ބާސެލޯނާ އަށް ކުޅެމުން އަންނަ ބްރެޒިލްގެ ރަފީނިއާ ހޯދުމުގެ ޝައުޤުވެރިކަން އިޓާލިއަން ލީގުގެ އޭސީ މިލާނުން ފާޅުކޮށްފައިވާ ކަމަށް މީޑިއާ ރިޕޯޓުތައް ބުނެފި އެވެ.
ލީޑްސް ޔުނައިޓެޑު ދޫކޮށް ރަފީނިއާ ބާސެލޯނާ އަށް ބަދަލުވީ މިިދިޔަ އަހަރު އެވެ. އެ ކުލަބާއެކު ރަފީނިއާ ހޭދަކުރި މުއްދަތުގައި ވަނީ 21 މެޗު ކުޅެދީ ތިން ލަނޑު ޖަހައިފަ އެވެ. ލީޑްސްގައި ރަފީނިއާ ދެއްކި މޮޅު ކުޅުން ބާސެލޯނާގައި ނުދެއްކޭ ކަމަށް ގިނަ ބަޔަކު ބުނަމުން އަންނައިރު، ބާސެލޯނާގެ ކޯޗު ޒަވީ ހެނާންޑޭޒް ބުނެފައިވަނީ ރަފީނިއާ އަށް ވަގުތު ބޭނުންވާނެ ކަމަށެވެ. އޭނާ ބުނީ ބާސެލޯނާއިން ކުޅެނީ މުޅިން އެހެން ވައްޓަފާޅިއަކަށް ކަމަށާއި، އެ ޓީމުގެ ކުޅުމަށް ހޭނެން ރަފީނިއާ އަށް އެކަށީގެންވާ ވަގުތު ދޭން ޖެހޭނެ ކަމަށެވެ. މިދިޔަ އަހަރުގެ ވޯލްޑް ކަޕް މުބާރާތުގައި ވެސް ރަފީނިއާ ވަނީ ބްރެޒިލްގައި މޮޅު ކުޅުމެއް ދައްކައިފަ އެވެ. ވޯލްޑް ކަޕަށްފަހު ޒަވީ ބުނީ، ޖެނުއަރީ ޓްރާންސްފާގައި ވެސް އެއްވެސް ކުޅުންތެރިޔަކު ކުލަބު ދޫކޮށްލަން ބޭނުންނުވާ ކަމަށެވެ.
މީޑިއާތަކުގައި ރިޕޯޓުކޮށްފައިވާ ގޮތުން ރަފީނިއާ ހޯދުމަށް އޭސީ މިލާނުން ބޭނުންވެ އެވެ. އެކަމުގެ މަޝްވަރާތައް އެ ކުލަބުގައި ކުރެވުނު ނަމަވެސް، ރަސްމީކޮށް ބާސެލޯނާއާ ދެމެދު މިހާތަނަށް އެއްވެސް ވާހަކައެއް ނުދައްކާ ކަމަށް ވެސް ރިޕޯޓުތައް ބުނެ އެވެ. މީގެ އިތުރުން ބާސެލޯނާ އިން ރަފީނިއާ ދޫކޮށްލަން ބޭނުންވާ ނަމަ، އޭސީ މިލާނުން އޭނާ ގެންނާނެ ކަމަށް ރިޕޯޓުތައް ބުނެ އެވެ. މީޑިއާ ރިޕޯޓުތައް ބުނާ ގޮތުން ރަފީނިއާ ބޭނުންވަނީ ބާސެލޯނާގައި މަޑުކުރުމަށެވެ. އޭނާ ބޭނުންވަނީ ބާސެލޯނާގައި ޒަވީ ބޭނުންވާ ފެންވަރުގެ ކުޅުންތެރިޔަކަށް ވުމަށް ކަމަށް ވެސް ރިޕޯޓުތައް ބުނެ އެވެ.
