ނިމިދިޔަ 2022 ވަނަ އަހަރު ޖުޑީޝަލް ސަރވިސް ކޮމިޝަން (ޖޭއެސްސީ)އިން 46 މައްސަލަ ބަލައި ނިންމާފައިވާކަމަށް އެ އިދާރާއިން ހާމަކޮށްފިއެވެ.

ނިމިދިޔަ އަހަަރު ކުރެވިފައިވާ މަސައްކަތްތަކުގެ ތަފްސީލު ހިއްސާކޮށް ޖޭއެސްސީން ބުނީ 2022 ވަނަ އަހަރު އެ އިދާރާއިން ބަލައި ނިންމި މައްސަލަތަކުގެ ތެރެއިން 24 މައްސަލަ ސާބިތުކުރެވޭ މިންވަރަށް ހެކި ނެތްކަމަށެވެ.

ޖޭއެސްސީން ބުނީ އެ އިދާރާއިން މައްސަލަ ބަލައި ނިންމުމަށްފަހު 4 ފަނޑިޔާރަކު މަގާމުން ވަކިކުރުމަށް ރައްޔިތުންގެ މަޖިލީހަށް ފޮނުވާފައިވާކަމަށެވެ. ކޮމިޝަނަށް ހުށަހަފައިވާ 9 މައްސަލައެއް ސުލޫކީ މައްސަލައެއްގެ ގޮތުގައި ނިންމައި، އެމީހުންނަށް ނަސޭހަތްދީ ކޮމިޝަނުން ކަނޑައަޅާ ތަމްރީނު ޕްރޮގްރާމެއް ފުރިހަމަކުރުމަށް ވަނީ އަންގާފައެވެ. އަދި 3 ފަނޑިޔާރަކު ސަސްޕެންޑުކޮށްފައިވާކަމަށް ޖޭއެސްސީން ބުނެފައިވެއެވެ.

ޖޭއެސްސީން ހާމަކުރާ ގޮތުގައި މިދިޔަ އަހަރު އެ އިދާރާއަށް 393 ޝަކުވާ ވަނީ ހުށަހަޅާފައެވެ. މިއީ 2021 ވަނަ އަހަރު ހުށަހެޅުނު 404 ޝަކުވާއާ އަޅާ ބަލާއިރު 2.72 އިންސައްތަ ދަށް އަދަދެއް ކަމަށް ޖޭއެސްސީން ބުނެފައިވެއެވެ.

2022 ވަނަ އަހަރު 70 ޝަކުވާއެއް ތަހުގީގުކޮށްފައިވާކަމަށް ޖޭއެސްސީން ބުނެފައިވެއެވެ. މީގެ ތެރެއިން 55 ޝަކުވާއަކީ 2021 ވަނަ އަހަރު ހުށަހެޅިފައިވާ ޝަކުވާއެވެ. އަދި އަލަށް ހުށަހެޅުނު 15 ޝަކުވާއެއް ބަލާފައިވާކަމަށް ޖޭއެސްސީން ބުނެފައިވެއެވެ.

2022 ވަނަ އަހަރު ހުށަހެޅުނު ޝަކުވާތަކުގެ ތެރެއިން 37 ޝަކުވާއެއް ވަނީ ރިވިއު މަރުހަލާގައި ކަމަށް ޖޭއެސްސީން ބުނެފައިވެއެވެ. އަދި 19 ޝަކުވާއެއް ތަހުގީގު ކުރުމަށް ފޮނުވާފައިވާކަމަށާއި، މީގެ ތެރޭގައި ފަނޑިޔާރުންނާ ގުޅުންހުރި 15 މައްސަލަ ހިމެނޭ ކަމަށް ޖޭއެސްސީން ބުނެފައިވެއެވެ.  

2022 ވަނަ އަހަރު ނިމުނުއިރު ޖޭއެސްސީގައި 170 ފަނޑިޔާރުން ތިބި ކަމަށް ވަނީ ހާމަކޮށްފައެވެ. މީގެތެރޭގައި ހިމެނެނީ 23 އަންހެން ފަނޑިޔާރުންނާއި، 147 ފިރިހެން ފަނިޔާރުންނެވެ. އަންހެން ފަނޑިޔާރުންގެ އަދަދު 2021 ވަނަ އަހަރާ އަޅާ ބަލާއިރު 2.7 އިންސައްތަ އިތުރުވެފައިވާކަން ވަނީ ފާހަގަކޮށްފައެވެ.  

ޖޭއެސްސީން ބުނީ 2022 ވަނަ އަހަރު 11 ފަނޑިޔާރަކު އަލަށް އައްޔަންކުރައްވާފައިވާއިރު، 3 ފަނޑިޔާރަކު ހައި ކޯޓަށް އައްޔަންކޮށްފައިވާކަމަށް ޖޭއެސްސީން ހާމަކުރެއެވެ. ސުޕީރިއަރ ކޯޓުތަކަށް 2 ފަނޑިޔާރުން އަދި މެޖިސްޓްރޭޓް ކޯޓުތަކަށް 6 ފަނޑިޔާރުން އައްޔަންކޮށްފައިވާކަމަށް ޖޭއެސްސީން ބުނެފައިވެއެވެ.

2022 ވަނަ އަހަރު 12 ފަނޑިޔާރަކު ރިޓަޔަރކުރައްވާފައިވާއިރު، 6 ފަނޑިޔާރަކު މަގާމުން އިސްތިއުފާ ދެއްވާފައިވާކަމަށް ޖޭއެސްސީން ބުނެފައިވެއެވެ. އަދި 1 ފަނޑިޔާރަކު ޝަރަފުވެރިކަމާއެކު މަގާމުން މުސްކުޅިފުޅުކުރައްވާފައިވާއިރު، ފަނޑިޔާރަކު މަގާމުން ވަކިކޮށްފައިވެއެވެ. މީގެ އިތުރުން ޖޭއެސްސީން ބުނީ 2022 ވަނަ އަހަރު 33 އިސް މެޖިސްޓްރޭޓުން އަދި 2 އިސް ފަނޑިޔާރުން އައްޔަންްކުރައްވާފައިވާކަމަށެވެ.