މުޖުތަމައުގައި ހިނގާ ކުށްތައް މަދުކޮށް އަމާން ވެއްޓެއް ގާއިމު ކުރެވޭނީ އަވައްޓެރި ފުލުހުންގެ ފަލްސަފާ ދިރުވައި، އާލާ ކޮށްގެން ކަމަށް ހޯމް މިނިސްޓަރު، އިމްރާން އަބްދުﷲ ވިދާޅުވެއްޖެއެވެ.
އޭނާ މިފަދައިން ވިދާޅުވީ ހޮނިހިރު ދުވަހު ތ. އަތޮޅުގައި އަވައްޓެރި ފުލުހުންގެ ޚިދުމަތް ފައްޓަވައިދެއްވައި ކުރެއްވި ޓްވީޓެއްގައެވެ. އެގޮތުން، ރާއްޖޭގައި އާއްމުކޮށް ހިންގާ ކުށްތައް، ހާއްސަކޮށް މަސްތުވާތަކެތީގެ މައްސަލަ ހައްލު ކުރެވޭނީ އަވައްޓެރި ފުލުހުންގެ ފަލްސަފާއާ އެއްގޮތަށް ފުރިހަމަ، ގިނަ މަސައްކަތްތަކެއް ކޮށްގެން ކަމަށް އިމްރާން ވިދާޅުވިއެވެ.
އޭނާ ވިދާޅުވީ ކުށް މަދުކުރުމުގައި ފުލުހުންގެ ދައުރު އެންމެ އަކަށީގެންވާ ގޮތުގައި އަދާ ކުރުމަށް ފުލުހުންނަށް ދޭން ޖެހޭ ތަމްރީނު ދިނުމުގެ މަސައްކަތްތަށް ވަރަށް ބޮޑު އިސްކަމެއް ދީގެން މިހާރު ވެސް ކުރަމުންދާ ކަމަށެވެ.
އަވައްޓެރި ފުލުހުންގެ ޚިދުމަތަކީ އާއްމުންގެ މެދުގައި ފުލުހުންނަށް އޮތް އިތުބާރު ދިރުވައި، ފުލުހުންނާއެކުގައި މުޖުތަމައުގެ ހުރިހާ ފަންތިއެއްގެ މީހުން އެކަތިގަނޑެއްގެ ގޮތުގައި މަސައްކަތް ކުރާނެ ނިޒާމެއް އެކުލަވާލުމަށް 2019 ވަނަ އަހަރު ތައާރަފު ކޮށްފައިވާ ޚިދުމަތެކެވެ. މި ޚިދުމަތަށް އާއްމުންގެ ފަރާތުން ވެސް ތަރުހީބު ލިބެމުން އަންނަ ކަމަށް ފުލުހުން ބުނެއެވެ.
ސަރުކާރުން އަންނަނީ އަވައްޓެރި ފުލުހުންގެ ޚިދުމަތް މުޅި ރާއްޖެއަށް ފުޅާކުރުމަށް މަސައްކަތް ކުރަމުންނެވެ. މި ޚިދުމަތުގެ ސަބަބުން މުޖުތަމައުގައި ހިނގާ ކުށްތައް، އެ ކުށެއްވުމުގެ ކުރިން އޭގެ އަސްލު ދެނެގަނެ، ކުށްކުރުމަށް ހުރި ދޮރުތައް ބަންދު ކުރުމަށް ފުރުސަތު ފަހިވެގެންދާނެއެވެ. މި ޚިދުމަތުގެ ސަބަބުން މުޖުތަމައުގައި ކުށް ކުރާ މިންވަރު ވަރަށް ބޮޑަށް ދަށްކުރެވޭކަން އެކަމާ ގުޅޭގޮތުން ހަދާފައިވާ ތަފާތު ދިރާސާތަކުން ވެސް ދައްކައެވެ.
