ޔަމަނުގައި ކޮލެރާގެ ބަލި ފެތުރިފައިވާ މިންވަރު ދަށަށް ހިނގައްޖެއެވެ.

ދުނިޔޭގެ ސިއްހަތު ޖަމުޢިއްޔާ، ވޯލްޑް ހެލްތް އޯގަނައިޒޭޝަނުން އަންގާރަ ދުވަހު ބުނީ، މި އަހަރުގެ އޭޕްރީލް މަހު، ކޮލެރާއަށް ޝައްކުވެގެން ގާތްގަނޑަކަށް 219،000 މީހުން ރިޕޯޓްކޮށްފައިވާ ކަމަށާއި އޭގެ ތެރެއިން ގިނަ ބަޔަކަށް ބަލި ޖެހިފައިވާ ކަމަށެވެ. 

އެ ޖަމުޢިއްޔާއިިން ބުނީ ކޮލެރާ ޖެހިގެން ފާއިތުވި 2 މަސްދުވަސް ތެރޭގައި 1400 މީހުން މަރުވެއްފައިވާ ކަމަށެވެ. 

ވޭތުވެ ދިޔަ މަސްތަކުގައި ޔަމަނުގައި ބާރު ދުވެލީގައި ކޮލެރާ ފެތުރުނު ނަމަވެސް، މިދިޔަ ހަފްތާ އާއި އަޅާ ބަލާއިރު މި ހަފްތާގައި ކޮލެރާ ބައްޔަށް ޝައްކުވެގެން ރިޕޯޓްކޮށްފައިވާ މީހުންގެ އަދަދު މަދުކަމަށް ޑަބްލިއުއެޗްއޯއިން ވަނީ ހާމަކޮށްފައެވެ. އެ ޖަމުޢިއްޔާއިން ބުނީ، މިއީ ބަލި ފެތުރޭ މިންވަރު މަދުވުން ކަމުގައި ބެލެވުނު ނަމަވެސް، ފަހަރުގައި ކޮލެރާއަށް ޝައްކުވެގެން ރިޕޯޓްކުރާ މީހުންގެ އަދަދު މަދުވެފައިވަނީ ޢިދު ބަންދާއި ގުޅިގެން ކަމަށް ވުމަކީވެސް އެކަށީގެންވާ ކަމެއް ކަމަށެވެ. 

މި ބަލި ފެތުރެމުންދާ މިނުގައި ފެތުރޭނަމަ، މިއަހަރުގެ ސެޕްޓެމްބަރ މަހާއި ހަމައަށް ޔަމަނުގައި ގާތްގަނޑަކަށް 3،000،000 މީހުން މި ނުރައްކާތެރި ބަލީގެ ޝިކާރައަކަށް ވެދާނެކަމަށް އދ އިން ވަނީ ލަފާކޮށްފައެވެ.