2021 ވަނަ އަހަރުގެ ޑިސެމްބަރު 31ގެ ނިޔަލަށް މުޅި ރާއްޖެއިން އެއިޑްސް ޖެހުނު މީހުންގެ އަދަދު 39 އަށް އަރާފައިވާކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.

އެޗްއައިވީއަކީ އެއިޑްސް ބަލި ޖައްސާ ވައިރަސްއަށް ކިޔާ ނަމެވެ. އެޗްއައިވީ އަކީ ހަށިގަނޑުގެ ދިފާއީ ނިޒާމަށް ހަމަލާދީ، ދިފާއީ ނިޒާމު ބަލިކަށިކޮށްލާ ވައިރަސްއެކެވެ. އެޗްއައިވީ ޖެހި، އަހަރުތަކެއްގެ ތެރޭގައި ދިފާއީ ނިޒާމު ބަލިކަށިވުމުން ބަލިތަކުން ދިފާއުވުމަށް ނުކުޅެދި، އެކި ބަލިތައް ޖެހެން ފަށައެވެ. މިހިސާބުން އެއީ އެއިޑްސް ކަމަށް ބެލެވެއެވެ.

ކޮންމެ އަހަރެއްގެވެސް ޑިސެމްބަރު 1 ގައި ފާހަގަކުރާ ދުނިޔޭގެ އެއިޑްސް ބަލީގެ ދުވަހާއި ގުޅިގެން އެޗްޕީއޭއިން ނެރުނު ރިޕޯޓުގައި ބުނީ ރާއްޖޭގައި އެޗްއައިވީ އެންމެ ފުރަތަމަ ފެނިފައިވަނީ 1991 ވަނަ އަހަރު ކަމަށެވެ. އޭރުން ފެށިގެން ރާއްޖޭގެ ތަފާސް ހިސާބުތަކަށް ބަލާއިރު 31 ޑިސެމްބަރު 2021 ގެ ނިޔަލަށް މިބަލި ޖެހިފައިވަނީ 39 މީހުންނަށް ކަމަށެވެ. އޭގެ ތެރޭގައި ހިމެނެނީ 6 އަންހެނުންނާއި 33 ފިރިހެނުންނެވެ. މިހާތަނަށް މިބަލީގައި 15 މީހުން މަރުވެފައިވާކަމަށާއި، މިވަގުތު 22 މީހުން ފަރުވާހޯދަމުން ދާކަމަށް އެޗްޕީއޭއިން ބުނެފައިވެއެވެ.

އެޗްއައިވީ/އެއިޑްސްއަށް ހޭލުންތެރިކުރުމާއި، ބަލިން ރައްކާތެރިކުރުމަށް ކުރަންޖެހޭ ކަންކަން ގައުމީ ފެންވަރުގައި ރާވައި ހިންގުމާއި، މިބަލި ޖެހިފައިވާ މީހުންގެ ފަރުވާގެ ކަންކަން ވިލަރެސްކުރުމުގެ އެންމެހާ މަސައްކަތްތައް ކުރިއަށް ގެންދަނީ ހެލްތު ޕްރޮޓެކްޝަން އޭޖެންސީގެ ނެޝަނަލް އެއިޑްސް ޕްރޮގްރާމްގެ ތެރެއިންނެވެ.

އެޗްޕީއޭއިން ބުނީ ބަލާބެލުމަށް ސިއްޙަތު ރަނގަޅު މީހެއްގެ ހަށިގަނޑުގައިވެސް އެޗްއައިވީ ވައިރަސް ހުރެދާނެ ކަމަށެވެ. މިހާރު ރާއްޖޭގެ ކޮންމެ ހޮސްޕިޓަލެއްގައިވެސް އެޗްއައިވީއަށް ޓެސްޓުކުރެވޭނެ އިންތިޒާމު ވާނީ ހަމަޖެހިފައި ކަމަށާއި، އާއްމުކޮށް ހަދާ ސްކްރީނިން ޓެސްޓްގެ ނަތީޖާ ޕޮސިޓިވް ވެއްޖެނަމަ، ނެޝަނަލް އެއިޑްސް ޕްރޮގްރާމް މެދުވެރިކޮށް އައި.ޖީ.އެމް.އެޗްގައި ކޮންފަރމޭޓަރީ ޓެސްޓް ހަދާނެ ކަމަށް އެޗްޕީއޭއިން ބުނެފައިވެއެވެ.

އެޗްއައިވީ އަށް ދެވޭ ފަރުވާއަކީ އެންޓިރެޓްރޯ ވައިރަލް ތެރަޕީ (އޭ.އާރްޓީ)އެވެ. 2004ވަނަ އަހަރުން ފެށިގެން ރާއްޖޭގައިވެސް، ނެޝަނަލް އޭޑްސް ޕްރޮގްރާމް މެދުވެރިކޮށް ބަލިމީހުންނަށް ހިލޭ މިފަރުވާ އަންނަނީ ދެމުންނެވެ. ބަލީގެ ކުރީކޮޅު ބަލި ދެނެގަނެވި، ޤަވާއިދުން ބޭސް ބޭނުންކޮށްފިނަމަ، ލޭގައި އެޗްއައިވީ ވައިރަސް ހުންނަ މިންވަރު (ވައިރަލް ލޯޑް) ދަށްކުރެވެއެވެ. މީގެ ސަބަބުން ދިފާއީ ނިޒާމު ރައްކާތެރިކުރެވި، ރަނގަޅު ސިއްޙަތެއްގައި ގިނަދުވަހު ދެމިހުރުމަށް މަގުފައިވެއެވެ. އަދި މީގެ އިތުރުން ވައިރަލް ލޯޑް ދަށްވުމުން ބަލިމީހާގެ ފަރާތުން އެހެންމީހުންނަށް ބަލި ފެތުރުމުގެ ފުރުސަތު ކުޑަކޮށްދެއެވެ.