ރަށްރަށުން ހުށަހަޅާ ލޭން ޔޫސް ޕްލޭން ތަކުގައި ރަނގަޅުކުރަން ހުރި ކަންކަން ފާހަގަކޮށް އެކަންކަން ރަނގަޅުކުރުމަށް "ކޮންޑިޝަނަލް އެޕްރޫވަލް" އެއް ނުވަތަ ޝަރުތު ތަކަކާއެކު ހުއްދަ ދެއްވުމަށް މަސައްކަތް ކުރައްވާނެކަމަށް ޕްލޭނިން މިނިސްޓަރ މުހައްމަދު އަސްލަމް ވިދާޅުވެއްޖެއެވެ.
މިހާރު ކުރިއަށްދާ ވިއަވަތި ރާއްޖެ ކޮންފަރެންސްގެ ތެރެއިން ރާއްޖެއެމްވީއަށް ދެއްވި އިންޓަރވިއުއެއްގައި މިނިސްޓަރ އަސްލަމް ވިދާޅުވީ ރަށްރަށުގެ ލޭންޑް ޔޫސް ޕްލޭނުގެ މަސައްކަތަކީ ޒަމާންތަކެއް ވަންދެން ނުނިމި އޮތް މަސައްކަތެއް ކަމަށެވެ.
ލޭންޑް ޔޫސް ޕްލޭންގައި ބައެއް ކަންކަން ހިމެނުމަށް ގާނޫނުން ލާޒިމުކުރާ ކަމަށާއި، އޭގެ ތެރޭގައި އެ ރަށެއްގައި ހުރި ރުށްގަސް ގުނަންޖެހުން ފަދަ ކަންކަން ހިމެނޭކަމަށް މިނިސްޓަރ ފާހަގަކުރެއްވިއެވެ. ލޭންޑް ޔޫސް ޕްލޭންގައި ހިމަނާފައިވާ މައިގަނޑު ކަންކަން ރަނގަޅުވިޔަސް ރަނގަޅުކޮށްލަންޖެހޭ ކުދި ކުދި ކަންކަން ހުންނަ ކަމަށާއި، އެކަންކަން ފާހަގަކުރުމަށްފަހު ރަނގަޅުކުރުމަށް ކައުންސިލަށް ހުށަހަޅާނެ ކަމަށް މިނިސްޓަރ ވިދާޅުވިއެވެ. އެއީ ކޮންޑިޝަނަލް އެޕްރޫވަލްއެއްގެ ތެރެއިން ކަމަށް މިނިސްޓަރ ވިދާޅުވިއެވެ.
ރަށްރަށުގެ ލޭންޑް ޔޫސް ޕްލޭން ހަދާ ނުނިމުމުގެ ސަބަބުން ރަށްރަށުން ގޯތި ދޫކުރުމުގެ މަސައްކަތް ވަނީ ވަރަށް ބޮޑަށް ފަސްވެފައެވެ. އެހެންކަމުން ލޭންޑް ޔޫސް ޕްލޭނާ ގުޅޭ ގިނަ މައްސަލަތަކެއް ކައުންސިލްތަކުން ވަނީ ވިއަވަތި ކޮންފަރެންސަށް ހުށަހަޅާފައެވެ. މީގެ ތެރޭގައި ފަންނީ މީހުން ނެތުމާއި، ވަސީލަތް މަދުވުމާއި، ބަޖެޓް ނެތުމާއި އަދިވެސް މިނޫން ގިނަ މައްސަލަތަކެއްވެސް ކައުންސިލްތަކުން ހުށަހަޅާފައިވެއެވެ.
