ވޯލްޑް ބޮޑީބިލްޑިން ޗެމްޕިއަންޝިޕްގައި ވާދަކޮށް ރާއްޖޭގެ މުޙައްމަދު ޔާމީން (ޔާންބެ) ލޯ މެޑަލް ހޯދައިފިއެވެ.
ތައިލެންޑުގެ ބެންގްކޮކުގައި ކުރިއަށްދާ ޗެމްޕިއަންޝިޕުން ޔާންބެ ލޯ މެޑަލް ހޯދީ ބޮޑީބިލްޑިން ސުޕަ 90 ކިލޯގެ ކެޓަގަރީގައި ވާދަކޮށްގެންނެވެ. މި ކެޓަގަރީގެ ލޯ މެޑަލް ޔާންބެ ހޯދީ ފައިނަލްގައި އިންޑިއާގެ ދެ އެތުލީޓުންނާ ވާދަކޮށެވެ. މީގެ ކުރިން ރާއްޖޭގައި ބޭއްވި އޭޝިއަން ބޮޑީބިލްޑިން ޗެމްޕިއަންޝިޕްގައި ވާދަކޮށް ޔާންބެ އަށް ވަނީ ނާކާމިޔާބުވެފައެވެ. އެ ފަހަރު ވެސް ޔާންބެ ވާދަކުރީ ހަމަ މި ކެޓަގަރީގައެވެ.
މިއީ ރާއްޖެއިން މިއަހަރުގެ ވޯލްޑް ޗެމްޕިއަންޝިޕްގައި ހޯދި ހަ ވަނަ މެޑަލްއެވެ. މީގެ ކުރިން ރާއްޖެއިން ވަނީ އެއް ރަން މެޑައްޔާއި، އެއް ރިހި މެޑަލް އަދި ތިން ލޯ މެޑަލް ހޯދާފައެވެ. ރާއްޖެއިން ރަން މެޑަލް ހޯދީ އަޒްނީން ރަޝާދުއެވެ. ރިހި މެޑަލް މުޙައްމަދު މޫސާ (މޯޑު) ހޯދިއިރު، ލޯ މެޑަލް ހޯދީ ޢަބްދުﷲ އަޙުސަން، ހިމްޔާން ހަސަން އަދި ފަތުހުﷲ މުޙައްމަދުއެވެ.
ތައިލެންޑުގައި ކުރިއަށްދާ ވޯލްޑް ބޮޑީބިލްޑިން ޗެމްޕިއަންޝިޕްގައި ރާއްޖެއިން ވާދަކުރަނީ އަޒްނީން، މޯޑު، ޔާންބެ، ހިމްޔާން، ފަތުހުﷲ، އަހުސަން އަދި މުހައްމަދު އިމްރާހް އެވެ.
