ވޯލްޑް ބޮޑީބިލްޑިންގ ޗެމްޕިއަންޝިޕްގައި ވާދަކޮށް ރާއްޖޭގެ މުހައްމަދު މޫސާ (މޯޑު) ރިހި މެޑަލް ހޯދައިފިއެވެ.

ތައިލެންޑުގައި މިހާރު ކުރިއަށްދާ ވޯލްޑް ބޮޑީބިލްޑިންގ ޗެމްޕިއަންޝިޕުން މޯޑް ރިހި މެޑަލް ހޯދީ 55 ކިލޯގެ ކެޓަގަރީންނެވެ. މީގެ ކުރިންވެސް މޯޑު ވަނީ ބޮޑީބިލްޑިންގ ޗެމްޕިއަންޝިޕުން ރާއްޖެއަށް ރިހި މެޑަލް ހޯދައިދީފައެވެ. އެއީ މިދިޔަ އަހަރު އުޒްބެކިސްތާނުގައި ކުރިއަށްދިޔަ ވޯލްޑް ބޮޑީބިލްޑިން ޗެމްޕިއަންޝިޕުންނެވެ. މޯޑު ވަނީ 2019 ވަނަ އަހަރު އޮތް މުބާރާތުން ލޯ މެޑަލް ހޯދާފައެވެ.

މީގެ އިތުރުން މިއަހަރު ރާއްޖޭގައި ބޭއްވި އޭޝިއަން ބޮޑީބިލްޑިންގ ޗެމްޕިއަންޝިޕުން މޯޑު ވަނީ ރަން މެޑަލް ހޯދާފައެވެ. ކ. މާފުށީގައި ބޭއްވި މުބާރާތުން މޯޑު ރަން މެޑަލް ހޯދީ 55 ކިލޯ ކެޓަގަރީންނެވެ. މޯޑުގެ އިތުރުން، ތައިލެންޑުގައި ކުރިއަށްދާ ވޯލްޑް ބޮޑީބިލްޑިންގ ޗެމްޕިއަންޝިޕްގައި ރާއްޖެއިން ވާދަކުރަނީ މުހައްމަދު ޔާމީން (ޔާމްބެ)، އަޒްނީން ރަޝާދު، ހުސައިން ހިމްޔާން، ފަތުހުﷲ މުހައްމަދު، މުހައްމަދު އިމްރާހް އަދި އަބްދުﷲ އަހުސަންއެވެ.

ތައިލެންޑުގެ ބެންގްކޮކްގައި ވޯލްޑް ބޮޑީބިލްޑިންގ ޗެމްޕިއަންޝިޕް ކުރިއަށްދާނީ މި މަހުގެ 12 ވަނަ ދުވަހުގެ ނިޔަލަށެވެ. މި ޗެމްޕިއަންޝިޕްގައި ޖުމްލަ 44 ގައުމަކުން ވާދަކުރެއެވެ.