ސްޕެއިންގެ ރެއާލް މެޑްރިޑަށް އެންމެ ރަނގަޅު ކޯޗަކީ މިހާރުގެ ކޯޗު ކާލޯ އަންޗެލޮޓީ ކަމަށް އެ ކުލަބުގެ ރައީސް ފްލޮރެންޓީނޯ ޕެރޭޒް ވިދާޅުވެއްޖެއެވެ.
ޕެރޭޒް މިހެން ވިދާޅުވީ ރެއާލްގައި އަންޗެލޮޓީ ކުރަމުން އަންނަ މަސައްކަތާއި، އޭނާގެ ކުރިމަގާ ގުޅޭ ގޮތުން ވާހަކަ ދައްކަމުންނެވެ. ޕެރޭޒް ވިދާޅުވި ގޮތުގައި ރެއާލަށް އެންމެ ރަނގަޅީ އަންޗެލޮޓީއެވެ. ސަބަބަކީ ރެއާލް އެނގިގެން، ކުޅުންތެރިންނާއި، ޚާއްސަކޮށް މުޅި ޓީމުގެ ހާލަތު ދަންނަ މީހަކީ އަންޗެލޮޓީ ކަމަށް ވުމެވެ. މީގެ އިތުރުން ޕެރޭޒް ވިދާޅުވީ ރެއާލާއި އަންޗެލޮޓީއާ ދެމެދު އޮންނަނީ ވަރަށް ރަނގަޅު ގުޅުމެއް ކަމަށާއި، އަންޗެލޮޓީ އަކީ ވަރަށް ރަނގަޅު ކޯޗެއް ކަމަށެވެ.
އަންޗެލޮޓީ ވަނީ މީގެ ކުރިން ވެސް ރެއާލަށް އިރުޝާދު ދީފައެވެ. 2013 ވަނަ އަހަރު އެ ކުލަބާ ހަވާލުމަށްފަހު، އޭނާ ކުލަބު ދޫކޮށްލީ 2015 ވަނަ އަހަރުއެވެ. އެއަށްފަހު ދެން އޭނާ ހަވާލުވީ ބަޔާން މިއުނިކާއެވެ. ދެ ވަނަ ފަހަރަށް އަންޗެލޮޓީ ރެއާލާ ގުޅުނީ 2021 ވަނަ އަހަރުއެވެ. ރެއާލާއެކު މިހާރު އަންޗެލޮޓީ ހަދާފައިވާ އެއްބަސްވުމުގެ މުއްދަތު ހަމަވާނީ 2024 ވަނަ އަހަރުއެވެ. ނަމަވެސް އެއަށްފަހު ކަންތައް ކުރާނެ ގޮތެއް އަންޗެލޮޓީ ހާމަކޮށްފައެއް ނުވެއެވެ. އަންޗެލޮޓީ ބުނީ ކޯޗިން ކެރިއަރު ހުއްޓާލާނީ ރެއާލުން ކަމަށެވެ.
އުމުރުން މިހާރު 63 އަހަރުވެފައިވާ އަންޗެލޮޓީ ވަނީ ރެއާލާއެކު ގިނަ ކާމިޔާބީތަކެއް ވެސް ހޯދާފައެވެ. އެ ޓީމާއެކު އޭނާ ވަނީ އަށް ތައްޓެއް ކާމިޔާބުކޮށްފައެވެ. އަންޗެލޮޓީ އަކީ ކޯޗިން ކެރިއަރުގައި ކާމިޔާބު ކޯޗެކެވެ. އޭނާ އަކީ ޔުއެފާ ޗެމްޕިއަންސް ލީގު ކޯޗެއްގެ ގޮތުގައި އެންމެ ގިނަ ފަހަރު ހޯދި ކޯޗެވެ. މީގެ އިތުރުން ޔުއެފާ ޗެމްޕިއަންސް ލީގުގައި އެންމެ ގިނަ މޮޅު ހޯދި ކޯޗަކީ ވެސް މިހާރު އަންޗެލޮޓީއެވެ.