ބާސެލޯނާ އަށް ކުޅެމުން އަންނަ ނެދަލެންޑްސްގެ ފޯވާޑް މެމްފިސް ޑިޕާއި ހޯދުމަށް ވާދަވެރި އެތުލެޓިކޯ މެޑްރިޑުން އެ ކުލަބުގައި އެދިފައިވާ ކަމަށް މީޑިއާ ރިޕޯޓުތައް ބުނެފި އެވެ.
ރިޕޯޓުތައް ބުނާ ގޮތުން ޑިޕާއި ހޯދުމަށް އެތުލެޓިކޯ އިން އެދުނީ އެ ޓީމަށް ކުޅެމުން އަންނަ ޕޯޗުގަލްގެ ޔާއޯ ފެލިކްސް ލޯނު އެއްބަސްވުމެއްގެ ދަށުން ޗެލްސީ އަށް ބަދަލުވާތީ އެވެ. ޑިޕާއި ހޯދުމަށް އެދި އެތުލެޓިކޯ އިން މިހާރު ބާސެލޯނާއަށް ހުށަހަޅާފައިވާ ކަމަށާއި، އެކަމާ ގުޅޭ މަޝްވަރާތައް މި ހަފްތާގެ ތެރޭގައި ކުރިއަށްދާނެ ކަމަށް ވެސް ރިޕޯޓުތައް ބުނެ އެވެ. މަޝްވަރާތަކަށްފަހު އެތުލެޓިކޯ އިން ބާސެލޯނާ އަށް ރަސްމީކޮށް ޕްރޮޕޯސަލް ހުށަހަޅާނެ ކަމަށް ވެސް ރިޕޯޓުތަކުގައިވެ އެވެ.
ޑިޕާއި ބާސެލޯނާ އަށް ބަދަލުވީ 2021 ވަނަ އަހަރު އެވެ. ލިއޯން ދޫކޮށް ބާސެލޯނާ އަށް ބަދަލުވެ އޭނާ ވަނީ އެ ކުލަބަށް ކުޅެދިން 42 މެޗުގައި 14 ލަނޑު ޖަހައިފަ އެވެ. ބާސެލޯނާގެ ކޯޗުކަމާ ޒަވީ ހެނާންޑޭޒް ހަވާލުވެ އަންނަނީ ޑިޕާއި އަށް ފުރުސަތު ދެމުންނެވެ. މީގެ ކުރިން ޒަވީ ބުނީ ބާސެލޯނާއިން ޑިޕާއި ދޫކޮށްލަން ބޭނުންނުވާ ކަމަށެވެ. ނަމަވެސް މިހާރު ބާސެލޯނާ އިން އެ ކުލަބުގައި ތިބި ބައެއް ކުޅުންތެރިން ދޫކޮށްލަން ބޭނުންވާ ކަމަށް ރިޕޯޓުތައް ބުނެ އެވެ. ޑިޕާއި އަންނަނީ 2013 ވަނަ އަހަރުން ފެށިގެން ނެދަލެންޑްސްގެ ޤައުމީ ޓީމަށް ވެސް ކުޅެމުންނެވެ.
