އޯގަނައިޒޭޝަން އޮފް އެފްރިކަން، ކެރީބިއަން އެންޑް ޕެސިފިކް ސްޓޭޓްސް (އޯ.އޭ.ސީ.ޕީ.އެސް.) ގެ މެމްބަރު ޤައުމުތަކަށް މިވަގުތު ކުރިމަތިވެފައިވާ ގޮންޖެހުންތައް ޙައްލުކުރުމަށް ރާއްޖެއިން މަސައްކަތްކުރާނެ ކަމަށް މިނިސްޓަރ އޮފް ފޮރިން އެފެއާޒް ޢަބްދުالله ޝާހިދު ވިދާޅުވެއްޖެއެވެ.
އޯ.އޭ.ސީ.ޕީ.އެސްގެ މެމްބަރު ޤައުމުތަކަށް ދިމާވެފައިވާ އެއްގޮތް މައްސަލަ ތައް ހައްލުކުރަން ރާއްޖެ އިން މަސައްކަތްކުރާނެ ކަމުގެ ޔަޤީންކަން ޝާހިދު ދެއްވާފައި ވަނީ ހުކުރު ދުވަހު އެންގޯލާގެ ލުއާންޑާގައި ކުރިއަށް ދިޔަ (އޯ.އޭ.ސީ.ޕީ.އެސް.) ގެ އެންމެ އިސްވެރިންގެ 10 ވަނަ ސަމިޓުގައި ބައިވެރިވެ ވަޑައިގެން ދެއްވި ބަޔާނުގައެވެ. ޝާހިދު ދެއްވި ޤައުމީ ބަޔާނުގައި ޖިއޮގްރަފީގެ ގޮތުން ދުރުގައި އޮތް ނަމަވެސް ރާއްޖެ އާއި އޯ.އޭ.ސީ.ޕީ.އެސް. ގެ މެންބަރު އެހެން ޤައުމުތައް އަބަދުވެސް ގުޅިފައިވާ ކަމަށް ވަނީ ވިދާޅުވެފައެވެ. އެގޮތުން ގައުމުތަކުގެ މެދުގައި ހުރި އެއްގޮތް އަސާސްތަކާއި ގޮންޖެހުންތަކުގެ ސަބަބުން ގައުމުތައް ގުޅިފައިވާ ކަމަށް މިނިސްޓަރ ފާހަގަކުރެއްވިއެވެ.
މިނިސްޓަރ ޝާހިދުގެ ވާހަކަފުޅުގައި، ގައުމުތަކަށް ދިމާވެފައިވާ މައްސަލަތައް ހައްލުކުރުމަށްޓަކާ ރާއްޖޭގެ ތަޖުރިބާ ހިއްސާކުރާނެ ކަމަށް ވެސް ވިދާޅުވިއެވެެ. އަދި އޯއޭސީޕީގެ ގައުމުތަކުން ބައިނަލްއަޤްވާމީ މައިދާނުގައި ރާއްޖެއަށް ދޭ އެއްބާރުލުން ފާހަގަކުރައްވާ، އެ ޖަމުޢިއްޔާގެ މެންބަރެއްގެ ގޮތުގައި ރާއްޖެ އަށް މަރުޙަބާކިޔާފައިވާތީ ޤައުމުތަކަށް ޝާހިދު ވަނީ ޝުކުރު އަދާކުރައްވާފައެވެ.
އޯ.އޭ.ސީ.ޕީ.އެސް.ގެ ސަމިޓުގައި މިނިސްޓަރ އޮފް ފޮރިން އެފެއާޒް ޢަބްދުالله ޝާހިދު ބައިވެރިވެވަޑައިގަންނަވަނީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ޚާއްޞަ މަންދޫބެއްގެ ހައިޞިއްޔަތުންނެވެ.
އޯ.އޭ.ސީ.ޕީ.އެސްގެ މެންބަރު ޤައުމަކަށް ރާއްޖެ ވެފައި ވަނީ ޖަމުޢިއްޔާގެ ހުރިހާ މެންބަރު ޤައުމުތަކުގެ ތާއީދު ލިބި، އިއްތިފާގުންނެވެ.
