ރާއްޖެއަށް މިހާރު ކުރާ ވިއްސާރައާ ގުޅިގެން، ބ އަތޮޅުން ފެށިގެން ލ އަތޮޅާ ހަމައަށް ވައިޓް އެލަރޓް ނެރެފިއެވެ.

ވައިޓް އެލަރޓް ނެރެފައިވަނީ ހޮނިހިރު ދުވަހުގެ ހެނދުނު 6:40ން 11:30އާ ހަމައަށެވެ. މި ވަގުތުތަކުގައި ގުގުރުމާއެކު ބޯކޮށް ވާރޭ ވެހޭނެކަމަށް މޫސުމާބެހޭ ގައުމީ އިދާރާއިން ވަނީ ލަފާކޮށްފައެވެ.

އެ އިދާރާއިން ބުނެފައިވާގޮތުގައި އެލަރޓްގެ މުއްދަތުގެ ތެރޭގައި ގަޑިއަކު 19 މޭލާ 24 މޭލާ ދެމެދުގެ ބާރުމިނުގައި ވައިޖެހި، ވިލާގަނޑުގައި ގަޑިއަކު 45 މޭލަށް ވައި ގަދަވާނެއެވެ. އަދި ކަނޑުތައްވެސް ގަދަވާނެކަމަށް ވަނީ ލަފާކޮށްފައެވެ.

މޫސުމާ ބެހޭ ގައުމީ އިދާރާއިން ލަފާކުރާގޮތުގައި މިއަދު އިރުއޮއްސި 6:00 ޖެހުމާ ހަމައަށް ރާއްޖޭގެ މޫސުން ގޯސްވާނެއެވެ. އެގޮތުން، ރާއްޖޭގެ އެކި ހިސާބުތަކަށް ވިއްސާރަކުރާނެކަމަށް ލަފާކޮށްފައިވާއިރު، ދިޔަވަރު ބޮޑުވާ ގަޑިތަކުގައި ބައެއް ރަށްތަކަށް އުދައެރުމަކީ އެކަށީގެންވާ ކަމެއް ކަމަށްވެސް އެ އިދާރާއިން ވަނީ ބުނެފައެވެ.

ރާއްޖެއަށް ކުރަމުން އަންނަ ވިއްސާރައިގައި ކަނޑުތައް ގަދަވުމުގެ ސަބަބުން، ކަނޑުދަތުރުކުރާ ފަރާތްތަކުން މޫސުމަށް ޚާއްސަ ސަމާލުކަމެއް ދިނުމަށް ކަމާބެހޭ އިދާރާތަކުން އިލްތިމާސްކުރެއެވެ. އެގޮތުން، އަޅަން ޖެހޭ ރައްކާތެެރިކަމުގެ ފިޔަވަޅުތައް އެޅުމަށާއި ދަތުރަށް ފެށުމުގެ ކުރިން މޫސުން ކުރިއަށް އޮތްގޮތް ބެލުމަށް ވަނީ އިލްތިމާސްކޮށްފައެވެ.