ކުރީގެ ރައީސް އަދި ޕީޕީއެމްގެ ރައީސް އަބްދުﷲ ޔާމީނާ މައްސަލަ އެއް ނެތްކަމަށާއި، ނަމަވެސް ސިޔާސީ މަސައްކަތްކުރައްވާނީ އެމްޑީޕީއާ އެކުގައިކަަމަށް އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އާދިއްތަ ދުވަހު ބޭއްވި ނޫސްވެރިންގެ ބައްދަލުކުރެއްވުމެއްގައި ރައީސް ނަޝީދު ވިދާޅުވީ، އެއްވެސް މީހަކު ޖަލުގައި ހުރުމަކީ އެމަނިކުފާނު އެދިވަޑައިގަންނަވާ ގޮތެއް ނޫން ކަަމަށެވެ. އަދި ރައީސް ޔާމީނާ އެމަނިފާނާ ހުރިހާ ކަމެއް އެއްގޮތްކަމަށް ވިދާޅުވެފައި ނުވާނެ ކަމަަށްވެސް ވިދާޅުވިއެވެ. ހަމައެހެންމެ ޔާމީނުގެ ވެރިކަމުގައި ހިންގާފައިހުރި "އަންޑިމޮކްރެޓިކް" ކަންކަމަކީ ވަރަށް ދެރަކަންކަން ކަން ފާހަގަކުރައްވައި، އެކަންކަން ބަލައިނުގަންނަވާ ކަަމަށް ރައީސް ނަޝީދު ވަނީ ވިދާޅުވެފައެވެ. މީގެ އިތުރުން އަބަދުވެސް ސިޔާސީ މަސައްކަތް ކުރައްވާނީ ހަމައެކަނި އެމްޑީޕީއާ އެކުގައި ކަމަށާއި، އެ ނޫން ގޮތަކަށް ވިސްނުން ނުގެންގުޅުއްވާ ކަަަމަށް ރައީސް ނަޝީދު ވަނީ ވިދާޅުވެފައެވެެ.
ރައީސް ނަޝީދު އެފަދައިން ވިދާޅުވިނަމަވެސް ރައީސް ޔާމީނާއެކު ކޯލިޝަން ހަދާފާނަންތޯ ނޫސްވެރިން ކުރި ސުވާލުގެ ސީދާ ޖަވާބުދެއްވާފައެއް ނުވެއެވެ. ބައެއް ސިޔާސީ ބޭފުޅުންނާއެކު އެމަނިކުފާނު އަބަދުވެސް މަޝްވަރާކުރެއްވުމަކީ އަބަދުވެސް ކުރައްވާ ކަމެއް ކަމަށް އެމަނިކުފާނު ވަނީ ވިދާޅުވެފައެވެ. އިތުރަށް ވާހަކަފުޅުދައްކަވަމުން ރައީސް ނަޝީދު ވަނީ، އެމްޑީޕީއާއި ޕީޕީއެމްގެ މެނިފެސްޓޯގައި ބައެއް ތަފާތުތައް ހުރިކަން ފާހަގަކުރައްވާފައެވެ. އިދިކޮޅު ޕީޕީއެމްއާއި އެމްޑީޕީ، ކަންކަން މާނަކުރާ ގޮތްވެސް ތަފާތު ކަމަށް ރައީސް ނަޝީދު ވަނީ ވިދާޅުވެފައެވެ. އެގޮތުން ގައުމިއްޔަތު ސިފަކުރުން ފަދަ ކަންކަމުގައި ދެ ޕާޓީގެ ޚިޔާލު ތަފާތުކަމަށް އެމަނިކުފާނު ވަނީ ވިދާޅުވެފައެވެ.
މީގެ ކުރިން ބޭއްވި ނޫސްވެރިންގެ ބައްދަލުވުމެއްގައި ރައީސް ނަޝީދު ވަނީ، އިންޑިއާއާމެދު އިދިކޮޅު ޕީޕީއެމްއިން ދެކޭ ގޮތާއި އަމަލުތައް ބަހައްޓާ ގޮތަކީ، އެމަނިކުފާނާ އެ ޕާޓީއާ ދެމެދު އޮތް ހަމައެކަނި ހިތްހަމަނުޖެހުން ކަމަށް ވިދާޅުވެފައެވެ. އަދި ރައީސް ޔާމީނަކީ ގާބިލް ބޭފުޅެއް ކަމަށްވެސް ވިދާޅުވިއެވެ. އެގޮތުން ރައީސް ޔާމީނަކީ ވިޝަނަރީ ބޭފުޅެއް ކަމަށްވެސް ވިދާޅުވިއެވެ.
ރައީސް ނަޝީދު މިފަދައިން ވިދާޅުވެފައިވާތީ، ރައީސް ޔާމީނާއި ޕީޕީއެމްއާއެކު ކޯލިޝަނެއް ހައްދަވާފާނެ ކަމުގެ ބިރު ހީވާކަމަށް ޑިފެންސް މިނިސްޓަރާއި ރައީސް އިބްރާހީމް މުހައްމަދު ސޯލިހުގެ ކެމްޕޭން ތަރުޖަމާނު މާރިޔާ އަހްމަދު ދީދީ ވަނީ ހުކުރު ދުވަހު ބޭއްވި ކެމްޕެއިން ޖަލްސާގައި ވާހަކަދައްކަވަމުން ވިދާޅުވެފައެވެ.
