ހަމައެކަނި މޭވާ އާއި ތަރުކާރީގެ ބާވަތްތަކަށް ހާއްސަ ފިހާރައެއް އައްޑޫ ސިޓީގެ ހިތަދޫގައި ހުޅުވައިފި އެވެ.
"ފްރެޝް ސިޓީ" ގެ ނަމުގައި ހުޅުވާފައިވާ މި ފިހާރަ ހުންނަނީ ހިތަދޫގެ ގާޒީ މަގުގައި ޓޫވޭވް ފިހާރަ ކުރިމަތީގައެވެ. އެ ފިހާރައިން ބުނީ ތާޒާ މޭވާ އާއި ތަރުކާރީގެ ވަރަށް ގިނަ ބާވަތްތަކެއް، އަތްފޯރާ ފަށުގައި ގަންނަން ލިބޭނެ ކަމަށެވެ.
އެތަނުން ވިއްކާ ބާވަތްތަކުގެ ތެރޭގައި ރާއްޖޭގައި ހައްދާ ބާވަތްތަކާއި ރާއްޖޭން ބޭރުން އިމްޕޯޓް ކުރާ ބާވަތްތައް ވެސް ހިމެނެ އެވެ.
"ފްރެޝް ސިޓީ"ގެ ވެރި ފަރާތުން ބުނީ މޭވާ އާއި ތަރުކާރީ އަށް ހާއްސަ ފިހާރައެއް ހުޅުވުމުން، އެ ބާވަތްތައް ތާޒާކޮށް ހޯދަން ބޭނުންވާ އާންމު ރައްޔިތުންނަށާއި ކެފޭ/ރެސްޓޯރަންޓް ފަދަ ތަންތަން ހިންގާ މީހުންނަށް ވެސް ތާޒާ މޭވާ އާއި ތަރުކާރީ ގަންނަން ފަސޭހަކަމާ އެކު ލިބޭނެ ކަމަށެވެ. އެތަނުން ބުނީ އަމާޒަކީ އަބަދު ވެސް ބާވަތްތައް ހުސްނުވާނެހެން ކަސްޓަމަރުންނަށް ލިބޭނެ ގޮތް ފަހިކޮށް ދިނުން ކަމަށެވެ.
މީގެ ކުރިން ވަނީ ފްރެޝް ސިޓީގެ އިތުރު ފިހާރައެއް ފޭދޫގައިވެސް ހުޅުވާފައެވެ. އެއީވެސް ހަމައެކަނި ތަރުކާރީ އާއި މޭވާ އަށް ހާއްސަ ފިހާރައެކެވެ. "ފްރެޝް ސިޓީ" ގެ ނަމުގައި ހުޅުވާފައިވާ މި ފިހާރަ ހުންނަނީ ފޭދޫ ބޮޑު މަގުގައި ފޭދޫ ސްކޫލް ކައިރީގަ އެވެ.
މި ފިހާރަ ހުޅުވުމުގެ ސަބަބުން ފޭދޫ، މަރަދޫ ފޭދޫ އަދި މަރަދޫގެ ވިޔަފާރިވެރިންނާއި އާންމުންނަށް ތާޒާ މޭވާއާއި ތަރުކާރީ ލިބުމުގައި ވަނީ ބޮޑެތި ފަސޭހަތަކެއް ލިބިގެން ގޮސްފައެވެ.
ފްރެޝް ސިޓީއަކީ ހިތަދޫގައި ތަރުކާރީއާއި މޭވާއަށް ހާއްސަކޮށްގެން ހުޅުވި ފުރަތަމަ ފިހާރައެވެ.
