ސްރީލަންކާގެ ހުރިހާ ޕާޓީއެއް ގުޅިގެން ގުޅިފައިވާ ސަރުކާރެއް އެކުލަވައިލަން އެ ޤައުމުގެ ރައީސް ރަނިލް ވިކްރެމަސިންހަ މަޖިލިސް މެމްބަރުންނަށް ދައުވަތު ފޮނުއްވައިފިކަމަށް ބޭރުގެ މީޑިއާތަކުން ރިޕޯޓްކޮށްފިއެވެ.
ބޭރުގެ މީޑިއާތަކުން ލަންކާ ރައީސްގެ އޮފީހާ ހަވާލާދީ ބުނެފައިވަނީ މިހާރު ހުރިހާ މެމްބަރުންނަށް އެ ދައުވަތު ފޮނުއްވާފައިވާ ކަމަށެވެ. އަދި މިއީ ލަންކާ މިހާރު އޮތް ހާލަތުން އަރައިގަންނަން އަޅާ ފިޔަވަޅެއް ކަމަށް ވެސް ވަނީ ބުނެފައެވެ.
މިދިޔަ ހޮނިހިރު ދުވަހު ލަންކާގެ މޮންކުންނާއި ބައްދަލުކުރައްވާ އައުފެށުމަކުން ފަށަން ބޭނުންފުޅުވާކަމަށް ރަނިލް ވިދާޅުވި ކަމަށްވެއެވެ. އަދި އެ ފެށުމުގެ ފުރަތަމަ ފިޔަވަޅަކީ ހުރިހާ ޕާޓީތައް އެއްވެ ސަރުކާރެއް އުފެއްދުން ކަމަށް އެމަނިކުފާނު ވިދާޅުވި ކަމަށް ވަނީ ރިޕޯޓްކޮށްފައެވެ.
ލަންކާގެ އިގްތިސާދީ ހާލަތު ވަނީ ވަރަށް ބޮޑަށް ދަށްވެފައެވެ. މިކަމުގެ ސަބަބުން އެ ޤައުމުގައި މުޒާހަރާތައް ގިނަވެ، އެއިރު ބޮޑުވަޒީރުގެ މަގާމުގައި ހުންނެވި މަހިންދަ ރާޖަޕަކްސަ އިސްތިއުފާ ދެއްވަން މަޖުބޫރުވެވަޑައިގެން އިސްތިއުފާދެއްވިއެވެ. އެއަށްފަހު އެ މަގާމަށް ރަނިލް އައްޔަން ކުރެއްވިއެވެ. ނަމަވެސް ހާލަތު ރަނގަޅުނުވެ، ރައީސްގެ މަގާމުގައި ހުންނެވި ގޮތަބަޔާ ރާޖަކަޕަކްސައަށް ވެސް އިސްތިއުފާދެއްވަން މަޖުބޫރުވެވަޑައިގެންނެވިއެވެ. އެމަނިކުފާނު ލަންކާއިން ފިއްލަވައިވަޑައިގެން އިސްތިއުފާ ދެއްވުމުން އައު ރައީސަކަށް ރަނިލް އައްޔަން ކުރެވުނެވެ.
ލަންކާގެ ހާލަތު ރަނގަޅު ކުރުމަށް މަސައްކަތް ކުރައްވާނެ ކަމަށް ރަނިލް ވަނީ ވިދާޅުވެފައެވެ. އެގޮތުން، ޕާޓީތައް ގުޅިގެން ސަރުކާރެއް އެކުލަވާލުމުގެ މަޝްވަރާތައް މީގެ ކުރިން ވެސް ވަނީ ކޮށްފައެވެ.
