Advertisement
ކ. މާލެ
|
26 އޮކްޓޯބަރ 2022 | ބުދަ 21:53
ރާއްޖެ އިސްލާމްވި ދުވަހުގެ ރަސްމީ ޖަލްސާގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް ވާހަކަފުޅުދައްކަވަނީ
ރާއްޖެ އިސްލާމްވި ދުވަހުގެ ރަސްމީ ޖަލްސާގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް ވާހަކަފުޅުދައްކަވަނީ
ރައީސް އޮފީސް
ޗާގޮސް މައްސަލަ
ރާއްޖޭގެ ސިޔާދަތީ މިނިވަންކަން ގެއްލޭ ފަދަ ގޮތަށް އަމަލުކޮށްފައެއް ނުވާނެ ދެން ވެސް ނުކުރާނެ: ރައީސް
ހަޤީޤަތް އެނގި ތިބެ މަސްލަހަތު ނަގައިލުމަށް ޔޯލަ ވާހަކަ ނުދެއްކުން އެދެން
މި މައްސަލަ ހައްލުކުރަން މަސައްކަތް ކުރަނީ ބައިނަލްއަޤްވާމީ ޓްރައިބިއުނަލްއެއްގައި
މައްސަލާގައި ދަމަހައްޓަމުން މި އަންނަނީ ރާއްޖޭގެ އެންމެ މަތީ މަސްލަހަތު ދިފާއު ކުރުމުގެ ސިޔާސަތު

ރާއްޖޭގެ ސިޔާދަތީ މިނިވަންކަން ގެއްލޭ ފަދަ ގޮތަށް އަމަލުކުރައްވާފައި ނުވާނެ ކަމަށާއި ދެން ވެސް ނުކުރައްވާނެ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

ރާއްޖެ އިސްލާމްވި ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ ރާއްޖޭގެ ޚާރިޖީ ދާއިރާއާ ގުޅޭކަމެއް ވިޔަސް އަދި ޗާގޮސް މައްސަލައިގައި ވިޔަސް ރާއްޖޭގެ ސިޔާދަތީ މިނިވަންކަމަށް ގެއްލުމެއް ލިބޭފަދަ ނިންމުމެއް މި ސަރުކާރުން މިހާތަނަށް ނިންމާފައިނުވާނެ ކަމަށާއި އަދި ދެން ވެސް އެފަދަ ގެއްލުމަކަށް ރާއްޖެއިން ޖާގަ ނުދެއްވާނެ ކަމަށެވެ.

ދޭދޭ ޤައުމުތަކުގެ މެދުގައި ސަރަހައްދީ އެތައް މައްސަލަތައް ހުރި ކަމަށާއި ޗާގޮސް މައްސަލައަށް ވެސް ހައްލު ނުލިބި އޮންނަތާ ވަރަށް ގިނަ އަހަރުވެފައިވާ ކަމަށް ރައީސް ވިދާޅުވިއެވެ.

މި މައްސަލަ ހައްލުކުރުމަށް 1992 ވަނަ އަހަރު އޭރުގެ ސަރުކާރުން އިނގިރޭސިވިލާތާއެކު މަޝްވަރާކުރައްވާފައިވާ ކަމަށާއި އެ މަޝްވަރާތަކުން އެއްބަސްވީ ފުށުއަރާ ސަރަހައްދު ދެ ޤައުމަށް ހަމަހަމައަށް ބެހުމަށް ކަމަށް ވެސް ވިދާޅުވިއެވެ.

އޭގެ ފަހުން 2011 ވަނަ އަހަރު އޭރުގެ ސަރުކާރުން މޮރިޝަސް ސަރުކާރާއެކު މި މައްސަލަ ހައްލު ކުރުމަށް މަޝްވަރާ ކުރައްވާފައިވާ ކަމަށް ވެސް ރައީސް ވިދާޅުވިއެވެ. އަދި އޭރު އެއްބަސްވީ ވާހަކަ ދައްކައިގެން ފުށުއަރާ ސަރަހައްދުގެ މައްސަލަ ހައްލު ކުރުމަށްކަން ވެސް ރައީސް ފާހަގަކުރެއްވިއެވެ.

Advertisement

މި މައްސަލައިގައި ދިވެހި ދައުލަތުން މިހާރު ވެސް ދަމަހައްޓަމުންދަނީ ކުރިން ދެމެހެއްޓި، ދިވެހިރާއްޖޭގެ އެންމެ މަތީ މަސްލަހަތު ދިފާއު ކުރެއްވުމުގެ ސިޔާސަތު ކަމަށް ވެސް ރައީސް ވިދާޅުވިއެވެ.

ޗާގޮސް މައްސަލާގައި އެކި ސަރުކާރުތަކުން އެކި ފަރާތްތަކާ ވާހަކަ ދައްކަވާފައިވާކަން ފާހަގަކުރައްވާ ރައީސް ވިދާޅުވީ މި ސަރުކާރުން މި މައްސަލަ ހައްލުކުރައްވަން މަސައްކަތް ކުރައްވަނީ ބައިނަލްއަޤްވާމީ ޓްރައިބިއުނަލްއެއްގައި ކަމަށް ވިދާޅުވިއެވެ. އަދި ވަކި ސަރުކާރަކާއެކު ނޫން ކަމަށް ވިދާޅުވިއެވެ.

އިޓްލޮސްއަށް ހުށަހަޅާފައިވާ މައްސަލައިގައި ސަރުކާރުން އަންނަނީ ރާއްޖޭގެ އެންމެ މަތީ މަސްލަހަތު ހިމާޔަތްކުރުމަށް މަސައްކަތް ކުރައްވަމުން ކަމަށް ވިދާޅުވިއެވެ. އެހެންނަމަވެސް ވަކި މީހެއް ނުވަތަ ބަޔެއްގެ އަމިއްލަ ބޭނުމަށް، ނުވަތަ ސިޔާސީ މަޤްސަދެއް ހާސިލް ކުރުމަށް ހަޤީޤަތް އެނގި ތިބެ ދޮގު ވާހަކަތައް ފަތުރަމުންދިޔުމަކީ ވަރަށް 'ދެރަކަމެއް' ކަމަށް ރައީސް ވިދާޅުވިއެވެ.

އެފަދަ ވާހަކަތައް ފަތުރައިގެން ރައްޔިތުންގެ މެދުގައި ބިރުވެރިކަން އުފައްދާ ބައިބައި ކުރަން އުޅުމަކީ އަދި މާ ހިތާމަވެރި ކަމެއް ކަމަށް ރައީސް ޞާލިހް ވިދާޅުވިއެވެ.

Advertisement

Advertisement
އެންމެ ފަހުން އަޕްޑޭޓް ކުރީ: 3 ދުވަަސް ކުރިން
ރިވިއު ކުރީ: ފާޠިމަތު ޒުހައިރާ
- ކޮމެންޓް