އެއްގަމާއި ވައިގެ މަގުންވެސް ވަރުގަދަ ހަމަލާތަކެއްދީގެން މިދިޔަ އާދީއްތަ އަދި ހޯމަ ދުވަހު ސޫރިޔާގައި ހިންގި ވަރުގަދަ އަސްކަރީ އޮޕަރޭޝަންގައި، 184 ހަނގުރާމަވެރިއަކު މަރާލާފައި ވާނެ ކަމަށް، ތުރުކީވިލާތުގެ ދިފާޢީ ވުޒާރާއިން ހާމަކޮށްފިއެވެ.
ތުރުކީވިލާތުން ބުނި ގޮތުގައި، އެ އަސްކަރީ އޮޕަރޭޝަނަކީ، ތުރުކީވިލާތުގެ އިސްތަންބޫލްގައި ދާދި ފަހުން ދިން ބޮމުގެ ހަމަލާގެ ބަދަލުގައި ހިންގި އޮޕަރޭޝަނެކެވެ. ހުސްވި ހަފުތާގެ ހަމަލާގައި 6 މީހެއްގެ ފުރާނަ ގެއްލިފައި ވާ އިރު، އެ ހަމަލާތަކީ ކުރުދީ ހަނގުރާމަވެރިންނާ ގުޅޭ ހަމަލާއެއް ކަމަށް ކަމާ ބެހޭ ފަރާތްތަކުން ވަނީ ބުނެފައެވެ.
އެންމެ ފަހުން އަހަރަމެންނަށް ލިބިފަ އޮތް މައުލޫމާތަށް ބަލާއިރު، އެއްމަގާއި ވައިގެ މަގުން ދިން ހަމަލާތަކުގައި، 184 ހަނގުރާމަވެރިއަކު ވަނީ މަރާލާފަ.ހުލޫސީ އަކަރު؛ ތުރުކީވިލާތުގެ ދިފާޢީ ވަޒީރު
ކަން މިހެން އޮތް އިރު ޕީކޭކޭއާއި ވައިޕީޖީ އިސްވެ އޮވެގެން ހިންގާ ސީރިއަން ޑިމޮކްރަޓިކް ފޯރސަސް (އެސްޑީއެފް)އިން ވަނީ، ކާރޫބާރޫ ބޮޑު މަގެއްގެ މަތީގައި، ނޮވެމްބަރު 13 ވަނަ ދުވަހު ދިން ބޮމުގެ ހަމަލާގައި އެއްވެސް ވަރެއްގެ ޝާމިލުވުމެއް އޮތް ކަމަށް އިންކާރު ކޮށްފައެވެ.
ތުރުކީވިލާތުން ބުނީ ބޯޑަރު ހުރަސްކޮށް، ސޫރިޔާގެ އުތުރުގެ ސަރަހައްދުން ހޯމަ ދުވަހު ދިން މޮޓަރު ބަޑީގެ ހަމަލާއެއްގައި 2 މީހެއްގެ ފުރާނަ ގެއްލިފައި ވާ ކަމަށެވެ. މިއާއެކު ބޯޑަރު ހުރަސްކޮށް ދޭ ހަމަލާތަކުގެ ނުތަނަވަސްކަންވެސް ވަނީ ބޮޑުވެފައެވެ.
އިސްތަންބޫލްގައި އެންމެ ފަހުން ދިން ހަމަލާގެ އަގު، ހަނގުރާމަވެރިން ޖެހޭނެ އަދާ ކުރަން. މިއަދާއި މާޒީގައި އެމީހުން ހިންގި ޖަރީމާތަކުގެ އަގު، އަހަރަމެން އެމީހުންގެ އަތުން އަތުލާނަން. އެމީހުންނަށް ޖެހޭނީ، އެ އަގު ދައްކަން.ހުލޫސީ އަކަރު؛ ތުރުކީވިލާތުގެ ދިފާޢީ ވަޒީރު
ތުރުކީވިލާތުން ސޫރިޔާގައި ހިންގާ އަސްކަރީ އޮޕަރޭޝަންގެ ސަބަބުން ސޫރިޔާގެ އާންމުން ދަނީ ކަންބޮޑުވުން ފާޅު ކުރަމުންނެވެ. ތުރުކީވިލާތުގެ ހަމަލާތަކުގައި ފުރާނަ ގެއްލިދިޔަ ކުރުދީންގެ އާއިލާތަކުން ވަނީ ހިތާމަ ފާޅު ކޮށްފައެވެ.
