ދިވެހިރާއްޖެއާއި ޗައިނާގެ ޑިޕްލޮމެޓިކް ގުޅުމަށް 50 އަހަރު ފުރުން ފާހަގަކޮށްފިއެވެ.
ރާއްޖެއާ ޗައިނާއާ ދެމެދު ޑިޕްލޮމެޓިކް ގުޅުން ގާއިމުކުރިތާ 50 އަހަރު ފުރުން ފާހަގަކުރުމުގެ ގޮތުން ހޮނިހިރު ދުވަހު ދަރުބާރުގޭގައި ވަނީ ޚާއްސަ ރަސްމިއްޔާތެއް ބާއްވާފައެވެ.
މި ރަސްމިއްޔާތުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި ނައިބު ރައީސް ފައިޞަލް ނަސީމްގެ އިތުރުން ޗައިނާ ސަފީރު ވަން ލިޒިން ބައިވެރިވެވަޑައިގެންނެވިއެވެ. މީގެއިތުރުން ސަރުކާރުގެ އިސްވެރިންވެސް ބައިވެރިވެވަޑައިގެންނެވިއެވެ.
ރަސްމިއްޔާތުގައި ވާހަކަފުޅުދައްކަވަމުން ޗައިނާގެ ސަފީރު ވިދާޅުވީ، ދެ ގައުމުންވެސް އެއް ގައުމު އަނެއް ގައުމަށް އިހްތިރާމްކޮށް، ދިމާވި ކޮންމެ ކަމެއްގައި އެއްބާރުލުން ފޯރުކޮށްދީފައިވާ ކަަމަށެވެ. އަދި ރާއްޖެއިން ވަން ޗައިނާ ޕޮލިސީ ދަމަހައްޓަމުންދާ ކަމަށާއި، ދެ ގައުމުން ފާއިތުވި އަހަރު ރަނގަޅު ގުޅުމެއް ދަމަހައްޓާފައިވާކަމަށެވެ.
މި ރަސްމިއްޔާތުގައި ޗައިނާގެ ސަފީރު ވަނީ ދެ ގައުމުގެ ސްޓޭމްޕްތައް އެކުލެވިގެންވާ ކަވަރެއް ރައީސަށް ހަދިޔާކުރައްވާފައެވެ.
މީގެއިތުރުން ޗައިނާ ސަފީރާއި ރާއްޖޭގެ ފޮރިން މިނިސްޓަރ އަބްދުﷲ ޝާހިދު ވަނީ މި މުނާސަބަތާ ގުޅިގެން ކޭކު ފަޅުއްވާފައެވެ.
ޗައިނާއާއި ރާއްޖޭގެ ގުޅުމަށް 50 އަހަރު ފުރުން ފާހަގަކުރަމުންދާއިރު ޗައިނާއިން ވަނީ ރާއްޖޭގެ ތަރައްގީގެ މަޝްރޫއުތަކުގައި އެހީތެރިކަން ފޯރުކޮށްދީފައެވެ. އެގޮތުން 1990 ވަނަ އަހަރު ސިނަމާލެ ފްލެޓް އަޅާފައިވަނީ ޗައިނާގެ އެހީތެރިކަމާއެކުގައެވެ. އޭގެފަހުން ހުޅުމާލެ ފޭސް އެކެއް، އަދި ދޭއްގައިވެސް ފްލެޓްތައް އެޅުމަށް ޗައިނާއިން ވަނީ އެހީތެރިކަން ފޯރުކޮށްދީފައެވެ.
