ކޮވިޑް-19ގެ ތެރޭގައި ރާއްޖޭގެ ބޯޑަރު ބަންދުކޮށްފައި އޮތުމަށްފަހު އަލުން ހުޅުވުމަށް ސަރުކާރުން ނިންމި ނިންމުމަކީ ރަނގަޅު ނިންމުމެއް ކަމަށާއި، އޭގެ ފައިދާ މިހާރު ފެންނަމުންދާކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވިދާޅުވެއްޖެއެވެ.
ރާއްޖޭގެ ފަތުރުވެރިކަމަށް 50 އަހަރު ފުރުން ފާހަގަކުރުމަށް މަޓީން ބޭއްވި އެވޯޑް ހަފްލާގައި ވާހަކަފުޅުދައްކަވަމުން ރައީސް ވިދާޅުވީ، ކޮވިޑާ ގުޅިގެން ބައިނަލްއަގުވާމީ ފްލައިޓުތައް ކެންސަލްކުރުމާއި ބޯޑަރު ބަންދުކުރުން ވެގެންދިޔައީ ދަތިކަމަކަށް ކަމަށެވެ. ބޯޑަރު ބަންދުކުރީ ބައެއް ފަރާތްތަކުގެ ވިސްނުމާ ދެކޮޅަށްކަންވެސް ރައީސް ފާހަގަކުރެއްވިއެވެ.
ރައީސް ވިދާޅުވީ ރާއްޖޭގެ ބޯޑަރު ބަންދުކުރިތާ 3 މަސް ދުވަސް ފަހުން އަލުން ހުޅުވާލީވެސް ބައެއް ފަރާތްތަކުގެ ވިސްނުމާ ދެކޮޅަށް ކަމަށެވެ. ނަމަވެސް އެއީ ރަނގަޅު ނިންމެވުމަށްކަމަށާއި މިއަދު ރާއްޖޭގެ ފަތުރުވެރިކަން މިއޮތް ހިސާބަށް އާދެވުނީ އެ ނިންމުމުގެ ސަބަބުންކަން ރައީސް ފާހަގަ ކުރެއްވިއެވެ.
ޖުލައި 15، 2020ގަ ރާއްޖޭގެ ބޯޑަރު އަލުން ހުޅުވާލީ ހަމަ ބައެއް ބޭފުޅުންގެ ވިސްނުމާ އިދިކޮޅަށް. އެހެންނަމަވެސް އެ ދަނޑިވަޅުގަ ރާއްޖޭގެ ބޯޑަރުތައް ހުޅުވާލަން ނިންމި ނިންމުމަކީ ހަމަ ހަގީގަތުގައި ރަނގަޅު ނިންމުމެއް. މިއަދު އަޅުގަނޑުމެން މިތިބަ ހިސާބަށް އާދެވިފަ މިތިބީ އެ ނިންމުމުގެ ސަބަބުން. މިއަދުވެސް ދުނިޔޭގެ އިގުތިސާދު އޮތީ މާ ފަހި ދުވެއްޔެއްގައެއްނޫން. ޔޫރަޕުގެ އިރުމަތީ ބިތުގަ އެކުރާ ހަނގުރާމަ މުޅި ދުނިޔެއަށް ނުރައްކާކޮށްފި. އިގުތިސާދުތައް ހީނަރުކޮށް ދަތުރުފަތުރަށް ބުރޫއަރުވައިފި. ކާބޯތަކެތީގެ ރައްކާތެރިކަމާމެދު ސުވާލު އުފެދެން ފަށައިފި. މިފަދަ ހައްސާސް ދަނޑިވަޅެއްގަ ކޮންމެ ގައުމަކަށްވެސް އަމާންކަމުގެ އައްސޭރިއަށް ދެވޭނީ ސަރުކާރާ ރައްޔިތުން ގުޅިގެން ކުރާ މަސައްކަތުން.ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު
ރައީސް ވިދާޅުވީ ރާއްޖޭގެ ފަތުރުވެރިކަން ކުރިއަރައިގެންދާއިރު މިހާރު އޮތް އެންމެ ބޮޑު ގޮންޖެހުމަކީ އެއަރޕޯޓުގައި ޖާގައިގެ ދަތިކަން ކަމަށެވެ. މި މައްސަލަ ހައްލުކުރުމަށް ވެލާނާ އިންޓަރނޭޝަން އެއަރޕޯޓުގެ މަސައްކަތްތައް މިހާރު ކުރަމުންގެންދާ ކަމަށާއި، އާ ޓަރމިނަލް ހުޅުވުމުން އަހަރަކު 7.2 މިލިއަން ފަތުރުވެރިންނަށް ރާއްޖެއިން މަރުހަބާކިޔޭނެކަމަށް ރައީސް ވިދާޅުވިއެވެ.
މީގެ އިތުރުން ރާއްޖޭގެ އެކި ސަރަހައްދުތަކުގައި ހުޅުވަމުންދާ ރީޖަނަލް އެއަރޕޯޓްތަކުގެ ސަބަބުން ވެސް ފަތުރުވެރިކަމަށް ފައިދާވާނެ ކަމަށް ރައީސް ވިދާޅުވިއެވެ.
މި ސިނާއަތް ތަރައްގީވަމުންދާ ހަލުވި ދުވެއްޔާ އަޅާ ބަލާއިރު މިހާރު އޮތް އެންމެ ބޮޑު ގޮންޖެހުމަކީ، ވެލާނާ އިންޓަނޭޝަނަލް އެއަރޕޯޓުގެ ކެޕޭސިޓީ އިތުރުކުރުން. އަޅުގަނޑުމެން ވެރިކަމާ ހަވާލުވިއިރު އެ މަސައްކަތް ހުރީ އެކި ހިސާބުތަކުގަ މަޑުޖެހިފަ. އެކި ސަބަބުތަކާހުރެ. އެކަންކަން ހައްލުކުރުމަށްފަހު މިހާރު އެމަސައްކަތް އެބަ ކުރޭ. އާ ޓަރމިނަލް ހުޅުވުމުން އަހަރަކު 7.2 މިލިއަން ފަތުރުވެރިންނަށް ޚިދުމަތްދެވޭނެ. އޭގެ އިތުރުން އަތޮޅުތަކުގަ ތަރައްގީކުރާ އިތުރު އެއަރޕޯޓްތަކުގެ ސަބަބުންވެސް ފަތުރުވެރިކަން އިތުރަށް ފުޅާވެގެންދާނެ.ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު
ރައީސް އިތުރަށް ވިދާޅުވީ ރާއްޖޭގެ ފަތުރުވެރިކަމަށް ދިމާވާ ގޮންޖެހުންތައް ނައްތާލަން މަސައްކަތް ކުރަންޖެހޭކަމަށެވެ. އަދި ފަތުރުވެރިކަމުގެ ދާއިރާގެ ފަރާތްތަކާ ގުޅިގެން ސަރުކާރުން މަސައްކަތްކުރާނެކަމަށާއި، ދާއިރާ ކުރިއެރުވުމަށް ސަރުކާރުގެ ފުރިހަމަ އެއްބާރުލުން ލިބޭނެކަމަށްވެސް ރައީސް ވިދާޅުވިއެވެ.
