ޔަޤީންކަމާއެކު ފުރަތަމަ ޑިވިޝަނަށްދާން ވަރުގަދަ ސްކޮޑެއް ބޭނުންވާކަމަށް ނިއުރޭޑިއަންޓްގެ ކޯޗު ސޮބާހު މުޙައްމަދު ބުނެފިއެވެ.
ތިން އަހަރުގެ ސަސްޕެންޝަނަކުން ސަލާމަތްވެ, ފުރަތަމަ ޑިވިޝަނަށް އަލުން ޕްރޮމޯޓްވާން ނިއުރޭޑިއަންޓް ކުރި މަސައްކަތް ނާކާމިޔާބުވެ, އެއިންތިޒާރު އިތުރު އަހަރަކަށް ދިގުލައިދިއުމުން ސޮބާ ބުނީ އޭނާއަށް ލިބުނީ ނިސްބަތުން ތަޖުރިބާހުރި ލިމިޓެޑް ކުޅުންތެރިން ކަމަށެވެ. ދެވަނަ ޑިވިޝަންގެ ސެމީފައިނަލްގައި ބުރު ސްޕޯރޓްސް ކްލަބް އަތުން ޕެނަލްޓީގައި ބަލިވުމުން ފައިނަލަށްވުރެ ބޮޑަށް ނިއުއަށް ގެއްލުނީ ފުރަތަމަ ޑިވިޝަނަށް ކޮލިފައިވުމަށް ކުޅެންޖެހޭ ކޮލިފިކޭޝަންއެވެ.
ސޮބާ ބުނީ ދެވަނަ ޑިވިޝަންގެ ފައިނަލަށް ދިޔަޔަސް އަދި އެމުބާރާތް ކާމިޔާބުކުރިޔަސް ފުރަތަމަ ޑިވިޝަނަށް ޕްރޮމޯޓްވުމަކީ އުނދަގޫ ކަމެއްކަމަށެވެ. އަދި އެކަމަށް ވަރުގަދަ ސްކޮޑެއް ބޭނުންވާކަމަށެވެ. ފުރަތަމަ ޑިވިޝަނުން ކޮލިފިކޭޝަން ކުޅޭ ދެޓީމްގެ ފެންވަރު ހުރިހާގޮތަކުންވެސް ރަނގަޅުވާނެކަން ސޮބާ ފާހަގަކުރިއެވެ.
މެޗު ފިޓްނަސްއަށް ބެލިޔަސް, ކުޅުންތެރިންގެ ފެންވަރަށް ބެލިޔަސް, ފުރަތަމަ ޑިވިޝަންގައި ގިނަ މެޗުތަކެއް ކުޅެފަ އަންނަ ދެޓީމާ ވާދަކުރުމަކީ ފަސޭހަކަމެއް ނޫން. ރަނގަޅު ވަރުގަދަ ސްކޮޑެއް ނެތި ފުރަތަމަ ޑިވިޝަނަށް ދިއުމަކީ ފަސޭހަކަމެއް ނޫން.ސޮބާހު މުޙައްމަދު/ ނިއުރޭޑިއަންޓް ކޯޗު
ސޮބާ ބުނީ އޭނާ ނިއުރޭޑިއަންޓާ ހަވާލުވީ ރަނގަޅު މަސައްކަތެއްކޮށް, ނިއުރޭޑިއަންޓް ފުރަތަމަ ޑިވިޝަނަށް ގެންދިއުމަށް މަސައްކަތްކުރުމުގެ ހެޔޮ ނިޔަތުގައިކަމަށެވެ. ނަމަވެސް އެކަން ނުވުމުން ސަޕޯޓަރުން މާޔޫސްވާނެކަން އެނގޭކަމަށާއި, އަދި މިއީ ނިއުރޭޑިއަންޓްގެ ސަޕޯޓަރުންނަށް ޤަބޫލުކުރަން ފަސޭހަ ނަތީޖާއަކަށްވެސް ނުވެދާނެކަމަށެވެ.
ސޮބާ ވަނީ ކްލަބްގެ އާމެނޭޖްމަންޓުން ކްލަބް އަނބުރާ ގެނައުމަށް ކުރި މަސައްކަތްވެސް ފާހަގަކޮށްފައެވެ. ލިބުނު ކުޑަވަގުތުކޮޅުގެ ތެރޭގައި ކަންކަން ނިންމަން ޖެހުނީ ވަރަށް އަވަހަށް އެލާޓްގައި ތިބެގެންކަމަށްވެސް ކުރިން ނިއުރޭޑިއަންޓާއި ޤައުމީ ޓީމަށްވެސް ކުޅުނު ސޮބާ ބުންޏެވެ.
"އިންޝާالله ނިއުރޭޑިއަންޓް ފުރިހަމައަށް ތައްޔާރުވެގެން އެނބުރި އަންނާނެކަމުގެ ޔަޤީންކަން އެބައޮތް" ސޮބާ ފޭސްބުކްފައި ކުރި ޕޯސްޓް ނިންމާލަމުން ބުނެފައިވެއެވެ.
