ކުޑަކުދިން ކޯޓަށް ހާޒިރުނުކޮށް ޝަރީއަތްކުރެވޭނެ ގޮތްތައް އިޚްތިޔާރުކުރު މުހިންމުކަމަށް، ދިވެހިރާއްޖޭގެ އުއްތަމަ ފަނޑިޔާރު އަހުމަދު މުއުތަސިމް އަދުނާން ވިދާޅުވެއްޖެއެވެ.

އުއްތަމަ ފަނޑިޔާރު މިހެން ވިދާޅުވީ ރ. އަނގޮޅިތީމު މެޖިސްޓްރޭޓް ކޯޓުގެ އައު އިމާރާތް ހުޅުވައިދެއްވައި ވާހަކަފުޅުދައްކަވަމުންނެވެ. އުއްތަމަ ފަނޑިޔާރު ވިދާޅުވީ، ކޯޓުން ޚިދުމަތްތައް ފޯރުކޮށްދިނުމުގައި އާންމު ރައްޔިތުންނަށް ފަސޭހަވާނެ ގޮތަށް އިންތިޒާމްތައް ހަމަޖެއްސުން މުހިންމުކަމަށެވެ.

އަދި ކުޑަކުދިން ކޯޓަށް ހާޒިރުކުރަންޖެހޭފަދަ މައްސަލަތަކުގައި އެކުދިން ކޯޓަށް ހާޒިރުނުކޮށް ޝަރީއަތްކުރެވޭނެ ގޮތްތައް އިޚްތިޔާރުކުރުމުގެ މުހިންމުކަމުގެ މައްޗަށް އުއްތަމަ ފަނޑިޔާރު އަލިއަޅުއްވައިލެއްވިއެވެ.

މިރަސްމިއްޔާތުގައި ސީޖޭއޭ އާއިޝަތު ރިޒްނާ ވަނީ، މިމަސައްކަތް ހަވާލުކުރެވުނު ކޮންޓްރެކްޓަރ، އަނގޮޅިތީމު ކައުންސިލް، ރ. ޖުޑީޝަލް ދާއިރާގެ އިސް މެޖިސްޓްރޭޓު، އަނގޮޅިތީމު މެޖިސްޓްރޭޓް ކޯޓުގެ އަދި ޑީޖޭއޭގެ މުވައްޒަފުންގެ ބުރަ މަސައްކަތުގެ އަގުވަޒަންކޮށް ޝުކުރުދަންނަވާފައެވެ.

އަދި މިއިމާރާތުގެ ސަބަބުން ކޯޓުން ފޯރުކޮށްދޭ ޚިދުމަތްތަކުގެ ފެންވަރު ރަނގަޅުވެ، އަދުލު އިންސާފަށް ފަސޭހައިން ވާސިލްވެވޭނެ މަގު ތަނަވަސްކުރުމަށް ކުރަމުން ގެންދާ މަސައްކަތް އިތުރަށް ހަލުވިވެގެން ދާނެކަމަށްވެސް ޗީފް ޖުޑީޝަލް އެޑްމިނިސްޓްރޭޓަރގެ ވާހަކަފުޅުގައި ފާހަގަކުރެއްވިއެވެ.

އާދީއްތަ ދުވަހު ރަސްމީކޮށް ބޭނުންކުރަން ފެށުނު ކޯޓުގެ އައު އިމާރާތް ފަރުމާކުރެވިފައިވަނީ، ޝަރީއަތްކުރާނެ ވަކި މާލަމަކާއި، މެޖިސްޓްރޭޓުންނާއި މުވައްޒަފުން މަސައްކަތްކުރުމަށް ވަކިން ޚާއްސަކުރެވިފައިވާ ބައިތައް ހިމެނޭގޮތަށް، އާންމުންނަށް ޚިދުމަތް ފޯރުކޮށް ދިނުމަށް ފަސޭހަވާނެ ގޮތަށެވެ.

މި ރަސްމިއްޔާތުގައި 2021 ވަނަ އަހަރު ތަކްރީމްކުރައްވާފައިވާ ރިޓަޔަރޑް މެޖިސްޓްރޭޓުންނަށް ޝަރަފުގެ މުގުރާއި މެޑެލް ހަވާލުކުރެވިފައިވެއެވެ. އަދި ގިނަ ދުވަހު ޝަރުއީ ދާއިރާއަށް ޚިދުމަތްކުރައްވައި، ރިޓަޔަރކޮށްފައިވާ މުވައްޒަފަކަށް ޝަރަފުގެ ފިލާ ދެއްވާފައިވެއެވެ.

މި ދަތުރުގައި އުއްތަމަ ފަނޑިޔާރު ވަނީ ރ. އަތޮޅުގެ ވާދޫ، ރަސްގެތީމު، އަނގޮޅިތީމު އަދި އުނގޫފާރު މެޖިސްޓްރޭޓް ކޯޓުގެ މުވައްޒަފުންނާ ބައްދަލުކުރައްވާފައެވެ. މި ބައްދަލުވުންތަކުގައި، ކޯޓުގެ މަސައްކަތްތަކުގައި ދިމާވާ ދަތިތަކާ ގުޅޭގޮތުން މެޖިސްޓްރޭޓުންނާއި މުވައްޒަފުންނާ ވާހަކަދައްކަވާފައިވެއެވެ.