އަހަރުމެން އިންސާނުންނަކީ ކަންތައްތައް ނުލާހިކު އަވަހަށް ހަނދާން ނެތޭ ބަޔެކެވެ. އަދި ގިނަފަހަރަށް ޝުކުރުވެރިވުން ވެސް ކުޑަ ބަޔެކެވެ. މާތްﷲ އަހަރުމެންނަށް އެތައް ލުއިފަސޭހަތަކާއި ނިއުމަތްތައް މިދުނިޔެ މަތީގައި ލައްވާފައިވާއިރު ގިނަފަހަރަށް އެކަލާނގެއަށް ޒިކުރުކޮށް، ޝުކުރު ކުރުމަށް އަހަރުމެން ނުކުޅެދެއެވެ. މިކަން އިހުސާސް ވަނީ ދުނިޔެމަތީގައި އެތައް ވޭންތަކެއް ތަހައްމަލުކުރަމުންދާ މީހުންނާއި ދިމާވެ، އެމީހުންގެ ވާހަކަތައް އަޑުއިވުމުންނެވެ. ދުނިޔޭގައި ދިރިހުރުމަށްޓަކައި އެމީހުން ކޮންމެ ދުވަހަކު ކުރަން ޖެހޭ ހިތްދަތި ހަނގުރާމައިގެ ވާހަކަތައް އެނގުމުންނެވެ.

އުމުރުން 25 އަހަރުގެ ނައުޝާ އިރުޝާދަކީ ވެސް ދުނިޔޭގައި ދިރިހުރުމަށްޓަކައި މިފަދަ ހަނގުރާމެއް ކުރަމުންދާ ހިތްވަރުގަދަ މީހެކެވެ. ނައުޝާ އަކީ ކުރިން އަހަރުމެންފަދައިން، އާއިލާއާއެކު އުފާވެރި ދުވަސްތައް ވޭތު ކުރަމުންދިޔަ މީހެކެވެ. އެހެންނަމަވެސް ފާއިތުވި އެއްއަހަރު ދުވަހުގެ ތެރޭގައި ދިރިއުޅުން މިވަނީ އެފުށުން މިފުށަށް ޖަހާފައެވެ. މިދިޔަ އަހަރު ނޭވާލާން އުނދަގޫވެގެން ޑޮކްޓަރަށް ދެއްކިއެވެ. ބައެއް ޓެސްޓްތައް ހެދުމަށްފަހު ފުއްޕާމޭގެ ބައްޔެއް ހުރިކަން ނައުޝާއަށް އެނގުނެވެ. އެހެންނަމަވެސް ސީދާ އެއީ ކޮންބަޔެއްކަން ދެނެގަތުމަށްޓަކައި ފުއްޕާމޭގެ ޚާއްސަ ޑޮކްޓަރަކަށް ދެއްކުމަށް ހޮސްޕިޓަލުން އިރުޝާދު ދިނެވެ.

އޭރު ވެސް ނޭވާލާން ނައުޝާއަށް އުނދަގޫވެއެވެ. ކުޑަކޮށް ހިނގާލިޔަސް މިހާ ހުންނަނީ ވަރުބަލިވެފައެވެ. ނައުޝާގެ ހާލަތު އިތުރަށް ގޯސްވާތީ ނައުޝާގެ ފިރިމީހާ ނިންމީ، ރާއްޖެއިން ބޭރުން ފަރުވާ ހޯދުމަށެވެ. އެހެންކަމުން ނައުޝާ ގޮވައިގެން އިމަރޖެންސީކޮށް އިންޑިއާއަށް ފުރިއެވެ. އިންޑިއާއަށް ދިޔައިރުވެސް، އޮކްސިޖަން ލެވަލް ދަށްވެގެން ފްލައިޓް ތެރެއިން ވެސް ނައުޝާއަށް ވަނީ ފަރުވާދީފައެވެ. އިތުރަށް ހެދި ޓެސްޓްތަކުން އިންޑަސްޓްރިއަލް ލަންގް ޑިޒީޒް ހުރިކަން އެނގުނެވެ. މި ބަލި ޖެހުމުން ފުއްޕާމޭގައި ހުންނަ ޓިޝޫޓައް ވަރަށް އަވަހަށް ހަލާކުވެ، ޕުއްޕާމެއިން އޮކްސިޖަން ފޯރުކޮށެއް ނުދެއެވެ. އޭގެފަހުން ތިން ދުވަސްވަންދެން ދެ ލީޓަރުގެ އޮކްސިން ނައުޝާ ބޭނުން ކުރަން ޖެހުނެވެ. އެފަރުވާ ހޮސްޕިޓަލުން ނެގުމަށްފަހު، ގޭގައި ހުރެގެން އޮކްސިން ބޭނުންކުރެވޭ ގޮތަށް ނައުޝާ ވަނީ ގެއަށް ދޫކޮށްލާފައެވެ.

