ހުށަހެޅި ބިލްތައް ހިމެނެއެވެ.
މިއަހަރަށް ރައްޔިތުން މަޖިލިސް ހުޅުވުމުގެ ކުރިން މި މަހުގެ ތެރޭގައި އެމްޑީޕީގެ ރިޔާސީ ޕްރައިމަރީ ބާއްވާ ރިޔާސީ ކެންޑިޑޭޓަކީ ރައީސް ސާލިޙުކަމަށް ވަނީ ކަނޑައަޅާފައެވެ. ވުމާއެކު، މިއަހަރުގެ މަޖިލީހުގެ ޖަލްސާތަކަކީ ސިޔާސީ މަސްރަހުގައި ފޯރިގަދަ ޖަލްސާތަކަކަށް ވެގެންދާނެކަމަށް ބެލެވެއެވެ.
ކޮންމެ އަހަރަކު ރައްޔިތުންގެ މަޖިލީހަށް ރައީސުލްޖުމްހޫރިއްޔާ ރިޔާސީ ބަޔާން އިއްވަވާ ދުވަހަކީ ސަރުކާރު ބަންދު ދުވަހެއްގެ ގޮތުގައި އޮންނަނީ ކަނޑައަޅާފައެވެ. މިއަހަރުވެސް ފެބްރުއަރީ 6 ވާ ހޯމަ ދުވަހަކީ ސަރުކާރު ބަންދު ދުވަހެއް ކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ ހަމަޖައްސަވާފައެވެ.
