މިފެންނަނީ، މިއަހަރުގެ މޭ މަހުގެ 29 ވަނަ ދުވަހު، އަރިއުތުރު އުކުޅަހުގާ އަޅުގަނޑު ހާމަ ކުރި ބަސްތަކުގެ، ޢަމަލީ ތަރުޖަމާ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ބޮޑު ތިލަދުންމަތި ގުޅާލުމުގެ ނަމުގައި، ރާއްޖެ ޓްރާންސްޕޯޓް ލިންކުގެ ހިދުމަތް ރަސްމީކޮށް ފެށުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ. ރައީސް ވިދާޅުވީ އުކުޅަހުގެ އެދުވަހާ، ދިއްދޫގެ މިދުވަހާ ދެމެދު، އަދި ކިރިޔާމިވީ އެންމެ 4 މަސް ކަމަށެވެ.
އެ ދުވަހު އަޅުގަނޑު ދެންނެވިން، ސަރުކާރުގެ ހުރިހާ ސިޔާސަތުތަކާ، އަމާޒު ގޮސްނިމޭ، ވަކި ޚާއްޞަ ދިމާއެއް އޮންނަ ވާހަކަ. މާނަވީ ޖަޒީރާ ރާއްޖޭގެ އަމާން ބަނދަރު ހިފުމަށްޓަކާ، ދާންޖެހޭ މަގަކާ، ވާންޖެހޭ ކަންތައްތަކެއް ހުރި ވާހަކަ. ބޮޑު ތިލަދުންމައްޗަށް އަދި ރާއްޖޭގެ އުތުރަށް، މިހާރު ޖެހެން މިފެށީ، މިދެންނެވި ބޮޑު ބަދަލުގެ، ހެޔޮ ރޯޅި. އަޅުގަނޑު ދެންނެވިން، މިއީ އޮތްދިގަށް ސަރާސަރު މަގުން ހިނގާ، ވިއަވަތި ރާއްޖެ ކަމުގާ ވާންޖެހޭ ވާހަކަ. އެރާ އްޖޭގާ ކުޑައެއް ބޮޑެއް، އުތުރެއް ދެކުނެއް، އަދި މެދުރާއްޖެއެއްނެތި، ހަމަހަމަކަން އޮންނަންޖެހޭ ވާހަކަ.ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު
ރައީސް ވިދާޅުވީ މިސަރަޙައްދުގެ 41 ރަށް އަމުނާ، ގަތާ، ބަދަހިކުރަމުންދާ، އާރުޓީއެލްގެ ރޫޓް ތަކުން އެފެންނަނީ، މިދެންނެވި ހަމަހަމަކަން ކަމަށެވެ. އެދުވަހުވެސް، އަދި މިއަދުވެސް ދަންނަވަން އޮތީ، ހަމަ އެވާހަކަ ކަމަށެވެ. އެއީ މީސްކޮޅު މަދުވެ، ވަޞީލަތްތަށް އުނިވެ، ދުރުގާ އެކަހެރިވެ އޮތް ގާމަތީ ފެންލޮނު ރަށެއް، މިރާއްޖޭގާ ނޯންނާނެ ވާހަކަ ކަމަށެވެ.
ތުރާކުނުގާ ހުރިމީހާ، ތުރާލެއްނެތި، ސީދާ ރާސްތާގައި، އިހަވަންދޫ، ކުޅުދުއްފުށި އަދި ފުނަދޫ މެދުވެރިކޮށް، މިހާރު އުނދަގުލަކާ ނުލާ، މާއުނގޫދޫ އަށް ވާޞިލުވެވޭނެ ކަމަށް ރައީސް ވިދާޅުވިއެވެ. މިއީ މީގެ ކުރިން އޮތް، އަދި ލިބިދާނެ ކަމަށް ހީވެސް ނުކުރާ، ބޮޑު ފަސޭހަ އެއް ކަމަށާއި، ބޮޑު ތިލަދުންމަތި، ނުވަތަ ރާއްޖޭގެ އުތުރޭ ބުނެ ފުއްދާލެވޭ ވަރަށްވުރެ، ހުރިހާ ގޮތަކުންވެސް މިޞަރަހައްދު މުހިންމު ކަމަށެވެ.
މިއީ ދުނިޔޭގެ ދެބައިދަނޑިއާ އެއް މިސްރާބުގައިވާ، އެންމެ އުތުރުގެ ސަރަޙައްދު. ބައިނަލް އަޤްވާމީ ކަނޑު ދަތުރުފަތުރުގެ ރަސް އަނގޮޅިއަށް، މަލަ ދީގެން އޮތް ޖަޒީރާ ރަށްތައް. ދުނިޔޭގެ އިރުމައްޗާ ހުޅަނގު ގުޅުވައިދޭ، މިދެންނެވި ރަސްއަނގޮޅި އޮތީ، ދަށްބިތުގެ ގޮތުގާ ނަންކިޔޭ، ކެލާ-ބާރަށް-ފިއްލަދޫ އަދި މި ދިއްދޫގެ އިރުން، އިހަވަންދިއްޕޮޅުގެ އުތުރުން. އިހު ޒަމާނުގާ، ބަޔާޅީސް ރިޔަލުގެ ބޮޑެތި ނާޒޯނގު ފަހަރު. މިޒަމާނުގާ މާސިންގާ ބަލްކް-ކެރިއަރު ތަކާ، އަދި ކަނޑުހިފައިގެންދާ އެއަރ ކްރާފްޓް ކެރިއަރތަކާ، މަނަވަރު ތަކާ އާގުބޯޓް ފަހަރުގެ ދަތުރު ތައް. މިސަރަޙައްދުގެ އަނގަމަތީގާ، ތާއަބަދު ހިނގަނީ، މާސިންގާ މާކަނޑުގެ ހަލަބޮލި ބާޒާރު. އޭރުވެސް މިހާރުވެސް އެތަން ހަމަލޮލުން ދެކެނީ، ފުށޮޅަށް މަހަށް ނުކުމެ، އުތުރަށް މިސްރާބު ޖަހާ މަސްވެރިން.ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު
އިހަވަންދިއްޕޮޅުގެ ވާހަކަ ރައީސް ފާހަގަކުރައްވާފައިވާއިރު، އިހަވަންދިއްޕޮޅުގައި އާގުބޯޓުފަހަރަށް ބަންކަރިންގެ ހިދުމަތް ދިނުމަށް ސަރުކާރުން ވަނީ މަސައްކަތް ފަށާފައެވެ. މި މަސައްކަތް ކުރުމަށް ބޭނުންވާ ދިރާސާތައް ހަދަމުން އަންނަ އިރު، މި އަހަރުގެ ތެރޭގައި މި މަސައްކަތް ފެށިގެންދާނެކަމަށް އިކޮނަމިކް މިނިސްޓަރ ފައްޔާޒު އިސްމާއިލް އާއި ޓްރާންސްޕޯޓް މިނިސްޓަރ އައިޝަތު ނަހުލާ ވަނީ ވިދާޅުވެފައެވެ.