އޭގެފަހުން ވެސް ހާލަތު ގޯސްވެގެން ހޮސްޕިޓަލުގެ އައިސީޔޫގައި ނައުޝާ އެޑްމިޓް ކުރިއެވެ. އެ ވޭނު ގައި ފަސް މަސްދުވަސް ހޭދަކުރުމަށްފަހު، އަނބުރާ ރާއްޖެއަޔެވެ. އެ ފަސްމަސް ދުވަހަށް ބޭސްފަރުވާއަށް 48،000 ޑޮލަރު ނައުޝާގެ އަތުން ޚަރަދުވިއެވެ. މާލެ އައުމަށްފަހު ވެސް ނައުޝާގެ ދިރިއުޅުން އެއްކޮށް ބިނާވީ، ނޭވާލުމަށް އޮކްސިން ހޯދުމަށެވެ. ފުރޮޅުލީ ގޮނޑިއެއްގައި، މުޅި ދުވަހު އެއްކޮށް، އޮކްސިންޖް ހޯދުމަށް ބޭނުންވާ ހޮޅި އަޅައިގެން ނައުޝާ އުޅެއެވެ. އުނދަގޫވި ނަމަވެސް ނައުޝާގެ ހިތުގައި އޮތީ އެންމެ އުންމީދެކެވެ. އާއިލާއާއެކު އަދި މިދުނިޔެމަތީގައި އުފާވެރި ދުވަސްތަކެއް ހޭދަކޮށްލަން ބޭނުންވާކަމެވެ.

މި އުންމީދުގައި ހުއްޓާ، ރާއްޖޭގެ ޑޮކްޓަރުންނަށް ދެއްކުމުން ލަފާ ދިނީ، ނައުޝާ ރާއްޖެއިން ބޭރަށް ގޮސް ފުއްޕާމޭގެ ޓްރާންސްޕްލާންޓް ހެދުމަށެވެ. އެކަމަށް ތައްޔާރުވަމުން ދަނިކޮށް ނައުޝާގެ ހާލަތު އަނެއްކާވެސް ގޯސްވެގެން ހޮސްޕިޓަލުގައި އެޑްމިޓްކޮށްގެން ފަރުވާދިނެވެ. ރާއްޖެއިން ފަރުވާ ހޯދުމަށްފަހު ނައުޝާގެ އާއިލާއިން ފުރީ އިންޑިއާއަށެވެ. ފުއްޕާމޭގެ ޓްރާންސްޕްލާންޓް ހެދުމަށެވެ. އެތަނުން ބެލުމަށްފަހު ޑޮކްޓަރު ބުނީ ނައުޝާ ޖެހޭނީ ޑަބަލް ލަންގް ޓްރާންސްޕްލާންޓް ހެދުމަށް ކަމަށެވެ. އަދި އެއީ އޮތް އެންމެ ފަހު ގޮތްކަމަށް ވެސް ޑޮކްޓަރު ބުންޏެވެ. ނައުޝާ މިހާރު ތައްޔާރުވަމުންދަނީ ޑަބަލް ލަންގް ޓްރާންސްޕްލާންޓް ހެދުމަށެވެ. ބޭނުންވަނީ ހެޔޮ އެދޭ އެންމެންގެ ދުޢާ އާއި ދީލަތި އެހީއެވެ. ނައުޝާ ފުއްޕާމޭގެ ޓްރާންސްޕްލާންޓް ހެދުމަށް އެއްކުރި ފައިސާ ވެސް ޚަރަދު ކުރަން ޖެހުނީ އިންޑިއާއަށް ފުރުމުގެ ކުރިން ހޮސްޕިޓަލުގައި އެޑްމިޓްކޮށް ފަރުވާ ހޯދުމުން އެކަމަށެވެ. ގާތްގަނޑަކަށް އެފަހަރު ވެސް މުޅި ދަތުރަށް 45،000 ރުފިޔާ ޚަރަދު ކުރަން ޖެހުނެވެ. އެއީ އާސަންދަ ނެތް ހޮސްޕިޓަލަކަށްވުމުންނެވެ.

