ޖިންސީ އެކި ކުށްތަކުގައި ޖަލުގައި ތިބި މީހުންނަށް ރިހެބިލިޓޭޝަން ޕްރޮގްރާމެއް ހިންގުމަށް މަޝްވަރާ ކުރަމުންދާ ކަމަށް ކޮމިޝަނަރ އޮފް ޕްރިޒަންސް އަޙުމަދު މުޙައްމަދުފުޅު ވިދާޅުވެއްޖެއެވެ.

އަޙުމަދު ވިދާޅުވީ މި ބާވަތުގެ ކުށްތަކަށް އަމާޒުކޮށްގެން ރިހެބިލިޓޭޝަން ޕްރޮގްރާމުތައް ހިންގާފައިނުވާކަމަށާއި، މިފަދަ ޕްރޮގްރާމެއް ހިންގުމަށް ފެމިލީ ޕްރޮޓެކްޝަން އޮތޯރިޓީއާ މަޝްވަރާ ކުރަމުންދާކަމަށެވެ. ގެވެށި އަނިޔާއާއި ޖިންސީ އެކިއެކި ކުށްތަކަށް އަރައިގަންނަ މީހުން ރިހެބިލިޓޭޓްކުރުމަކީ ޕްރޮޓެކްޝަން އޮތޯރިޓީގެ މެންޑޭޓުގައިވެސް ހިމެނޭ ކަމެއް ކަމަށާއި އެ ޕްރޮގްރާމް މިހާރު ޑިޒައިންކޮށް ނިމިފައިވާކަމަށްވެސް ވިދާޅުވިއެވެ.

ޕްރޮގްރާމް އިތުރަށް ފުރިހަމަކޮށް ހިންގޭނެ ގޮތްތަކުގެ މަޝްވަރާތައް ކުރަމުންދާކަން ފާހަގަކުރައްވައި އަޙުމަދު ވިދާޅުވިއެވެ.

އަޙުމަދު މިފަދައިން ވިދާޅުވެފައިވާއިރު، ޖަލުގެ މާހައުލުގައި ޑްރަގް ރިހެބިލިޓޭޝަން ޕްރޮގްރާމެއް ހިންގަންޖެހުމުން ގޮންޖެހުންތަކާ ދިމާވިކަމަށްވެސް ކޮމިޝަނަރ ވިދާޅުވިއެވެ. މި ޕްރޮގްރާމަކީ ގޮންޖެހުންތަކާއެކު ކުރިއަށްގެންދިޔަނަމަވެސް، ކާމިޔާބު ޕްރޮގްރާމެއްކަން އޭނާ ފާހަގަކުރެއްވިއެވެ.

ގައިދީންނަށް ޚާއްސަކޮށްގެން ކުރިއަށްގެންދާ މި ޕްރޮގްރާމުގެ ފުރަތަމަ ބައި ނިންމާލާފައިވާއިރު މި ޕްރޮގްރާމް އިތުރަށް ފުޅާކުރުމަށް މިހާރު ދަނީ މަސައްކަތްތައް ކުރަމުންނެވެ. އެގޮތުން، މާފުށީ ޖަލާއި އައްސޭރި ޖަލުގައި މިކަމަށް ޚާއްސަ އިމާރާތްތަކެއް އެޅުމުގެ މަސައްކަތް މިހާރު ދަނީ ކުރަމުންނެވެ. މިއާއެކު އިންފްރާސްޓްރަކްޗަރގެ ގޮތުން ދިމާވެފައިވާ ގޮންޖެހުންތަކަށް ހައްލު ލިބިގެންދާނެއެވެ.

ރާއްޖޭގެ އެންމެ ފުރަތަމަ ޕްރިޒަން ބޭސްޑް ޑްރަގް ރިހެބިލިޓޭޝަން ޕްރޮގްރާމް ނިންމި 32 ގައިދީން މިހާރު ވަނީ މުޖުތަމައަށް ނެރެފައެވެ. އެއީ ހަތަރު މަރުހަލާއަަކަށް ބަހާލައިގެން ކުރިއަށްގެންދާ މި ޕްރޮގްރާމުގެ އެންމެ ފަހުގެ މަރުހަލާއެވެ. މި މަރުހަލާގައި ޕްރޮގްރާމް ނިންމާ މީހުން މުޖުތަމައަށް ނެރެނީ އެއް އަހަރު ދުވަހަށް، ޝަރުތުތަކާއެކުގައެވެ.

މި ޕްރޮގްރާމުގައި، މަސްތުވާތަކެތީގެ ނުރައްކަލާ ބެހޭގޮތުން މައުލޫމާތު ދިނުމުގެ ސެޝަންތައް ކުރިއަށްގެންގޮސްފައިވާއިރު، ތަފާތު ހުނަރުތައް ދަސްކޮށްދިނުމުގެ ކަންކަންވެސް ކުރިއަށްގެންދިޔަކަމަށް ކޮމިޝަނަރު ވިދާޅުވިއެވެ. އަދި، މި ޕްރޮގްރާމުގެ ދަށުން މުޖުތަމައަށް ނެރުނު މީހުންނަށް އެމްޓީސީސީގެ ސައިޓްތަކުން ވަޒީފާ ހަމަޖައްސާފައިވާ ކަމަށްވެސް އޭނާ ވިދާޅުވިއެވެ.

ކަރެކްޝަންސްއިން ކުރިއަށްގެންދިޔަ މި ޕްރޮގްރާމަކީ، މަސްތުގެ ވަބާގައި ޖެހިފައިވާ ގައިދީން ރިހެބިލިޓޭޓްކޮށް، ބޭނުންތެރި ބައެއްގެ ގޮތުގައި މުޖުތަމައަށް އަނބުރާ ނެރުމަށް އެ ފަރާތްތައް ޑިޓޮކްސްކޮށް ޑްރަގް ޓްރީޓްމަންޓު ދިނުމާއި، ދިރިއުޅުމުގެ ހުނަރުތަކާއި ވަޒީފާ އަދާކުރުމަށް ބޭނުންވާ ހުނަރުތައް ދަސްކޮށްދިނުމަށް ކުރިއަށްގެންދާ ޕްރޮގްރާމެކެވެ. މަސްތުވާތަކެއްޗާ ގުޅިގެން ހުކުމް ތަންފީޒުކުރަމުންދާ 40 ގައިދީންނާއެކު މި ޕްރޮގްރާމް ފެށިނަމަވެސް، އެކި ސަބަބުތަކާހުރެ މި ޕްރޮގްރާމް ކާމިޔާބުކަމާއެކު ފުރިހަމަކޮށްފައިވަނީ 32 ގައިދީންނެވެ.