އިހުތިސާސުން ބޭރުން ކައިވެންޏެއް ކޮށްދިން ކަމަށް ތުހުމަތުވާ މެޖިސްޓްރޭޓެއްގެ މައްސަލަ ޖުޑީޝަލް ސާވިސް ކޮމިޝަން (ޖޭއެސްސީ) އިން ބަލަން ފަށައިފިއެވެ.
ޖޭއެސްސީން ހޯމަ ދުވަހު ބުނީ، ލ. ގަމު މެޖިސްޓްރޭޓް ކޯޓުގެ އިސްމެޖިސްޓްރޭޓް އަބްދުލްފައްތާހު އަބްދުއްޣަފޫރު، ގަމު މެޖިސްޓްރޭޓް ކޯޓުގެ އިހުތިސާސުން ބޭރުން ކައިވެންޏެއްކޮށްދީ، އެ ކައިވެންޏަށް ހުއްދަދިން މައްސަލައެއް ބަލަން ފަށާފައިވާ ކަމަށެވެ.
އިސް މެޖިސްޓްރޭޓުގެ ސްލޫކީ މައްސަލަ ބަލަން ނިންމީ މި މަހުގެ ހަތް ވަނަ ދުވަހު ބޭއްވި ޖޭއެސްސީ 88 ވަނަ ޖަލްސާގައި ކަމަށް ޖޭއެސްސީން ބުންޏެވެ.
ޖޭއެސްސީން ބަލަމުންދާ އިތުރު މައްސަލަތަކުގެ ތެރޭގައި ސ. ހިތަދޫ މެޖިސްޓްރޭޓް ކޯޓުން ބަންދާމެދު ގޮތެއް ނިންމުމަށް ބޭއްވި މައްސަލައަކަށްފަހު އެ ނިންމުމާ ގުޅޭ ގޮތުން ނޫސްބަޔާނެއް ނެރުމުގައި ފަނޑިޔާރުންގެ ސުލޫކީ މިންގަނޑާ ހިލާފަށް ހިތަދޫ މެޖިސްޓްރޭޓް ކޯޓުގެ މެޖިސްޓްރޭޓް ރަފީއުއްދީން އަހްމަދު އަމަލުކޮށްފައިވާ ކަމަށް ބެލެވޭ މައްސަލައެއް ވެސް ހިމެނެއެވެ.
