ބަލިމީހުންގެ ރައްކާތެރިކަމާއި ގުޅޭގޮތުން ގައުމީ ފެންވަރުގެ މަހާސިންތާއެއް ފުރަތަމަ ފަހަރަށް ބާއްވައިފިއެވެ.

މި މަހާސިންތާ ބާއްވާފައިވަނީ އޮކްޓޯބަރު 23ން 27އަށެވެ. މިއަހަރުގެ މި ދުވަހުގެ ޝިއާރަކީ "ގެއްލުމާނުލައި ބޭސްފަރުވާ" މިއެވެ. އަދި މި މަހާސިންތާގެ ޝިއާރަކީ "ބަލިމީހުންނަށް ރައްކާތެރިކަން ފޯރުކޮށްދިނުން ފެށެނީ އަހަރެންނާ ހަމައިން"އެވެ. 

ޑަބްލިޔުއެޗްއޯއާ ގުޅިގެން 23 އޮކްޓޯބަރ 2022ގައި ފެށުނު މި ގައުމީ މަހާސިންތާގައި، މާލެއާއި އަތޮޅުތެރެއިން އެކި ދާއިރާތަކުގައި މަސައްކަތްކުރާ ސިއްހީ ޚިދުމަތްތެރިން ބައިވެރިވެފައިވެއެވެ. އެގޮތުން ޑޮކްޓަރުންނާއި، ނަރުހުންނާއި، ލެބޯޓްރީ ޓެކްނީޝަނުންނާއި، ކޮމިއުނިޓީ ހެލްތު ވޯރކަރުންނާއި އަދި ސިއްހީ ދާއިރާގެ އެކިއެކި ފަންނީ ލެކްޗަރަރއިން ހިމެނެއެވެ.

މިމަހާސިންތާގައި، ބަލިމީހުންގެ ރައްކާތެރިކަމާއި، ރައްކާތެރި ގޮތުގައި ބޭސް ދިނުމާއި، ގެއްލުމާނުލައި ބޭސް ދިނުމާއި، އިންފެކްޝަނުން ރައްކާތެރިވުމާއި އަދި ކޮންޓްރޯލް ކުރުމާއި، ސިއްހީ ޚިދުމަތްދޭ ތަންތަނުން ޖެހޭ އިންފެކްޝަން މޮނިޓަރކުރުމާއި، ސިއްހީ ޚިދުމަތްދޭ ތަންތަނުގައި އުފެދޭ ކުނި މެނޭޖްކުރުމާއި، ސިއްހީ ޚިދުމަތްދޭ އާލާތްތައް ރައްކާތެރިކުރުމާއި، ބަލިމީހާގެ ރައްކާތެރިކަން ކަށަވަރު ކުރުމުގައި ފާރމަސިސްޓުންގެ މުހިންމުކަމާއި، ސަރޖަރީތަކުގެ ރައްކާތެރިކަމަށް ބޭނުންކުރާ ސަރޖިކަލް ޗެކްލިސްޓަށް އަހުލުވެރިކުރުމާއި، ސިއްހީ ދާއިރާގެ އެކިއެކި ކޯސްތަކުގެ ކަރިކިއުލަމްގައި، އިންފެކްޝަނުން ރައްކާތެރިވުމާއި އަދި ކޮންޓްރޯކްކުރުމާބެހޭ ކަންކަން ހިމެނުމުގެ މުހިއްމުކަމާއި، ބަލިމީހުންގެ ރައްކާތެރިކަމާގުޅޭ ހާދިސާތައް ރިޕޯރޓްކުރުމާއި، އަދި އެފަދަ ހާދިސާތަކުން ދަސްކުރާނެ ނިޒާމްތަކާއި އަދި "ޕޮއިންޓް އޮފް ކެއަރ" ކޮލިޓީ ހިފެހެއްޓުމާ ގުޅޭގޮތުން ނެގިފައިވާ ފިޔަވަޅުތަކުން ޓްރެއިނިންގ ދިނުމާ ގުޅޭގޮތުން މަޝްވަރާ ކުރެވިފައިވެއެވެ. މި މަހާސިންތާއިން، ކަމުގެ މާހިރުންނާއެކު އެކިއެކި ހާދިސާތަކުގެ ރިވިއުއާ ގުޅޭގޮތުން މަޝްވަރާކުރުމުގެ ފުރުސަތު ބައިވެރިންނަށް ލިބިފައިވެއެވެ.

މިމަހާސިންތާގައި ބައިވެރިވި ހުރިހާ ފަރާތްތަކަށް ބައިވެރިވިކަމުގެ ސެޓްފިކެޓް ދީފައިވެއެވެ. މި މަހާސިންތާގައި މައުލޫމާތު ދެއްވާފައިވަނީ ރާއްޖެއިން ކަމާގުޅޭ 12 މާހިރުންނާއި ރާއްޖެއިން ބޭރުން 21 ފަރާތެކެވެ.