ރާއްޖޭގެ ފަތުރުވެރިކަމުގެ ސިއްރަކީ އަދި އަސްލަކީ ދިވެހި ޒުވާނުން ރިސޯޓުތަކުގައި ތިބެގެން ކުރި މަސައްކަތް ކަމަށް ރައީސުލްޖުމްހޫރިއްޔާގެ ނައިބު ފައިސަލް ނަސީމް ވިދާޅުވެއްޖެއެވެ.
ނައިބު ރައީސް މިފަދައިން ވިދާޅުވީ ރާއްޖޭގެ ފަތުރުވެރިކަމަށް 50 އަހަރު ފުރުން ފާހަގަކުރުމުގެ ގޮތުން ރ. އަތޮޅު ކައުންސިލުން އިސްނަގައިގެން ބޭއްވި ހަރަކާތްތަކުގެ ނިމުން ފާހަގަކުރުމަށް ހޮނިހިރު ދުވަހުގެ ރޭ ރ. ދުވާފަރުގައި ބޭއްވި ހާއްސަ ރަސްމިއްޔާތު ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ. މި ރަސްމިއްޔާތުގައި އެމަނިކުފާނު ވަނީ ރާއްޖޭގެ ފަތުރުވެރިކަން މިއަދު މިދެކޭ ކާމިޔާބީއާ ހިސާބަށް ވާސިލު ކުރުމަށް ދިވެހިންނާއި، ދިވެހިންނާ ގުޅިގެން މަސައްކަތް ކުރި އެހެނިހެން ޤައުމުތަކުގެ މީހުން ހިމެނޭހެން އެންމެނަށް ޝުކުރު އަދާ ކުރައްވާފައެވެ.
އެމަނިކުފާނު ވިދާޅުވީ ރާއްޖޭގެ ފަތުރުވެރިކަމަށް 50 އަހަރު ވެފައިވާއިރު އެ ދާއިރާ ކާމިޔާބު ކަމާއެކު ކުރިއަށްގެންދެވެނީ ވަރަށް ގިނަ ބައެއްގެ ބުރަ މަސައްކަތުން ކަމަށެވެ. މީގެ ތެރެއިން ހާއްސަކޮށް ދިވެހި ޒުވާނުން ފާހަގަކުރައްވާ ނައިބު ރައީސް ވިދާޅުވީ އެފަރާތްތަކުން އެކަން ކުރީ އާއިލާއާ ދުރުގައި އެތައް ދުވަހަކު ތިބެގެން ކަމަށެވެ. އެހެންވެ އެ ފަރާތްތަކުގެ އަގު ތާއަބަދު ވަޒަން ކުރަން ޖެހޭނެ ކަމަށް އެމަނިކުފާނު ވިދާޅުވިއެވެ.
މިއަދު އެއް ރަށުން އަނެއް ރަށަށް ހެނދުނު ފުރައިގެން ދެވުނު ނަމަވެސް، ދަތުރުފަތުރު ފަސޭހަކޮށް އޮތް ނަމަވެސް ކުރީގައި އެކަންތައްތައް އޮތީ އެގޮތަކަށް ނޫން. އާއިލާއާ ދުރުގައި، ދަރިންނާ ދުރުގައި، އަހަރަކު އެއްފަހަރު އާއިލާ ދެކެން ފުރުސަތު މި ލިބެނީ. އެ ދުވަހުވެސް ވަރަށް ބުރަ މަސައްކަތްތަކެއް ބަޔަކު ކުރި. ދަތި އުދަނގުލުގެ ތެރޭގައި ބަޔަކު މަސައްކަތް ކުރި. އަޅުގަނޑު ގަބޫލު ކުރާ ގޮތުގައި އެއީ އެ ބޭފުޅުން ޤައުމަށްޓަކައި، މި ދުވަސް ގެނައުމަށްޓަކައި ވި ގުރުބާނީއެއްގެ ގޮތުގައިނައިބު ރައީސް ފައިސަލް ނަސީމް
ނައިބު ރައީސް ވިދާޅުވީ ފަތުރުވެރިކަމުގައި މިހާތަނަށް ރާއްޖެއިން ދައްކާފައިވާ ނަމޫނާ ދެމެހެއްޓުމަކީ ފަސޭހަ ކަމެއް ނޫން ކަމަށާއި ކުރިއަށް އޮތް ދުވަސްތަކުގައި ގޮންޖެހުންތައް އަންނާނެ ކަމަށް ދެކިގެން ތިބެން ޖެހޭ ކަމަށެވެ. އެގޮތުން، މޫސުމަށް އަންނަ ބަދަލުތަކާ އެ ނޫންވެސް އެހެނިހެން ކަންކަމުގެ ސަބަބުން ފަތުރުވެރިކަމަށް އަސަރު ކުރުމަކީ އެކަށީގެންވާ ކަމެއް ކަމަށާއި އެފަދަ ކަމެއް ދިމާވާއިރު އެކުވެރިކަމާ އެކު އެއް އަޒުމެއްގައި މަސައްކަތް ކުރަންޖެހޭކަމަށް އެމަނިކުފާނު ވިދާޅުވިއެވެ.
ނާއިބު ރައީސް ވިދާޅުވީ ރާއްޖޭގެ ވެރިއެއްގެ ހައިސިއްޔަތުން މިހާތަނަށް ޤައުމަށްޓަކައި އެންމެ މުހިންމު ނިންމުން ނިންމެވި ވެރިއަކީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ކަމަށެވެ. އެގޮތުން ކޮވިޑުގައި މުޅި ދުނިޔެ ބަންދުވެފައި އޮއްވާ ރައްކާތެރިކަމާއެކު ދަތުރުފަތުރަށް ހުޅުވާލައި، ފަތުރުވެރިކަން ކުރިއެރުވޭނެކަން މުޅި ދުނިޔެއަށް ދެއްކެވި ވެރިޔަކީ ރައީސް ޞާލިހުކަމަށް ނައިބް ރައީސް ވިދާޅުވިއެވެ.
ރ. ޓޫރިޒަމް އެކްސްޕޯ 2022 ނިންމައި އެވޯޑު ހަވާލު ކުރުމަށް ބޭއްވި މި ރަސްމިއްޔާތުގައި ރ. އަތޮޅުގައި ފަތުރިވެރިކަމަށް ޚިދުމަތް ކުރެއްވި 80 އަށްވުރެ ގިނަ ބޭފުޅުންނަށް ވަނީ ޚިދުމަތުގެ އަގުވަޒަންކޮށް އެވޯޑު ދީފައެވެ.
