ފުޓުބޯޅައިގައި ޤަތަރަށް އަދިވެސް ކުރިއަށް ދެވޭނެ ކަމަށް އެ ޓީމުގެ ކޯޗު ފެލިކްސް ސަންޗޭޒް ބުނެފިއެވެ.
ސަންޗޭޒް މިހެން ބުނީ ފީފާ ވޯލްޑް ކަޕް ގްރޫޕް ސްޓޭޖުގެ ފަހު މެޗުގައި ނެދަލެންޑްސްއާ ދެކޮޅަށް ކުޅޭ މެޗުގެ ކުރިން އޮތް ޕްރެސްގައި ވާހަކަ ދައްކަމުންނެވެ. އެ މެޗަށް ކުރިމަތިލާއިރު ޤަތަރު ވަނީ މުބާރާތުން ކަޓާފައެވެ. ގްރޫޕް ސްޓޭޖުގައި މިހާތަނަށް ކުޅުނު ދެ މެޗުން ވެސް ބަލިވެ އެ ޓީމު އޮތީ ގްރޫޕް އޭގެ ފުލުގައެވެ. ޕްރެސްގައި ވާހަކަ ދައްކަމުން ސަންޗޭޒް ބުނީ، ފާއިތުވި އަހަރުތަކުގައި ޤަތަރުން ތަފާތު މަސައްކަތްތަކެއް ކުރި ކަމަށެވެ. އޭނާ ބުނީ ވޯލްޑް ކަޕާއެކު ޤަތަރުން އައު ޗެޕްޓާއެއް ނިންމާލަނީ ކަމަށާއި، ދެން އޮތީ ކުރިއަށް އޮތް ޗެޕްޓާއަށް ތައްޔާރުވުން ކަމަށެވެ.
އެހެންވީމާ، އަހަރެންނަށް ހީވަނީ އައު ޗެޕްޓަރެއް އަނެއްކާ ވެސް މި ނިންމާލަނީހެން، އެއަށްފަހު ކުރިއަށް އޮތް ޗެޕްޓާ އަށް ތައްޔާރުވާނީ. އަހަރެންނަށް ހީވަނީ މި ޤައުމަށް (ޤަތަރަށް) ފުޓުބޯޅައިގެ ހުރިހާ ލެވެލެއްގައި، ޤައުމީ ޓީމުތައް ހިމެނޭ ގޮތުން ކުރިއެރުންތަކެއް ހޯދޭނެ. ކުރިއަށް ވެސް މަސައްކަތް ކުރާނީ ދެން ހުރި މުބާރާތްތަކަށް ތައްޔާރުވެ، އަހަރެމެންގެ މޮޅު ކުޅުން ދައްކަން.ފެލިކްސް ސަންޗޭޒް / ޤަތަރު ކޯޗު
މީގެ އިތުރުން ސަންޒޭޒް ބުނީ ވޯލްޑް ކަޕްގެ ދަތުރުގައި ޤަތަރުން ކުޅުނީ ވަރުގަދަ ޓީމުތަކާ ދެކޮޅަށް ކަމަށެވެ. އެގޮތުން އެފްރިކާގެ ޗެމްޕިއަން ސެނެގާލް އަދި ސައުތު އެމެރިކާގައި ނަން ހިނގާ އިކުއެޑޯ ހިމެނޭ ކަމަށް އޭނާ ބުންޏެވެ. އޭނާ ބުނީ ގްރޫޕް ސްޓޭޖުގެ ފަހު މެޗަށް ދާއިރު ތިން ޓީމުން ވެސް ދަނީ ގްރޫޕްގެ އެއް ވަނަ އަދި ދެ ވަނަ އަށް ވާދަކުރަމުން ކަމަށެވެ. އެ ގްރޫޕްގައި ޖެހޭނީ ވަރުގަދަ ވާދައެއް ކުރަން ކަމަށާއި، ޤަތަރަށް ނަސީބު ނެތީ ކަމަށެވެ. ނަމަވެސް ކޯޗެއްގެ ހައިސިއްޔަތުން ޓީމުގެ ކުޅުންތެރިންނާމެދު ފަޚުރުވެރިވާ ކަމަށް އޭނާ ބުންޏެވެ.
މުބާރާތުގައި ޤަތަރުގެ ފަހު މެޗަކީ ނެދަލެންޑްސްއާ ދެކޮޅަށް ކުޅޭ މެޗެވެ. އެ މެޗު އޮންނާނީ އަންގާރަ ދުވަހުގެ ރޭ ރާއްޖެ ގަޑިން 20:00 ގައެވެ.
