ފީފާ ވޯލްޑް ކަޕްގެ ފައިނަލްގައި އާޖެންޓީނާއާ ދެކޮޅަށް ނުކުތުމުގެ ކުރިން ފްރާންސްގެ ބައެއް ކުޅުންތެރިން ބަލިވެފައި ތިބި ކަމަށް ކޯޗު ޑިޑިއޭ ޑެޝޯމްޕްސް ބުނެފިއެވެ.
ފައިނަލް މެޗުގެ ކުރިން އޮތް ޕްރެސް ކޮންފަރެންސްގައި ވާހަކަ ދައްކަމުން ދިފާއީ ޗެމްޕިއަނުންގެ ކޯޗު ބުނީ ޓީމުގައި ބަލިމަޑުކަމެއް އުޅޭ ކަމަށާއި، ނަމަވެސް އެކަމާ ހާސްވެ ކަންބޮޑުވާން ޖެހޭ ހާލަތަށް ނުދާ ކަމަށެވެ. ޑެޝޯމްޕްސް ބުނީ، ޓީމު ތައްޔާރުވަމުން އަންނަނީ ފައިނަލް މެޗު ކާމިޔާބުކޮށް މުބާރާތުގެ ތަށި ދިފާއު ކުރަން ކަމަށެވެ.
ފްރާންސްގެ ކުޅުންތެރިންގެ ތެރެއިން ޑިފެންޑަރު ޑޭޔޮޓް އުޕަމެކާނޯ، އިބްރާހިމާ ކޮނާޓޭ، ރަފެއެލް ވެރާން، މިޑްފީލްޑަރު އެޑްރިއަން ރާބިއޮޓް އަދި ފޯވާޑް ކިންގްސްލޭ ކޯމަން އަށް ވަނީ ފާއިތުވި ހަފްތާގައި ބަލީގެ އަސަރުކޮށްފައެވެ. ނަމަވެސް އޭގެ ތެރެއިން ބައެއް ކުޅުންތެރިން އަންނަނީ މަޑުމަޑުން ރަނގަޅުވަމުން ކަމަށް ކޯޗު ޑެޝޯމްޕްސް ވަނީ ބުނެފައެވެ. މީގެ ތެރެއިން ކޮނާޓޭ، ކޯމަން އަދި ވެރާން ވަނީ ހުކުރު ދުވަހު މުޅި ޓީމުގެ ފަރިތަކުރުމުގައި ބައިވެރިނުވެ ކަމަށް ކޯޗު ބުންޏެވެ. ނަމަވެސް ސެމީ ފައިނަލް މެޗުގައި ވެސް ނުކުޅެވުނު ރާބިއޮޓް އަދި އުޕަމެކާނޯ ވަނީ އަލުން އަނބުރާ ފަރިތަކުރުންތަކަށް ނުކުމެފައި ކަމަށް ވެސް ޑެޝޯމްޕްސް ބުންޏެވެ.
މީގެ އިތުރުން ޑެޝޯމްޕްސް ބުނީ މަސައްކަތް ކުރަމުން އަންނަނީ ވީ މިންވަރަކުން އެ ހާލަތު ބަދަލު ކުރުމަށް ކަމަށެވެ. ޑެޝޯމްޕްސް ބުނީ އެކަމުގެ ސަބަބުން އޭނާ އެއްވެސް ވަރަކަށް ކަންބޮޑުވެ، ހާސް ނުވާ ކަމަށާއި މިވަގުތަށް މުހިންމީ ކެތްތެރިކަމާއެކު ކުރިއަށް އޮތް މެޗަށް ތައްޔާރުވުން ކަމަށެވެ.
އަދި ވޯލްޑް ކަޕްގެ ފައިނަލެއްގައި މުހިންމީ މެޗު ކަމަށާއި، ނަމަވެސް ދަނޑު ބޭރުގެ ހިއްސާ ވެސް އޮންނާނެ ކަމަށެވެ. އޭނާ ބުނީ އާޖެންޓީނާގެ ސަޕޯޓަރުންގެ އިތުރުން ފްރާންސްގެ ބައެއް ރައްޔިތުން ވެސް އާޖެންޓީނާގެ ކެޕްޓަން ލިއޮނަލް މެސީ ވޯލްޑް ކަޕް މުބާރާތް އުފުލާލާ މަންޒަރު ބަލަން ބޭނުންވާ ކަމަށެވެ.
ވޯލްޑް ކަޕް ފައިނަލަށް ނުކުންނައިރު، ކުރި މައްޗަށް އޮތީ މެޗު، އެކަމަކު ވެސް ދަނޑު ބޭރު ވެސް އެބަ އޮވޭ. އަހަރެންނަށް އެނގޭ އާޖެންޓީނާގެ ރައްޔިތުންނާއި ސަޕޯޓަރުންގެ އިތުރުން ފްރާންސްގެ ބައެއް ރައްޔިތުން ވެސް މެސީ މުބާރާތް ކާމިޔާބު ކުރާ މަންޒަރު ބަލަން ބޭނުންވާނެ.ޑިޑިއޭ ޑެޝޯމްޕްސް
ޕްރެސްގައި ބައިވެރިވެ ވާހަކަ ދައްކަމުން ފްރާންސްގެ ކެޕްޓަން ހޫގޯ ލޮރިސް ބުނީ، އެންމެ ކުޅުންތެރިޔަކަށް ފޯކަސް ކުރުމަށްވުރެ ފައިނަލް މެޗު މުހިންމު ކަމަށެވެ. އޭނާ ބުނީ ވޯލްޑް ކަޕްގެ ފައިނަލްގައި މެސީ ކަހަލަ ކުޅުންތެރިޔަކާ ދެކޮޅަށް ނުކުންނައިރު ސަމާލުކަން ދޭން ޖެހޭނެ ކަމަށާއި، ނަމަވެސް ކުރިއަށް އޮތް މެޗުގައި ބަލަން ޖެހޭނީ ހަމައެކަނި މެސީއަށް ނޫން ކަމަށެވެ. އަދި ފައިނަލް މެޗުގައި އޮންނާނީ އިޙުތިރާމް ކުރަން ޖެހޭނެ ގޭމް ޕްލޭނެއް ކަމަށާއި، އަދިވެސް އާޖެންޓީނާ ޓީމުގެ ކަންކަން ދަސްކުރަމުން އަންނަ ކަމަށެވެ. އޭނާ ބުނީ މެޗަށް ފުރިހަމަ އަށް ތައްޔާރުވަމުން އަންނަ ކަމަށާއި، އެކަމަކު ވެސް އަބަދު ތައްޔާރު ނުވެވޭ ކަންކަން ހުންނާނެ ކަމަށެވެ.
މިއަހަރުގެ މުބާރާތުގެ ފައިނަލްގައި އާޖެންޓީނާ އާއި ފްރާންސް ވާދަކުރާ މެޗު ފަށާނީ އާދިއްތަ ދުވަހުގެ ރޭ ރާއްޖެ ގަޑިން 20:00 ގައެވެ.
