ވެލާނާ އިންޓަރނޭޝަނަލް އެއާރޕޯޓު (ވީއައިއޭ)ގެ ޗެކިންގ ސިސްޓަމަށް ދިމާވި މައްސަލަ ހައްލުކުރުމުގެ މަސައްކަތް އަދިވެސް ކުރިއަށްދާކަމަށާއި، އެ މައްސަލަ މިހާތަނަށް އައިއިރު ހައްލުކުރެވިފައި ނުވާކަމަށް، ވެލާނާ އިންޓަރނޭޝަނަލް އެއާޕޯޓުގެ ޓަރމިނަލް އޮޕަރޭޝަންސްގެ ޖެނެރަލް މެނޭޖަރ އިބްރާހީމް ހުސައިން ވިދާޅުވެއްޖެއެވެ.

ރާއްޖެޓީވީގެ ފަށާއިރު ޕްރޮގްރާމްގައި ވާހަކަދައްކަވަމުން އޭނާ ވިދާޅުވީ، ޗެކިންގ ސިސްޓަމަށް މީގެ ތިން ދުވަސް ކުރިން ދިމާވި މައްސަލައާގުޅިގެން ޗެކިން ކުރުމުގައި ދަތިތައް ހުރި ނަމަވެސް އެއާޕޯޓުގެ ޗެކިންގ ހުއްޓުމަކަށް އައިސްފައިނުވާކަމަށެވެ. އެގޮތުން ރާއްޖެއާއި ރާއްޖެއިން ބޭރުގެ ތަންތަނަށް ދަތުރުކުރާ ފަރާތްތަކުންވެސް ޗެކިންގ ވުމަށް ހޭދަކުރަން ޖެހޭ ވަގުތު ކުރިއާ އަޅައިބަލާއިރު ވަރަށް ބޮޑުތަން އިތުރުވެފައިވާކަން އޭނާ ވަނީ ފާހަގަކުރައްވާފައެވެ. އެހެންކަމުން އެފަދަ މައްސަލަތައް މެދުވެރިވިޔަ ނުދިނުމަށްޓަކައި ދުރާލައި ޗެކިންގވުމަށް އެއާރޕޯޓަށް ދިއުން މުހިންމުކަމަށް އޭނާ ވިދާޅުވިއެވެ.

އޭނާ އިތުރަށް ވިދާޅުވީ، އެއާރޕޯޓުގެ ޗެކިން ސިސްޓަމަށް ދިމާވި މައްސަލަ ދިމާވާން މެދުވެރިވި ސަބަބު މިހާތަނަށް އައިއިރު ދެނެގަނެވިފައި ނުވާކަމަށެވެ. އެހެންނަމަވެސް އެ މައްސަލައިގައި ކަންހިނގި ގޮތް ބަލައި ތަހުގީގުކުރާނެ ކަމަށްވެސް އޭނާ ވިދާޅުވިއެވެ.

އެއާރޕޯޓުގެ ޗެކިންގއަށް މައްސަލަ ދިމާވިނަމަވެސް އިއްޔެ އެކަނިވެސް އިންޓަރނޭޝަނަލް 70 ފްލައިޓުން 5124 ފަސިންޖަރުން ވަނީ ރާއްޖެ އައިސްފައެވެ. އަދި ޑޮމެސްޓިކް ފްލައިޓް 49 ފްލައިޓް ދަތުރުކޮށްފައިވާއިރު ޖުމުލަ 1874 ފަސިންޖަރުން ރާއްޖޭގެ އެކިތަންތަނަށް ވީއައިއޭއިން ދަތުރުކޮށްފައިވެއެވެ.