އާއިލާ މީހުން ދިން ފައިސާ އިންނާއި ލޯނު ނަގައިގެން ނައުޝާ މިހާރު އިންޑިއާގައި ދުވަސްތައް ވޭތުކުރަމުންދަނީ ލަންގް ޓްރާންސްޕްލާންޓް ހެދޭނެ ދުވަހަކަށެވެ. ޑޯނަރެއްގެ ފުއްޕާމެ އިންޑިއާގެ އެހެން ސިޓީއަކުން ހަމަޖެހި، ބެންގަލޫރަށް ގެންނަން 10،000 ޑޮލަރު ހޭދަވާނެއެވެ. ފައިސާގެ ގޮތުން ދަތިތަކާއި ކުރިމަތިވިނަމަވެސް ނައުޝާގެ އުންމީދަކީ އެ ފައިސާ ދާދިއަވަހަށް ހަމަޖެހިގެން ދިޔުމެވެ. މިހާރު ވެސް އޮކްސިޖަން ސިލިންޑަރަށް ކޮންމެ މަހަކު ނައުޝާގެ އަތުން 500 ޑޮލަރު ޚަރަދު ކުރަންޖެހެއެވެ.

ނައުޝާ މިފަދަ ވޭނެއް ތަހައްމަލުކުރަމުންދާއިރު އޭނާއަށް އެންމެ ފުރަތަމަ ދުވަހުން ވެސް އެހީތެރިވެދިނީ އާއިލާގެ މީހުންނެވެ. އުންމީދު ކަނޑާނުލާ ދިމާވި ކޮންމެ ގޮންޖެހުމަކާއެކު ވެސް އަނބިމީހާއާއެކު ސާބިތުކަމާއެކު، ނައުޝާގެ ފިރިމީހާ ހުއްޓެވެ. ނުނިދާ، ގައި މޮޑެލަ މޮޑެލާ ނައުޝާގެ މަންމަ ހުރީ ކިތައް ދުވަހު ކަމެއް ވެސް އޭނާއަކަށް ބުނާކަށް ނޭނގެއެވެ. ނައުޝާގެ މިވޭންތައް އެންމެ ކައިރިއިން ފެނުނު އަނެކަކީ ނައުޝާގެ އަންހެން ދަރިފުޅެވެ. އުމުރުން އެންމެ 6 އަހަރުގެ އެ ދަރިފުޅަށް މާބޮޑު އެއްޗެއް ނުވިސްނު ނަމަވެސް މަންމަގެ ހާލު އިހްސާސްވެއެވެ. މަންމަ ގާތުގައި ކޮންމެ ދުވަހަކުމެ ބުނަނީ އެއްވާހަކައެކެވެ. އިރާދުކުރެއްވިއްޔާ މަންމަ ވަރަށް އަވަހަށް ރަނގަޅުވާނެއެވެ.

އެހެންމީހުންނެކޭ އެއްފަދައިން ނައުޝާ ވެސް ބޭނުންވަނީ އާއިލާއާއެކު އުފާވެރި ދިރިއުޅުމެއް އުޅެވޭނެ ދުވަހެއް މާތްﷲ މިންވަރު ކުރެއްވުމެވެ. މި ދުނިޔެމަތީގައި އަދި ގިނަ ދުވަސްތަކެއް އާއިލާއާއެކު ހޭދަކޮށް، ލޯބިވާ ފިރިމީހާ އާއި ދަރިފުޅު ގައިގައި ބައްދާލެވި، އަރާމު ނިންޖެއް ނިދާލެވޭނެ ދުވަހެއް ފެނިގެން ދިޔުމެވެ.

ނައުޝާގެ އެކައުންޓް ނަންބަރު:7703532478101