މިހާރު ކުރިއަށްދާ ފުޓުބޯޅަ ސީޒަން ނިމުމާއެކު ރެފްރީކަމުން ސްޕެއިންގެ އެންޓޯނިއޯ މަތިއޯ ލަހޯޒް ރިޓަޔާވާން ނިންމާފައިވާ ކަމަށް މީޑިއާ ރިޕޯޓުތައް ބުނެފި އެވެ.

ރެފްރީކަމުން ރިޓަޔާވުމަށް ލަހޯޒް ނިންމާފައިވާއިރު، އޭނާ އަކީ ގިނަ ކޯޗުންނާއި ކުޅުންތެރިންގެ ޝަކުވާތައް ބޮޑު ރެފްރީއެކެވެ. މިދިޔަ އަހަރު ޑިސެމްބަރު މަހު ނިމުނު ފީފާ ވޯލްޑް ކަޕް މުބާރާތާއި، ސްޕެނިޝް ލީގުގެ މެޗަކާއި، ކޮޕަ ޑެލް ރޭ މެޗުގައި ލަހޯޒްގެ ނިންމުންތައް އައިސްފައިވާ ގޮތާމެދު ގިނަ ބަޔަކު ވަނީ ފާޑު ކިޔައިފަ އެވެ. އެހެންކަމުން ސްޕެއިންގެ ފުޓުބޯޅަ އިދާރާ އިން ނިންމާފައިވަނީ ކުރިއަށް އޮތް ހަފްތާގެ މެޗުތަކުގައި ލަހޯޒް ބޭނުން ނުކުރަން ކަމަށް ރިޕޯޓުތައް ބުނެ އެވެ. ވޯލްޑް ކަޕްގެ ކުއާޓާ ފައިނަލްގައި އާޖެންޓީނާ އާއި ނެދަލެންޑްސް ބައްދަލު ކުރި މެޗުގައި ލަހޯޒް ވަނީ ގިނަ ކާޑުތަކެއް ދައްކައިފަ އެވެ. އެއީ އެއް މެޗެއްގައި އެންމެ ގިނަ ކާޑު ދެއްކި ވެސް މެޗެވެ.

އުމުރުން 45 ލަހޯޒް އަކީ ކުލަބު ލެވެލްގެ އިތުރުން ބައިނަލްއަޤުވާމީ ލެވެލްގައި ވެސް ރެފްރީކަން ކުރަމުން އަންނަ ރެފްރީއެކެވެ. އޭނާ އަންނަނީ 2008 ވަނަ އަހަރުން ފެށިގެން ސްޕެނިޝް ލީގުގައި ރެފްރީކަން ކުރަމުންނެވެ. މީގެ އިތުރުން 2021 ވަނަ އަހަރުގެ ޔުއެފާ ޗެމްޕިއަންސް ލީގުގެ ފައިނަލްގައި މެންޗެސްޓަރ ސިޓީ އާއި ޗެލްސީ ވާދަކުރި މެޗުގެ ރެފްރީއަކީ ވެސް އޭނާއެވެ. ލަހޯޒް ވަނީ 2014 ވަނަ އަހަރުގެ ވޯލްޑް ކަޕްގެ ކޮލިފައިންގައި ވެސް ރެފްރީކަން ކޮށްފައެވެ. މީގެ އިތުރުން 2018 ވަނަ އަހަރުގެ މުބާރާތުގެ ކޮލިފައިންގެ އިތުރުން ރަޝިޔާއި އޮތް މުބާރާތުގައި ވެސް އޭނާ ރެފްރީކަން ކުރިއެވެ.