ސިވިލް ކޯޓުގެ ގާޒީކަމަށް ކުރިމަތިލުމުގެ ފުރުސަތު ހުޅުވާލައިފިއެވެ.

ޖުޑީޝަލް ސަރވިސް ކޮމިޝަން (ޖޭއެސްސީ)ން ބުނީ 2 ގާޒީން ހޯދުމަށް އިއުލާނުކޮށްފައިވާކަމަށެވެ.

ސިވިލް ކޯޓުގެ ގާޒީކަމަށް ކުރިމަތިލާ މީހެއްގެ ކިބައިގައި ހުންނަންޖެހޭ ޝަރުތުތައް ޖޭއެސްސީން ވަނީ އާންމުކޮށްފައެވެ. މިގޮތުން އުމުރުން 25 އަހަރު ފުރިފައިވާ މީހަކަށް ވުމާއި، އިސްލާމީ ޝަރީޢާ ނުވަތަ ޤާނޫނު ނުވަތަ ޤާނޫނާއި އިސްލާމީ ޝަރީޢާގެ ރޮނގުން ފުރަތަމަ ޑިގްރީ ހާސިލުކޮށްފައިވުމާއި، ފަނޑިޔާރު ނުވަތަ ގާނޫނީ ވަކީލުކަމުގައި މަދުވެގެން ދެ އަހަރުގެ ތަޖުރިބާ ހުރި މީހަކަށް ވާންޖެހުން ހިމެނެއެވެ، މީގެ އިތުރުންވެސް ފުރިހަމަވާންޖެހޭ ޝަރުތުތަކެއް ޖޭއެސްސީން އާންމުކޮށްފައިވެއެވެ.

ޖޭއެސްސީން ބުނީ ސިވިލް ކޯޓުގެ ގާޒީންނަށް އަސާސީ މުސާރައިގެ ގޮތުގައި 30،000 ރުފިޔާ ލިބޭނެ ކަމަށާއި، ލިވިންގ އެލަވަންސްގެ ގޮތުގައި މަހަކު 15،000 ރުފިޔާ ލިބޭނެ ކަމަށެވެ. އަދި ރިސްކް އެލަވަންސްގެ ގޮތުގައި މަހަކު 1،650 ރުފިޔާ ލިބޭނެކަމަށް ޖޭއެސްސީން ބުނެފައިވެއެވެ. އަދި ރައްޔިތުންގެ މަޖިލީހުން ކަނޑައަޅާ ގޮތުގެ މަތިން މެޑިކަލް އިންޝުއަރެންސާއި ފޯނު އެލަވަންސް ވެސް ލިބޭނެ ކަމަށް ޖޭއެސްސީން ބުނެފައިވެއެވެ.

ގާޒީކަމަށް ކުރިމަތިލުމުގެ ފުރުސަތު ހުޅުވާލާފައިވަނީ 3 އޮކްޓޫބަރު 2022 ވަނަ ދުވަހުގެ 13:00ގެ ނިޔަލަށެވެ.