މަރާލި މީހުންގެ ތެރޭގައި އާންމު ފަރުދުން ހިމެނޭ. 10 ވަރަކަށް 15 ވަރަކަށް މީހުން ވަނީ މަރާލާފަ. އެއީ ގާތްގަނޑަކަށް 150 އާއިލާއަކާ ގުޅިފައި ވާ މީހުން. ފިރިހެނުންނާއި، އަންހެނުންނާއި ކުޑަކުދިން ހިމެނޭ. އެމީހުންގެ ހަށިގަނޑުގެ ވަސްވެސް ނެތް. އެމީހުންނަށް ކިހިނެއް ހެދީ؟ ތުރުކީވިލާތަށް އެމީހުން ކީއް ކުރީ، އެމީހުންނަށް އެ ވަރު ކުރާކަށް؟ޢަބްދުޢަޒީޒް ސާދޫން؛ ތުރުކީވިލާތުގެ ހަމަލާތަކުގައި މަރުވި މީހެއްގެ ޢާއިލާ މެންބަރެއް
ކަރޑިސްޓާން ވަރކާޒް ޕާޓީ (ޕީކޭކޭ) އާއި ޕީކޭކޭގެ ގޮތްޕެއް ކަމަށް ތުރުކީވިލާތުގެ ސަރުކާރުން ތުހުމަތު ކުރާ ވައިޕީޖީގެ ކިއްލާތަކަށް އަމާޒުކޮށް، ތުރުކީވިލާތުގެ މަތިންދާބޯޓުތަކުން ދިން ހަމަލާތަކުގައި 89 އަމާޒެއް ސުންނާފަތި ކޮށްލާފައި ވާ ކަމަށްވެސް ޚަބަރު ލިބެއެވެ.
ދީރިކްގައި މި ޤަތުލުއާންމު ހިންގާފައިވަނީ އިންސާނިއްޔަތު ކަމުގެ އެއްވެސް އަގަކަށް ބެލުމެއް ނެތި. މަދަނީ ފަރުދުންނާއި، ނޫސްވެރިންނާއި، އިޖުތިމާއީ ޚިދުމަތްތެރި ފައުޖުތަކަށް ހަމަލާ އަމާޒު ކުރި. ދުނިޔޭގެ ހުރިހާ ހިސާބެއްގަ ނޫސްވެރިންނަށް ހިމާޔަތް އޮވޭ. އެކަމަކު، ތުރުކލީވިލާތުން، ހަނގުރާމަވެރިއެއް، މަދަނީ ފަރުދެއް ނުވަތަ ނޫސްވެރިއަކަށްވެސް ބެލުމެއް ނޯވޭ.ޔޫސުފް ހާޖީ؛ ތުރުކީވިލާތުގެ ހަމަލާތަކުގައި މަރުވި މީހެއްގެ ޢާއިލާ މެންބަރެއް
ދުނިޔޭގެ އެންމެ ވަރުގަދަ އަސްކަރީ ބާރު ކަމަށް ވަކާލާތު ކުރާ އެމެރިކާގެ ސަރުކާރުން ބުނާ ގޮތުގައި އެސްޑީއެފްއަކީ، ސޫރިޔާގައި ހަރަކާތްތެރިވާ އައިސިސް ޖަމާއަތާ ދެކޮޅަށް ހަނގުރާމަ ކުރަމުންދާ ބައެކެވެ. ނަތީޖާއެއްގެ ގޮތުން، އުތުރު އެޓްލާންޓިކްގެ އަސްކަރީ އިއްތިހާދު (ނޭޓޯ)ގެ ގާތް އެކުވެރި ތުރުކީވިލާތާ މެދު ބޮޑު ނުތަނަވަސްކަމެއް ވަނީ އުފެދިފައެވެ.
